ا ق ش پەن دانيا گرەنلاندياعا قاتىستى ورتاق كەلىسىمگە كەلدى - ترامپ

بۇل تۋرالى ا ق ش پرەزيدەنتى دونالد ترامپ الەۋمەتتىك جەلى ارقىلى مالىمدەگەن.

ترامپ Truth Social جەلىسىندەگى جازباسىندا ا ق ش- تىڭ رۇقساتىنسىز ارالدا امەريكالىق قارسىلاس ەلدەردىڭ ستراتەگيالىق ماڭىزى بار ينۆەستيتسيا جاساي المايتىنىن جانە كەلىسىمنىڭ قولدانىلۋ مەرزىمى شەكتەلمەيتىنىن ايتتى.

- ءبىز دانيا جانە گرەنلانديا وكىلدەرىمەن بىرگە ا ق ش- تىڭ گرەنلانديا مەن امەريكا قۇراما شتاتتارىنىڭ قاۋىپسىزدىگىن قامتاماسىز ەتۋ ءۇشىن ارالدا قاجەتتى شارالاردىڭ بارلىعىن جۇزەگە اسىرۋ مۇمكىندىگىن ماڭگىلىككە ساقتاپ قالۋىن قامتاماسىز ەتتىك، - دەپ جازدى ول.

بۇعان دەيىن Reuters ا ق ش پەن گرەنلانديا ارالداعى امەريكالىق اسكەري قاتىسۋدى كەڭەيتۋگە مۇمكىندىك بەرەتىن كەلىسىمگە جاقىنداعانىن حابارلاعان. بۇل ترامپتىڭ گرەنلانديانى ا ق ش قۇرامىنا قوسۋ تۋرالى جوسپارىن جۇزەگە اسىرۋدان الدەقايدا الىس قادام.

ترامپ كەلىسسوزدەردىڭ ناتيجەسىنە كوڭىلى تولاتىنىن ءبىلدىرىپ، ا ق ش جاقىن ارادا ارالداعى اسكەري قاتىسۋىن كەڭەيتەتىنىن ايتتى. قازىر گرەنلانديانىڭ سولتۇستىك-باتىسىندا ا ق ش عارىش كۇشتەرىنىڭ ءبىر بازاسى بار.

دانيا پرەمەر- ءمينيسترىنىڭ كەڭسەسى كەلىسىم سولتۇستىك اتلانتيكا مەن اركتيكاداعى قاۋىپسىزدىكتى كۇشەيتەتىنىن مالىمدەدى.

رۋبيو: كەلىسىم قاۋىپسىزدىك ماسەلەلەرىن شەشەدى

كەلىسىمنىڭ ناقتى قانداي جاڭا اسكەري نىسانداردى قامتيتىنى ازىرگە بەلگىسىز. ا ق ش 1951-جىلعى كەلىسىم نەگىزىندە گرەنلانديانىڭ اۋە كەڭىستىگىن پايدالانۋ جانە وندا اسكەري نىساندار ورنالاستىرۋ قۇقىعىنا يە.

دانيانىڭ اۆتونوميالىق اۋماعى سانالاتىن گرەنلانديادا كەلىسىمنىڭ قالاي قابىلداناتىنى دا بەلگىسىز. ارال تۇرعىندارى تاۋەلسىزدىككە ۇمتىلادى جانە ا ق ش- تىڭ ىقپالىن كۇشەيتۋ ارەكەتتەرىنە نارازىلىق ءبىلدىرىپ كەلەدى.

ا ق ش مەملەكەتتىك حاتشىسى ماركو رۋبيو كەلىسىم ۆاشينگتوننىڭ ارالعا قاتىستى ۇلتتىق قاۋىپسىزدىك ماسەلەلەرىن «تۇپكىلىكتى جانە تولىق» شەشەتىنىن ايتتى.

مەملەكەتتىك دەپارتامەنت وكىلىنىڭ سوزىنشە، كەلىسىم ناتوعا كىرمەيتىن ەلدەردىڭ گرەنلانديادا اسكەري بازا سالۋىنا تىيىم سالادى. ا ق ش پەن ونىڭ وداقتاستارىنا ستراتەگيالىق ماڭىزى بار ينۆەستيتسيالارعا رۇقسات بەرىلەدى.

سونداي-اق كەلىسىم ا ق ش- قا گرەنلاندياعا تۇراقتى تۇردە كىرۋ، وندا اسكەري بازا ورنالاستىرۋ جانە اۋە كەڭىستىگىن پايدالانۋ قۇقىقتارىن بەرەدى. بۇل ەرەجەلەر گرەنلانديا تاۋەلسىزدىك العان جاعدايدا دا كۇشىندە قالادى.

ايتا كەتەيىك، بۇنىڭ الدىندا ترامپ ا ق ش گرەنلانديانى باقىلاۋعا الۋى ءتيىس ەكەنىن تاعى مالىمدەگەن- ءدى.

ال جۋىردا عانا دانيا پرەمەر-مينيسترى مەتتە فرەدەريكسەن اركتيكا مەن گرەنلاندياعا قاتىستى ماسەلەلەر بويىنشا دانيا مەن ا ق ش بەيبىت ىنتىماقتاستىق ارقىلى ورتاق شەشىمگە كەلە الادى دەپ ءۇمىت بىلدىرگەن ەدى.