ا ق ش ەلشىسى شەت ەلدەن اقشا الاتىن قازاقستاندىقتاردىڭ تىزىمىنە قاتىستى پىكىر ءبىلدىردى
قازاقستانداعى ا ق ش ەلشىسى دەنيەل روزەنبليۋم ەلدەگى شەتەل قارجىلاندىراتىن تۇلعالار ءتىزىمى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

بۇگىن ەلوردادا ا ق ش ەلشىسى تىلشىلەرمەن دوڭگەلەك ۇستەل وتىرىسىن وتكىزدى. وندا جۋرناليستەر قازاقستانداعى شەتەل قارجىلاندىراتىن تۇلعالار ءتىزىمى تۋرالى ەلشىنىڭ پىكىرىن سۇرادى.
«مەن بۇل ءتىزىم تۋرالى ەستىدىم جانە ءبىزدىڭ ەلشىلىك مۇنى ءجىتى باقىلاپ وتىر. سونداي-اق ءبىز وسى ءتىزىم جاريالانعاننان كەيىنگى ءتۇرلى ۇەۇ مەن مەدياۇيىمداردىڭ رەاكسيالارىن باقىلاپ وتىرمىز. كەي ادامدار وسى ءتىزىم مەن باسقا ەلدەردەگى «شەتەلدىك اگەنتتەر» دەپ اتالاتىن زاڭداردى سالىستىرۋدا. مۇنداي سالىستىرۋلار نەلىكتەن جاسالاتىنىن تۇسىنەمىن، ءبىراق قازىرگى ۋاقىتتا بۇل ءارتۇرلى نارسە ەكەنىن ايتقىم كەلەدى»، - دەپ جاۋاپ بەردى د. روزەنبليۋم.
ەلشىنىڭ ايتۋىنشا، بۇل قازاقستاندىق تىزىمدە بولۋ ونداعى ۇيىمدار مەن ادامدار ءۇشىن زاڭمەن بايلانىستى ەش ماسەلە تۋدىرمايدى.
«جانە بۇل ولاردىڭ كۇندەلىكتى جۇمىسىنا ەش اسەر ەتپەيدى. ءبىز بۇل جاعدايدىڭ وسى قالپىندا بولۋىن قالايمىز، سوندىقتان بۇل ۇيىمداردىڭ جۇمىسىنا ەش كەدەرگى بولمايدى. ءبىز بۇعان باقىلاۋدى جالعاستىرامىز. قازاقستان ۇكىمەتى نەمەسە ۇكىمەتتىك ەمەس ۇيىمدار نە ايتاتىنىن كورەيىك. ەگەر بىزدە قانداي دا ءبىر الاڭداۋشىلىق تۋىنداسا، ۇكىمەتپەن سويلەسكەندە بۇل تاقىرىپتى مىندەتتى تۇردە كوتەرەمىز»، - دەدى ديپلومات.
20- قىركۇيەك كۇنى مەملەكەتتىك كىرىستەر كوميتەتى بيىلعى ءبىرىنشى جارتىجىلدىقتا شەتەلدىك كوزدەردەن اقشا نەمەسە وزگە دە مۇلىك العان تۇلعالاردىڭ ءتىزىمىن جاريالادى. قۇجاتقا ءارتۇرلى باعىتتا جۇمىس ىستەيتىن 240 ۇيىمنىڭ اتاۋى مەن ازاماتتاردىڭ ەسىمى ەنگەن. تىزىلىمدە ۇيىمدار مەن جەكە ادامداردىڭ بيزنەس-سايكەستەندىرۋ نومىرلەرى (ب س ن) جانە جەكە سايكەستەندىرۋ نومىرلەرى (ج س ن) كورسەتىلگەن.
كەيىن قارجى ۆيتسە-ءمينيسترى ەرجان ءبىرجانوۆ شەتەلدىك كوزدەردەن اقشا الىپ وتىرعان قازاقستاندىقتاردىڭ جەكە دەرەكتەرىن جاريالاۋ ماسەلەسىنە تۇسىنىك بەرگەن ەدى.