ا ق ش كوكپارشىلارى جەردەگى سەركەنى جاقسى ىلەدى ەكەن - قازاقستاندىق شاباندوز

استانا. KAZINFORM - دۇنيەجۇزىلىك كوشپەندىلەر ويىندارىنا باق سىناۋعا كەلگەن 9 ەلدىڭ كوكپارشىلارى «قازانات» يپپودرومىندا ونەر كورسەتىپ جاتىر.

امەريكالىق كوكپارشىلاردى 12:4 ەسەبىمەن ۇتقان قازاقستاندىق شاباندوزدار كەرەمەت ويىن ورنەگىمەن ەلدىڭ ىستىق ىقىلاسىنا بولەندى. ويىننان كەيىنگى اسەرىمەن بولىسكەن ق ر كوكپار قۇراما كومانداسىنىڭ ويىنشىسى ەرنات مالىمبايەۆ ا ق ش كوكپارشىلارىنىڭ ەرەكشەلىكتەرى تۋرالى ايتىپ بەردى.

«ا ق ش كوكپارشىلارى مەن ءساتتى ويىن وتكىزدىك. ءوزىم 1 سالىم سالدىم. ءبىز ءۇشىن قيىن بولمادى. دايىندىعىمىز جاقسى بۇيىرسا فينالدا جەڭىسكە جەتەمىز دەپ ويلايمىن. امەريكالىق كوكپارشىلار بۇل ويىندى ەندى ۇيرەنىپ جۇرسە دە جاقسى ويىن كورسەتە ءبىلدى. مەنىڭ بايقاعانىم، ا ق ش كوكپارشىلارى جەردەگى سەركەنى جاقسى ىلەدى، قيمىل-قوزعالىستارى تەز. ۇلتتىق ويىنىمىزدى ءتۇسىنىپ، توسەلىپ كەلە جاتقانىن بايقادىم»، - دەيدى شاباندوز.

ايتا كەتەيىك كەشە، ىرىكتەۋ كەزەڭىندە قازاقستاندىق كوكپارشىلار وزبەكستان قۇراما كومانداسىن 16:0 ەسەبىمەن ايقىن جەڭگەن ەدى.

اۆتور

ريزابەك نۇسىپبەك ۇلى