ا ق ش كەيبىر ءوتىنىش بەرۋشىلەر ءۇشىن 250 مىڭ دوللارعا دەيىن ۆيزالىق دەپوزيتتەر ەنگىزدى
استانا. KAZINFORM – ا ق ش جاڭا ۆيزالىق كەپىل باعدارلاماسىن ەنگىزىپ جاتىر، وعان سايكەس يمميگراتسيالىق ۆيزاعا كەيبىر ءوتىنىش بەرۋشىلەر 100 مىڭنان 250 مىڭ دوللارعا دەيىنگى كولەمدە دەپوزيت سالۋى ءتيىس، دەپ حابارلايدى Bloomberg Law.
پيلوتتىق جوبا باستاپقىدا دومينيكان رەسپۋبليكاسىنان كەلگەن ءوتىنىش بەرۋشىلەرگە قاتىستى قولدانىلادى. مەملەكەتتىك دەپارتامەنتتىڭ مالىمەتىنشە، كونسۋلدىق قىزمەتكەرلەر «قوعام ءۇشىن ماسىل» دەپ سانالعان جەكە تۇلعالاردان كەپىلدىك تالاپ ەتە الادى. كەپىلدىك سوماسى ءاربىر جاعدايعا جەكە انىقتالادى.
ا ق ش مەملەكەتتىك دەپارتامەنتىنىڭ وكىلى توممي پيگوتتتىڭ مالىمدەۋىنشە، «قۇراما شتاتتارىنا يمميگراتسيا - بۇل قۇقىق ەمەس، ارتىقشىلىق». ول باعدارلاما الەۋمەتتىك قاۋىپسىزدىك جەلىسىن قورعاۋعا باعىتتالعانىن جانە ءوتىنىش بەرۋشىلەردىڭ قوعامدىق كومەككە تاۋەلدىلىگىن باعالاۋ ەرەجەلەرىن قاتاڭداتاتىن ىشكى قاۋىپسىزدىك دەپارتامەنتىمەن بىرلەسىپ جۇزەگە اسىرىلىپ جاتقانىن قوستى.
جاڭا باعدارلاما ترامپ اكىمشىلىگى ەنگىزگەن باسقا شەكتەۋلەردى تولىقتىرىپ وتىر. ا ق ش مەملەكەتتىك دەپارتامەنتى بۇعان دەيىن «ۆ» كاتەگوريالى تۋريستىك جانە ىسكەرلىك ۆيزالارعا ءوتىنىش بەرگەن كەيبىر ادامدار ءۇشىن 20 مىڭ ا ق ش دوللارىنا دەيىنگى كەپىلدىك دەپوزيتىن تالاپ ەتەتىن ەرەجەلەر شىعارعان بولاتىن، ال 75 ەلدىڭ ازاماتتارىنا قاتىستى ءبىرقاتار يمميگراتسيالىق ۆيزالاردى بەرۋگە موراتوريي كۇشىندە قالادى.
