ا ق ش مەملەكەتتىك حاتشىسى يران دەلەگاتسياسىنان ا ق ش-تان كەتۋدى تالاپ ەتتى - ب ا ق

28-قىركۇيەك كۇنى كەشكىسىن ا ق ش مەملەكەتتىك حاتشىسى ماركو رۋبيو سىرتقى ىستەر ءمينيسترى ابباس اراگچي باستاعان يران دەلەگاتسياسىنان ەلدەن دەرەۋ كەتۋدى تالاپ ەتتى.

بۇل تۋرالى بەيسەنبى كۇنى Axios ا ق ش شەنەۋنىگى مەن تاعى ءبىر حاباردار دەرەككوزگە سىلتەمە جاساي وتىرىپ حابارلادى. يراننىڭ ب ۇ ۇ-داعى وكىلدىگى بۇل اقپاراتتى جوققا شىعاردى.

Axios-تىڭ مالىمەتىنشە، قاتاردىڭ ارااعايىندىعىمەن ءوتىپ جاتقان ۆاشينگتون مەن تەگەران اراسىنداعى كەلىسسوزدەر تىعىرىققا تىرەلگەننەن كەيىن وسىنداي تالاپ قويىلعان. دۇيسەنبى كۇنى تاڭەرتەڭ اق ءۇي ءالى دە بولسا كەلىسسوزدەر العا جىلجي ما دەپ ۇمىتتەنگەن بولاتىن، ءبىراق كەشكە قاراي تاراپتار ىمىراعا كەلە الماعانى بەلگىلى بولدى.

وسىدان كەيىن ب ۇ ۇ-داعى ا ق ش وكىلدىگى رۋبيونىڭ نۇسقاۋى بويىنشا يران وكىلدىگىنە دەلەگاتسيانىڭ كەتۋى قاجەتتىگىن حابارلادى. ا ق ش شەنەۋنىگى بۇل شەشىمدى بۇۇ باس اسسامبلەياسىنداعى جوعارى دەڭگەيدەگى ءىس-شارالاردىڭ اياقتالۋىمەن ءتۇسىندىردى. باسىلىمنىڭ مالىمەتىنشە، اراگچي مەن دەلەگاتسيانىڭ باسقا مۇشەلەرى بىرنەشە ساعاتتان كەيىن اۋەجايعا اتتانىپ، 29-قىركۇيەك، سەيسەنبى كۇنى 01:20 دا دوحاعا ۇشىپ كەتتى. Axios تىڭ ەكىنشى دەرەككوزى ا ق ش تالابىن راستاعان، ءبىراق يراندىق مينيستر ونسىز دا دۇيسەنبى كۇنى كەشكە كەتۋدى جوسپارلاعانىن ايتتى.

ب ۇ ۇ-داعى يران وكىلدىگى دەلەگاتسيا نيۋ-يوركتەن الدىن الا بەلگىلەنگەن كەستە بويىنشا كەتكەنىن مالىمدەدى.

- ناتيجەگە قول جەتكىزە الماعان سوڭ، مەملەكەتتىك دەپارتامەنت نەگىزسىز جانە پايداسىز حابارلامالاردى تاراتۋعا كوشتى، - دەلىنگەن ميسسيانىڭ X الەۋمەتتىك جەلى پلاتفورماسىنداعى مالىمدەمەسىندە.

سونىمەن قاتار، ا ق ش پەن يران اراسىنداعى ديپلوماتيالىق بايلانىس ۇزىلمەگەن. Axios-تىڭ مالىمەتىنشە، قاتارلىق دەلدالدار ەكى تاراپپەن دە ىمىراعا كەلۋ ۇسىنىسىن تالقىلاپ جاتىر.

كەلىسسوزدەر بارىسىندا ورمۋز بۇعازىن اشۋ، ا ق ش-تىڭ يران پورتتارىنا قويعان بلوكاداسىن توقتاتۋى جانە يراننىڭ يادرولىق باعدارلاماسىنا قاتىستى شارتتار باستى تاقىرىپ بولىپ وتىر.

تەگەران بۇعان دەيىن تالاپتارى ورىندالعان جاعدايدا بۇعازدى جەتى كۇن ىشىندە اشۋ جوسپارىن ۇسىنعان بولاتىن. ا ق ش پرەزيدەنتى دونالد ترامپ بۇل ۇسىنىستى جاريالى تۇردە كەرى قايتاردى، ءبىراق كەلىسسوزدەردى جالعاستىرۋعا بولاتىنىن بىلدىرگەن.