ا ق ش قىرعىزستان ازاماتتارىنا جاڭا ۆيزالىق شەكتەۋلەر ەنگىزدى
استانا. KAZINFORM - ا ق ش مەملەكەتتىك دەپارتامەنتى جاريالاعان اقپاراتقا سايكەس، وسى اپتادا قىرعىز رەسپۋبليكاسىنىڭ ازاماتتارى ءۇشىن ميگراتسيالىق ەمەس ۆيزا بەرۋگە جاڭا شەكتەۋلەر ەنگىزىلدى، دەپ حابارلايدى Kabar.kg.
سونىمەن بىرگە، قىرعىزستان سىرتقى ىستەر مينيسترلىگى بۇل شارالاردى امەريكالىق تاراپ ءبىرجاقتى تارتىپتە جانە قىرعىز تاراپىنا الدىن الا ەسكەرتۋسىز قابىلداعانىن، بۇل الاڭداۋشىلىق تۋعىزىپ، ديپلوماتيالىق ديالوگ اياسىندا ءتۇسىندىرۋدى قاجەت ەتەتىنىن اتاپ ءوتتى.
- وسىعان بايلانىستى جاقىن ارادا قىرعىز رەسپۋبليكاسى سىرتقى ىستەر ءمينيسترىنىڭ ورىنباسارى الماز يمانعازيەۆ پەن امەريكا قۇراما شتاتتارىنىڭ قىرعىز رەسپۋبليكاسىنداعى ەلشىسى لەسلي ۆيگەريدىڭ كەزدەسۋى وتەدى. كەزدەسۋ بارىسىندا شەكتەۋلەردىڭ ەنگىزىلۋ سەبەپتەرىن، ولاردى جەڭىلدەتۋدىڭ ىقتيمال جولدارىن، سونداي-اق بولاشاقتا وسىنداي جاعدايلاردىڭ الدىن الۋ شارالارىن تالقىلاۋ جوسپارلاندى، - دەپ اتاپ ءوتتى قىرعىزستان سىرتقى ىستەر مينيسترلىگى.
قىرعىزستان سىرتقى ىستەر مينيسترلىگى امەريكالىق تاراپپەن ءوزارا ءىس-قيمىلعا ۇلكەن ءمان بەرەتىنى جانە قىرعىز رەسپۋبليكاسى ازاماتتارىنىڭ شەتەلدەگى قۇقىقتارى مەن مۇددەلەرىن قورعاۋ بويىنشا جۇمىستى جالعاستىراتىنى اتاپ ءوتىلدى.
بۇعان دەيىن قىرعىزستاندىقتاردىڭ ا ق ش- قا كىرۋىنە تىيىم سالىنۋى مۇمكىن ەكەنىن جازعان بولاتىنبىز.
