ا ق ش پەن ق ح ر اسكەر باسشىلارى ءبىر جىلدا ءبىرىنشى رەت كەلىسسوز جۇرگىزدى

پەنتاگون مەن ق ح ا ا قورعانىس سالاسىنداعى سەرىكتەستىكتى تالقىلادى. بۇل - ەكى ەلدىڭ اسكەري ۆەدومستۆولارى اراسىنداعى بايلانىستى قالپىنا كەلتىرۋ جوسپارلانعالى بولعان ءبىر جىلدان استام ۋاقىت ىشىندەگى العاشقى كەزدەسۋ، دەپ حابارلادى Kazinform اگەنتتىگى «گولوس امەريكي» باسىلىمىنا سىلتەمە جاساپ.

بەيسەنبى كۇنى جوعارى شەندى امەريكالىق اسكەرباسى قىتايلىق ارىپتەسىمەن ۆيرتۋال كەزدەسۋ وتكىزدى، دەپ حابارلادى ا ق ش قورعانىس مينيسترلىگى.

بەينەكونفەرەنتسيا وتكەن ايدا پرەزيدەنت دجو بايدەن مەن ق ح ر ءتوراعاسى شي جينپيڭ اراسىندا بولعان اسكەري مينيسترلىكتەردىڭ بايلانىسىن قالپىنا كەلتىرۋ تۋرالى كەلىسىم ناتيجەسىندە بولىپ وتىر. ەكى ەل بايلانىسى 2022-جىلعى تامىزدا وكىلدەر پالاتاسىنىڭ سپيكەرى نەنسي پەلوسيدىڭ تايۆانعا ساپارىنان كەيىن ۇزىلگەنىن ەسكە سالا كەتەيىك.

ا ق ش ا ا ك گەنەرالى، شتاب باسشىلارى بىرىككەن كوميتەتىنىڭ ءتوراعاسى چارلز براۋن مەن قىتاي حالىق-ازاتتىق ارمياسى (ق ح ا ا) گەنەرالى ليۋ چجەنلي كەلىسسوز كەزىندە «جاھاندىق جانە وڭىرلىك قاۋىپسىزدىك ماسەلەلەرىن» تالقىلادى، دەپ حابارلادى براۋن كەڭسەسى.

ليۋ - ورتالىق اسكەري كوميسسيا بىرىككەن شتابى، اسكەري وپەراتسيالارعا جانە اسكەري جوسپارلاۋعا جاۋاپتى قىتايلىق ورگان باسشىسى.

پەنتاگون وكىلدەرى ەكى ەل اسكەرىنىڭ بايلانىسى جانجالعا اينالىپ كەتۋى مۇمكىن وقيعالاردىڭ الدىن الاتىنىن اتاپ ءوتتى.

«گەنەرال براۋن باسەكەلەستىكتى باسقارۋ، قاتەلىكتى بولدىرماۋ جانە اشىق، تىكەلەي بايلانىس جەلىلەرىن ساقتاپ تۇرۋ ءۇشىن بىرلەسىپ جۇمىس ىستەۋدىڭ ماڭىزىن تالقىلادى»، - دەپ حابارلادى براۋن كەڭسەسى.

براۋن وتكەن ايدا ليۋ مىرزاعا حات جولداپ، كەزدەسۋگە دايىن ەكەنىن حابارلاعانىن ايتتى.

قىتاي قورعانىس مينيسترلىگىنىڭ رەسمي مالىمدەمەسى بويىنشا، ليۋ ا ق ش پەن قىتاي اراسىنداعى ساۋ، تۇراقتى جانە بەرىك قارىم-قاتىناس كىلتى «قىتايدى دۇرىس ءتۇسىنۋ» ەكەنىن ءمالىم ەتكەن.

ا ق ش رەسمي وكىلدەرى اسكەري كوممۋنيكاتسيا قالپىنا كەلتىرىلدى دەگەنمەن، شىنىندا ەكى تاراپتىڭ تولىق ديالوگقا كەلۋىنە ءبىراز ۋاقىت قاجەت بولۋى مۇمكىن ەكەنىن ەسكەرتتى.