ا ق ش اكىمشىلىگىندەگى كەلىسپەۋشىلىكتەر ىسكە ترامپتى ارالاسۋعا ءماجبۇر ەتتى
استانا. KAZINFORM - پرەزيدەنت دونالد ترامپ يلون ماسك پەن مينيسترلەر كابينەتى اراسىنداعى كەلىسىمگە قول جەتكىزۋگە تىرىسىپ جاتىر. بۇل جەردە ۇكىمەت تيىمدىلىگىن ارتتىرۋ دەپارتامەنتى باسشىسىنىڭ ولاردىڭ ۆەدومستۆولارىنا ارالاسۋىنا بايلانىستى الاۋىزدىق كۇشەيىپ كەلەدى، دەپ حابارلايدى POLITICO.
ۆاشينگتوندا ماسك بيلىگىنە نارازىلىق بىرنەشە اپتا بويى كۇشەيىپ، شيەلەنىس مەملەكەتتىك حاتشى ماركو رۋبيو، كولىك ءمينيسترى شون داففي، قورعانىس ءمينيسترى پيت حەگسەت جانە ارداگەرلەر ىستەرى جونىندەگى حاتشى داگ كوللينز بەيسەنبىدە يلون ماسكتىڭ فەدەرالدىق اگەنتتىكتەر مەن شتات باعدارلاماسىنىڭ قىسقارۋىنا بايلانىستى الاڭداۋشىلىعىن بىلدىرگەن كەزدە ارتتى.
رۋبيو ونىڭ كومانداسى مەملەكەتتىك دەپارتامەنتتىڭ باقىلاۋىنداعى ا ق ش حالىقارالىق دامۋ اگەنتتىگىن تاراتقاننان كەيىن ماسكقا بىرنەشە اپتا بويى اشۋلانىپ ءجۇردى، دەپ جازدى News18.
ترامپ ءوز اكىمشىلىگىنىڭ جوعارى لاۋازىمدى مۇشەلەرىنە ماسكتىڭ دەپارتامەنتتەرگە ۇسىنىستار بەرۋگە قۇقىعى بار ەكەنىن، ءبىراق كادر نەمەسە ساياسات بويىنشا ءبىرجاقتى شەشىم قابىلدامايتىنىن ايتتى. پرەزيدەنت مالىمدەمەسى - ماسك وكىلەتتىگىن تارىلتۋداعى العاشقى ماڭىزدى قادام.
ۇكىمەت تيىمدىلىگى دەپارتامەنتىنىڭ باسشىسى ترامپتىڭ نۇسقاۋىمەن كەلىسەتىنىن راستادى.
اق ءۇي باسشىسى جۇما كۇنى سوپاق كەڭسەدە تىلشىلەر الدىندا سويلەگەن سوزىندە رۋبيو مەن ماسك «جاقسى ءتىل تابىسقانىن» جانە ولاردىڭ اراسىندا «ەشقانداي قايشىلىق جوق» ەكەنىن مالىمدەدى.
اق ءۇيدىڭ باسپا ءسوز حاتشىسى كەرولاين ليۆيتت ءوز مالىمدەمەسىندە «بارلىعى پرەزيدەنت ترامپقا ۇكىمەتىمىزدى تيىمدىرەك ەتۋ تۋرالى ۋادەسىن ورىنداۋعا كومەكتەسۋ ءۇشىن كوماندا بولىپ جۇمىس ىستەپ جۇرگەنىن» ايتتى.
بۇعان دەيىن يلون ماسك دونالد ترامپ ساياساتىنىڭ كەسىرىنەن بايلىعىنىڭ تورتتەن ءبىرىن جوعالتقانىن جازعان بولاتىنبىز.
