ا ق ش پەن ەۋروپانىڭ قارىم-قاتىناسى بۇزىلۋى مۇمكىن بە
استانا. KAZINFORM - ا ق ش پەن ۋكراينا پرەزيدەنتتەرىنىڭ ءساتسىز وتكەن كەزدەسۋىنەن كەيىن دونالد ترامپتىڭ رەسەي- ۋكراينا قاقتىعىسىن شەشۋ جوسپارى ايقىن قيىندىقتارعا تاپ بولىپ وتىر، دەپ جازدى Kazinform اگەنتتىگىنىڭ حالىقارالىق شولۋشىسى.
28-اقپاندا دونالد ترامپ پەن ۆلاديمير زەلەنسكيدىڭ اق ۇيدەگى كەزدەسۋى ءساتسىز اياقتالعاننان كەيىن اۋەلدە ۋكراينا ءۇشىن كوپ نارسە جوعالعانداي بولىپ كورىنە باستادى. ا ق ش-تىڭ كومەگىن توقتاتۋى تەوريالىق تۇرعىدا ۋكراينانى السىرەتۋى ءتيىس ەدى. دەگەنمەن، ءدال گەوساياساتتاعى جاعدايدىڭ دامۋىن بولجاۋ مۇمكىن ەمەستىگى ەۋروپانى جۇمىلدىرۋعا ءماجبۇر ەتتى.
زەلەنسكي ۆاشينگتوننان كەيىن بىردەن ۇلى بريتانياعا ۇشىپ كەتتى، وندا پرەمەر-مينيستر كير ستارمەرمەن كەزدەسىپ، ەۋروپالىق كوشباسشىلاردىڭ سامميتىنە قاتىستى. 2-ناۋرىزدا ولار ۋكراينانى عانا ەمەس، ەۋروپانى قايتا قارۋلاندىرۋ جانە شىعىس شەكارالاردى نىعايتۋ ماسەلەلەرىنە قاتىستى ءبىرقاتار مالىمدەمە جاسادى. سونداي-اق كەزدەسۋدە ەۋروپانىڭ 2015 -جىلعى مينسك كەلىسىمدەرىنە قاتىستى جاعدايدىڭ قايتالانۋىنا جول بەرمەيتىنى جانە ۋكراينانىڭ قاۋىپسىزدىك كەپىلدىگىن الۋى كەرەكتىگى تۋرالى دا ايتىلدى.
زەلەنسكي ترامپتىڭ جوسپارلارىن بۇزدى
ترامپ ۋكراينانىڭ ا ق ش-قا 500 ميلليارد دوللار كولەمىندەگى قارىزى تۋرالى ايتىپ، ول ءۇشىن سيرەك مەتالدار مەن ينفراقۇرىلىمدى بەرۋ كەرەكتىگىن ءمالىم ەتتى. ۋكراينا بۇعان كەلىسپەي، كەلىسسوزدەر بارىسىندا تۇزەتۋلەر ەنگىزدى. وسىلايشا، ترامپ ءۇشىن بۇل كەلىسىم ەندى سونشالىقتى ماڭىزدى بولماي قالدى.
رەسەي پرەزيدەنتى ۆلاديمير پۋتينمەن كەلىسسوزدەر ساۋدا-ساتتىق فورماتىندا ءوتۋى كەرەك ەدى - ترامپ ءۇشىن بۇل كەلىسسوزدەر جۇرگىزۋدىڭ لوگيكالىق جانە ەڭ تانىس فورماتى. ءبىراق سيرەك مەتالدار تۋرالى شارتتىڭ جاڭا نۇسقاسى وعان قاجەتتى شارتتاردى قامتاماسىز ەتە المادى. ترامپتىڭ بۇعان كوڭىلى تولمايتىنى انىق.
ەۋروپا مەن ا ق ش-تىڭ قارىم-قاتىناسى
ال ەۋروپالىقتار، ۆەنگريا پرەمەر-ءمينيسترى ۆيكتور ورباندى قوسپاعاندا، ۋكراينانى جاپپاي قولدادى. وسىلايشا، جالپى جاعداي وزگەردى. ەندى ەۋروپا رەسەيمەن قارىم-قاتىناستىڭ نەگىزگى ماسەلەسىندە ا ق ش-تان بولەك ارەكەت ەتۋدە.
تيىسىنشە، زەلەنسكيگە بىلايشا ايتقاندا، ترامپتان كەشىرىم سۇراۋدىڭ قاجەتى جوق. ترامپ بولسا بۇدان بىلاي رەسەيمەن كۇش پوزيتسياسىندا كەلىسسوز جۇرگىزە المايدى. ارينە، ەكىجاقتى قارىم-قاتىناستى دامىتۋعا بولادى. ءبىراق ەۋروپاسىز ا ق ش-تىڭ سانكتسيالارىن الىپ تاستاۋدىڭ ءوزى رەسەي ەكونوميكاسىنا ۇلكەن اسەر ەتە المايدى.
قورىتا ايتقاندا، ترامپ قيىن جاعدايعا تاپ بولدى. ەگەر ول رەسەيمەن ۋكرايناسىز، اسىرەسە ەۋروپاسىز كەلىسىم جاساسا، ول قالاعانداي ناتيجە بەرمەيدى. ونىڭ ۇستىنە ا ق ش-تىڭ وزىندە وتكىر سىنعا ۇشىرايدى.
سوندىقتان ءبىراز ۋاقىتتان كەيىن ترامپ باسقالاي ارەكەتكە كوشۋى مۇمكىن. ويتكەنى قازىرگى جاعداي ونىڭ ا ق ش تاريحىنداعى ءوزى بولعىسى كەلەتىن ەڭ قۋاتتى ساياساتكەر اتانۋىنا كومەكتەسپەيدى.
اۆتور
تالعاتجان مۇحامەتبەك ۇلى
