ا ق ش پەن ۋكراينا دەلەگاتسياسى ساۋد ارابياسىندا كەلىسسوز جۇرگىزەدى
استانا. KAZINFORM - ساۋد ارابياسىندا وتەتىن كەزدەسۋ تۋرالى ۋكراينا پرەزيدەنتى ۆلاديمير زەلەنسكي مەن ا ق ش پرەزيدەنتىنىڭ ارنايى وكىلى ستيۆ ۋيتكوفف حابارلادى، دەپ جازادى Euronews.
بريۋسسەلدەگى سامميتكە قاتىسقان ۋكراينا پرەزيدەنتى ۆلاديمير زەلەنسكي X الەۋمەتتىك جەلىسىندە كەلەسى دۇيسەنبى كۇنى ساۋد ارابياسىنا «تاق مۇراگەرى حانزاداسىمەن كەزدەسۋ ءۇشىن» باراتىنىن جازدى.
وسىدان كەيىن ونىڭ كومانداسى امەريكالىقتارمەن كەلىسسوز جۇرگىزۋ ءۇشىن ساۋد ارابياسىندا قالاتىنىن دا ايتتى.
- ۋكراينا الەمگە كوبىرەك ءۇمىت ارتادى. بۇعان دەيىن ا ق ش پرەزيدەنتىنە ايتقانىمىزداي، ۋكراينا تەز ءارى سەنىمدى بەيبىتشىلىككە جەتۋ ءۇشىن سىندارلى جۇمىسىن جالعاستىرادى، - دەپ جازدى زەلەنسكي.
DW حابارلاۋىنشا، ا ق ش پرەزيدەنتىنىڭ ارنايى وكىلى ستيۆ ۋيتكوفف ۆاشينگتوندا وتكەن باسپا ءسوز ءماسليحاتىندا ۋكراينا دەلەگاتسياسىمەن كەلىسسوزدەر ساۋد ارابياسىندا 11-ناۋرىزدا ءوتۋى كەرەك ەكەنىن ايتتى. ول كەزدەسۋدە «بەيبىت كەلىسىم» شارتتارىن جانە اتىستى توقتاتۋ مۇمكىندىگىن تالقىلاۋ جوسپارلانعانىن ايتتى.
Fox News جۋرناليسى دجەكي حاينريح بۇعان دەيىن ا ق ش- تان كەلىسسوزدەرگە مەملەكەتتىك حاتشى ماركو رۋبيو، ا ق ش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى مايك ۋولتتس جانە دونالد ترامپتىڭ تاياۋ شىعىستاعى ارنايى وكىلى ستيۆ ۋيتكوفف قاتىساتىنىن ايتقان بولاتىن. ۋكراينانىڭ اتىنان پرەزيدەنت كەڭسەسىنىڭ باسشىسى اندرەي ەرماك قاتىسادى.
ەستەرىڭىزگە سالا كەتەيىك، رەسەي مەن ۋكراينا اراسىنداعى قاقتىعىستى تەز ارادا اياقتاۋ ا ق ش پرەزيدەنتى دونالد ترامپتىڭ سايلاۋالدى ۋادەلەرىنىڭ ءبىرى بولعان. وتكەن اپتادا ول ۆاشينگتونعا كەلگەن ۆلاديمير زەلەنسكيدى بەيبىتشىلىككە دايىن ەمەس دەپ ايىپتادى.
ال 5-ناۋرىزدا ترامپ ۋكراينا پرەزيدەنتىنەن ۆلاديمير زەلەنسكي «تۇراقتى بەيبىتشىلىككە جەتۋ ءۇشىن» جۇمىس ىستەۋگە دايىن ەكەنىن مالىمدەگەن حات العانىن حابارلادى.
