ا ق ش سيرەك مەتالدار بويىنشا قىتايعا تاۋەلدىلىكتى ازايتقىسى كەلەدى
استانا. KAZINFORM - ا ق ش ارمياسى مەن REalloys Inc. كومپانياسى يۋتا شتاتىنىڭ تۋەلە قالاسىنداعى اسكەري بازادا سيرەك كەزدەسەتىن اۋىر مەتالداردى وڭدەۋ زاۋىتىن سالۋ تۋرالى الدىن الا كەلىسىمگە قول قويدى، دەپ حابارلايدى Kazinform اگەنتتىگىنىڭ ۆاشينگتونداعى مەنشىكتى ءتىلشىسى FOX Business باسىلىمىنا سىلتەمە جاساپ.
جوبا ا ق ش ارمياسىنىڭ ستراتەگيالىق ينۆەستيتسيالىق باستاماسىنىڭ ءبىر بولىگى رەتىندە جۇزەگە اسىرىلادى جانە قۇراما شتاتتاردىڭ ونەركاسىپتىك بازاسىن نىعايتۋعا باعىتتالعان.
نىسان شامامەن 80 گەكتار جەرگە ورىن تەبەدى. ول ءدال باسقارىلاتىن وق-دارىلەردى، ەلەكتر قوزعالتقىشتارىن، رادارلاردى، سونارلاردى جانە باسقا دا قورعانىس جۇيەلەرىن وندىرۋگە قاجەت ديسپروزي مەن تەربيدى وڭدەۋگە مامانداندىرىلادى. كومپانيا سونىمەن قاتار تۇراقتى ماگنيتتەر شىعارۋدى دا قولعا الىپ، ءوندىرىس اۋقىمىن كەڭەيتپەك.
جوبا ا ق ش-تىڭ سيرەك مەتالدارمەن قامتاماسىز ەتۋ بويىنشا قىتايعا تاۋەلدىلىكتى ازايتۋدى جانە قورعانىس جەتكىزۋ تىزبەگىنىڭ تۇراقتىلىعىن قامتاماسىز ەتۋدى ماقسات ەتكەن.
REalloys كومپانياسىنىڭ باس ديرەكتورى ليپي شتەرنحەيمنىڭ ايتۋىنشا، وتاندىق ءوندىرىستى نىعايتۋ زاماناۋي تەحنولوگيالاردى دامىتۋ جانە ۇلتتىق قاۋىپسىزدىك ءۇشىن ستراتەگيالىق ماڭىزعا يە. ا ق ش ارمياسىنىڭ وكىلى دجەفف ۆاكسمان سونىمەن قاتار ديسپروزي مەن تەربيدى وڭدەۋدەگى قىتايدىڭ مونوپولياسى ا ق ش-تىڭ ەلەۋلى وسال تۇسى بولىپ وتىرعانىن تىلگە تيەك ەتتى.
كومپانيا باتىستىڭ ماڭىزدى مينەرالداردى تاۋەلسىز جەتكىزۋ تىزبەگىن قۇرۋ بىرنەشە جىلعا سوزىلۋى مۇمكىن دەپ سانايدى. REalloys كومپانياسىنىڭ باس ديرەكتورى بۇل سالادا 2029-2030 -جىلدارعا قاراي ايتارلىقتاي العا جىلجۋ بولادى دەپ ەسەپتەيدى. دەگەنمەن، جوبانى جۇزەگە اسىرۋ ءۇشىن جالداۋ شارتتارىن ناقتىلاۋ، ەكولوگيالىق باعالاۋ جۇرگىزۋ جانە قاجەتتى رۇقساتتاردى الۋ قاجەت بولادى.
كەلىسىم ا ق ش-تىڭ قورعانىس ونەركاسىبى ءۇشىن سيرەك كەزدەسەتىن جەر مەتالدارى مەن ماگنيتتەردى ساتىپ الۋعا شەكتەۋلەرىن كۇشەيتۋ اياسىندا جاسالدى. 2027 -جىلدىڭ 1-قاڭتارىنان باستاپ ا ق ش قورعانىس مەردىگەرلەرىنە بۇل ونىمدەردى قىتايدان، رەسەيدەن، سولتۇستىك كورەيادان جانە يراننان ساتىپ الۋعا تىيىم سالىنادى. يۋتا زاۋىتىنىڭ قۇرىلىسى ستراتەگيالىق ماڭىزدى مينەرالداردى وڭدەۋگە ارنالعان تاۋەلسىز ا ق ش ينفراقۇرىلىمىن قۇرۋعا باعىتتالعان ءبىر قادام بولعالى تۇر.
ايتا كەتەيىك، قازاقستان سيرەك مەتالداردى وڭدەپ، ەۋروپاعا دايىن ءونىم ەكسپورتتاۋعا باسا نازار اۋدارىپ وتىر.
Kazinform ءتىلشىسى الەمدەگى سيرەك مەتالدارعا دەگەن سۇرانىستىڭ ارتۋىنا بايلانىستى، قازاقستاننىڭ وسى سالاداعى الەۋەتىنە ساراپتاما جاسادى.
