ا ق ش تاعى ەكى ەلدىڭ تاۋارلارىنا %25 كەدەندىك باج ەنگىزەدى
ۆاشينگتون. قازاقپارات - 1-تامىزدان باستاپ ا ق ش جاپونيا مەن وڭتۇستىك كورەيادان كەلەتىن يمپورتقا 25 پايىز مولشەرىندە كەدەندىك باج سالىعىن ەنگىزەدى، دەپ حابارلايدى ت ا س س.
بۇل تۋرالى ا ق ش پرەزيدەنتى دونالد ترامپ Truth Social جەلىسىندە جاپونيا مەن وڭتۇستىك كورەيا باسشىلارىنا جولداعان ۇندەۋىندە ءمالىم ەتتى. وندا بەلگىلەنگەن باج مولشەرلەمەلەرى ناقتىلانىپ كورسەتىلگەن.
سونىمەن قاتار، ترامپتىڭ جازباسىندا ەگەر توكيو مەن سەۋل ۆاشينگتونعا قارسى جاۋاپتىق باجدار ەنگىزەتىن بولسا، وندا ا ق ش ءوز كەزەگىندە جاپونيا مەن وڭتۇستىك كورەياعا قاتىستى تاريفتىك مولشەرلەمەلەرىن ودان ءارى ارتتىراتىنى اتاپ وتىلگەن. ياعني، ەنگىزىلەتىن جاڭا ستاۆكالار توكيو مەن سەۋل بەلگىلەيتىن مولشەرگە سايكەس ۇلعايتىلاتىن بولادى.
ەسكە سالايىق، بيىلعى 2- ساۋىردە ا ق ش پرەزيدەنتى دونالد ترامپ 185 ەلدەن، ونىڭ ىشىندە قازاقستاننان كەلەتىن يمپورتقا دا باج سالىعى ەنگىزىلەتىنىن مالىمدەگەن ەدى.
سول كۇنى-اق اق ءۇي بۇل باجداردىڭ ءبىر بولىگىن 90 كۇنگە كەيىنگە شەگەرەتىنىن حابارلادى. بۇل شەشىم ساۋدا كەلىسسوزدەرىن جۇرگىزۋگە ۋاقىت بەرۋ ماقساتىندا قابىلدانعان.
