ا ق ش سيرياداعى اسكەري قاتىسۋىن قىسقارتىپ، ءبىر عانا بازانى قالدىرادى - ارنايى وكىل
استانا. KAZINFORM - ۆاشينگتون بۇرىنعى ءادىس ناتيجە بەرمەگەنىن ايتىپ، ەسكى ستراتەگياسىنان باس تارتتى. ەندى سيرياعا قاتىستى كوزقاراسىن قايتا قاراۋعا نيەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ا ق ش بۇرىنعى فورماتتاعى وپەراتسيالاردان باس تارتىپ، ايماقتا ونداعان جىل بويى جۇرگىزىلىپ كەلە جاتقان ساياساتتىڭ تيىمسىزدىگىن مويىندادى. سيرياداعى اسكەري قاتىسۋىن ءبىر بازاعا دەيىن قىسقارتادى.
بۇل تۋرالى پرەزيدەنت دونالد ترامپتىڭ سيريا بويىنشا جاڭا ارنايى وكىلى جانە ءبىر مەزگىلدە اقش- تىڭ تۇركياداعى ەلشىسى توماس بارراك NTV تۇرىك تەلەارناسىنا بەرگەن سۇحباتىندا مالىمدەدى.
- ءبىزدىڭ سيرياداعى قازىرگى ساياساتىمىز سوڭعى ءجۇز جىلداعى ساياساتقا ۇقسامايدى، ويتكەنى ولاردىڭ ەشقايسىسى ناتيجە بەرمەدى، - دەدى بارراك.
ونىڭ ايتۋىنشا، ا ق ش اسكەرى قازىردىڭ وزىندە دەير-ەز-زور پروۆينتسياسىنداعى نىسانداردى قوسا العاندا، 8 بازانىڭ 7 سىنەن اسكەرى مەن تەحنيكاسىن شىعارا باستادى. قالعان كۇشتەر ەلدىڭ سولتۇستىك-شىعىسىنداعى حاساكا پروۆينتسياسىندا شوعىرلانادى.
قاۋىپسىزدىك سالاسىنداعى ەكى دەرەككوز Reuters اگەنتتىگىنە اسكەري تەحنيكانى شىعارۋ قازىردىڭ وزىندە ءجۇرىپ جاتقانىن راستادى، بىرەۋى دەير-ەز-زوردان بارلىق اسكەر شىعارىلىپ جاتقانىن ايتتى.
ا ق ش مەملەكەتتىك دەپارتامەنتىنىڭ وكىلى كەيىنىرەك اسكەرلەر سانى وپەراتسيالىق جاعدايعا بايلانىستى «قاجەتىنە قاراي» تۇزەتىلەتىنىن ايتتى.
قازىر سيريادا 2000 عا جۋىق ا ق ش اسكەرى قالدى، ولاردىڭ كوپشىلىگى سيريا دەموكراتيالىق كۇشتەرىنىڭ (SDF) كۇرد كۇشتەرىمەن جۇمىس ىستەيدى.
كۇردتەردىڭ حالىقتىق قورعانىس بولىمشەلەرىنىڭ (YPG) اينالاسىندا ورنالاسقان SDF دايش لاڭكەستىك توبىمەن كۇرەستە ا ق ش-تىڭ نەگىزگى سەرىكتەسى.
الايدا انكارا YPG-دى تۇرىك مەملەكەتىمەن 40 جىلعا سوزىلعان قاقتىعىستان كەيىن مامىر ايىندا تاراتىلعانىن جاريالاعان تىيىم سالىنعان كۇردىستان جۇمىسشى پارتياسىمەن بايلانىسى بار قۇرىلىم رەتىندە قاراستىرادى.
2025 -جىلدىڭ باسىنان باشار اساد بيلىكتەن شەتتەتىلىپ، ۋاقىتشا پرەزيدەنت احمەد اش-شاراا بيلىككە كەلگەننەن كەيىن باتىس ەلدەرى داماسكپەن بايلانىسىن بىرتىندەپ قالپىنا كەلتىرە باستادى. وتكەن اپتادا توماس بارراك 2012 -جىلدان بەرى العاش رەت سيريا استاناسىنداعى ەلشىلىك رەزيدەنتسياسىنىڭ ۇستىنە ا ق ش تۋىن تاعى دا كوتەردى.
تۇركيا پرەزيدەنتى رەجەپ تايىپ ەردوعان وتكەن اپتادا سيريا ۇكىمەتىمەن قول جەتكىزىلگەن كەلىسىمگە قاراماستان SDF-تى ينتەگراتسيالىق ۇدەرىستى كەشىكتىرىپ وتىر دەپ ايىپتادى.
وسى وزگەرىستەرگە بايلانىستى ا ق ش سيرياداعى بۇرىنعى باعىتىن قابىلداماي، شەكتەۋلى، ءبىراق ۆاشينگتوننىڭ پىكىرىنشە، ناقتىراق قاتىسۋ فورماتىنا كوشكەنىن جاريالادى.
بۇعان دەيىن ا ق ش 2 اي ىشىندە سيريادان اسكەرىن شىعارا باستاۋى مۇمكىن ەكەنىن حابارلاعان ەدىك.
