ا ق ش ۇلتتىق قاۋىپسىزدىك اگەنتتىگىنىڭ قۇپيا جەلىسى ىستەن شىقتى
استانا. KAZINFORM – ا ق ش ۇلتتىق قاۋىپسىزدىك اگەنتتىگى پايدالاناتىن قۇپيا كومپيۋتەرلىك جەلى سەيسەنبى كۇنى تەحنيكالىق اقاۋعا بايلانىستى ىستەن شىقتى.
بۇل وقيعا اۋە قاتىناسى، بانك قىزمەتى جانە ەلەكتروندى پوشتا جۇيەلەرىندە جاپپاي اقاۋ تىركەلگەن كەزەڭدە بولدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى NBC News-كە سىلتەمە جاساپ.
ا ق ش بيلىگى تەحنيكالىق اقاۋدىڭ ءبىر مەزگىلدە ۇيىمداستىرىلعان كيبەرشابۋىلدان تۋىنداعانىن راستايتىن ەشقانداي دالەل جوق ەكەنىن مالىمدەدى.
ۇلتتىق بارلاۋ ديرەكتورى دجەي كلەيتون سەيسەنبى كۇنى CNBC جانە Fox Business تەلەارنالارىنا بەرگەن سۇحباتىندا بۇل وقيعالار كومپانيالار مەن ۇيىمداردىڭ ءوز جۇيەلەرىن جاڭارتۋعا نەمەسە جەتىلدىرۋگە جاساعان ارەكەتتەرىنەن تۋىنداعانىن ايتتى.
- بۇل كيبەرشابۋىل دا، مەملەكەتتىڭ ۇيلەستىرىلگەن ارەكەتى دە ەمەس. ءبىز جاعدايدى مۇقيات تەكسەردىك،-دەدى ول.
ا ق ش ۇلتتىق قاۋىپسىزدىك اگەنتتىگىنىڭ كومپيۋتەرلىك جەلىسىندە تەحنيكالىق قىزمەت كورسەتۋ كەزىندە اقاۋ شىققانى حابارلاندى. الايدا بۇل جاعداي اگەنتتىكتىڭ ا ق ش-تاعى اۋقىمدى ەلەكتروندى باقىلاۋ جۇيەسىنىڭ جۇمىسىنا اسەر ەتپەگەن. مۇنداي قىسقا مەرزىمدى اقاۋلار مەن جۇمىستىڭ ۋاقىتشا توقتاۋى ۇكىمەتتىك جەلىلەردە ءجيى كەزدەسەدى.
ۇلتتىق قاۋىپسىزدىك اگەنتتىگىندەگى اقاۋ سوڭعى كۇندەرى Microsoft، ا ق ش فەدەرالدىق اۆياتسيا باسقارماسىنىڭ جۇيەلەرى،
JPMorgan Chase بانكى مەن United Airlines قىزمەتىندە بولعان تەحنيكالىق اقاۋلاردان كەيىن تىركەلدى.
ەسكە سالا كەتەيىك، بۇعان دەيىن بۇكىل الەمدە ChatGPT جانە باسقا دا سەرۆيستەردىڭ جۇمىسى ىستەن شىققانى حابارلانعان بولاتىن.