ا ق ش پرەزيدەنتىنىڭ ارنايى وكىلى رەسەيگە كەلدى

ونىڭ رەسەي پرەزيدەنتى ۆلاديمير پۋتينمەن كەزدەسۋى جوسپارلانعان، دەپ حابارلايدى اگەنتتىك ءتىلشىسى.

Flightradar24 سەرۆيسىنىڭ مالىمەتىنشە، وسلودان ۇشىپ شىققان Bombardier ۇشاعى پۋلكوۆو-3 اۋەجايىنا قونعان. امەريكالىق وكىلدى رەسەي پرەزيدەنتىنىڭ شەت مەملەكەتتەرمەن ينۆەستيتسيالىق-ەكونوميكالىق ىنتىماقتاستىق جونىندەگى ارنايى وكىلى، رەسەيدىڭ تىكەلەي ينۆەستيتسيالار قورىنىڭ باسشىسى كيريلل دميتريەۆ قارسى الدى. كەيىن ولار اۋەجايدان بىرگە كەتكەن.

20-قازاندا ستيۆ ۋيتكوفف وسلودا ۋكراينا پرەزيدەنتى ۆلاديمير زەلەنسكيمەن، نورۆەگيا پرەمەر- ءمينيسترى يوناس گار ستەرەمەن جانە فينليانديا پرەزيدەنتى الەكساندر ستۋببپەن كەلىسسوزدەر وتكىزدى. كەزدەسۋدە رەسەي مەن ۋكراينا اراسىنداعى قاقتىعىستى رەتتەۋ جانە ەۋروپانىڭ بولاشاق قاۋىپسىزدىك ارحيتەكتۋراسىن قالىپتاستىرۋ ماسەلەلەرى تالقىلاندى.

21-قازان كۇنى تاڭەرتەڭ ا ق ش مەملەكەتتىك حاتشىسى ماركو رۋبيو ۋيتكوففتىڭ رەسەيگە جول تارتقانىن راستادى. ونىڭ ايتۋىنشا، ارنايى وكىلدىڭ زەلەنسكيمەن كەزدەسۋى سىندارلى وتكەن. سونداي-اق ۋيتكوفف رەسەيگە ۋكراينا تاراپىمەن تالقىلانعان ۇسىنىستاردى جەتكىزەدى.

بۇعان دەيىن شەتەلدىك ب ا ق وسلوداعى كەلىسسوزدەردە ۋكراينانىڭ ۇزاق مەرزىمدى دامۋ پەرسپەكتيۆالارى، سونىڭ ىشىندە قاۋىپسىزدىك كەپىلدىكتەرى، ەۋروپامەن ينتەگراتسيا، ەكونوميكانى قالپىنا كەلتىرۋ جانە ينۆەستيتسيا تارتۋ ماسەلەلەرى دە قارالعانىن حابارلاعان. كەلىسسوزدەردىڭ تاعى ءبىر بولىگى رەسەي مەن ەۋروپا اراسىنداعى قارىم-قاتىناستارعا جانە جاڭا قاۋىپسىزدىك ارحيتەكتۋراسىن قالىپتاستىرۋ تاسىلدەرىنە ارنالدى.

رەسەي پرەزيدەنتىنىڭ باسپا ءسوز حاتشىسى دميتري پەسكوۆ بۇعان دەيىن ماسكەۋ ا ق ش پرەزيدەنتىنىڭ ارنايى وكىلدەرىمەن ۆلاديمير ءپۋتيننىڭ جاقىن ارادا كەزدەسۋىن كۇتەتىنىن مالىمدەگەن.

ونىڭ ايتۋىنشا، تاراپتار امەريكالىق وكىلدەردىڭ ۋكراينا جانە ەۋروپا تاراپتارىمەن وتكىزگەن كەزدەسۋلەرىنىڭ قورىتىندىلارىن تالقىلاپ، باسقا دا ماڭىزدى ماسەلەلەر بويىنشا ۇستانىمدارىمەن الماسۋدى جوسپارلاپ وتىر.

ستيۆ ۋيتكوففتىڭ ۆلاديمير پۋتينمەن بۇعان دەيىنگى كەزدەسۋى قىركۇيەك ايىنىڭ باسىندا ماسكەۋدە وتكەن.

ايتا كەتەيىك، وسىعان دەيىن ا ق ش مەملەكەتتىك حاتشىسى ماركو رۋبيو وزبەكستانعا باردى.