ا. ەلگەزەك: «مەنىڭ ولەڭىمدى مۇقاعالي اقىن جازعان دەپ وقيتىندار كوپ»
استانا. KAZINFORM - قازاق پوەزياسىندا وزىندىك ورنى بار، «دارىن» مەملەكەتتىك جاستار سىيلىعىنىڭ يەگەرى، قازاقستان جازۋشىلار وداعىنىڭ مۇشەسى، اقىن اقبەرەن ەلگەزەكتىڭ شىعارماشىلىعىمەن ادەبيەتسۇيەر قاۋىم جاقسى تانىس. وسىعان دەيىن بەس كىتابى جارىق كوردى.
«مەن نەگىزى ءتاپ- ءتاۋىر اقىن ەدىم، كەيىنگى كەزدە جازۋشى بولىپ كەتتىم» دەگەن اقبەرەن ەلگەزەك پروزاعا دا بەت بۇردى.
«بولماعان بالالىق شاق» اتتى پوۆەسى قازاق بەستسەللەرىنە اينالدى دەسەك، قاتەلەسپەيمىز. سەبەبى اقىننىڭ بالالىق شاعىنان جادىندا قالعان ەستەلىكتەرىن جاڭعىرتقان اتالمىش كىتاپتىڭ بۇگىندە وتىز مىڭعا جۋىق داناسى ساتىلعان.
«جاقسى وقىلعان، وقىرمان قاۋىم جىلى قابىلداعان كىتاپ بولدى» دەيدى اقىن.
ءدال وسى شىعارمانىڭ جەلىسى بويىنشا الماتى قالاسىنداعى عابيت مۇسىرەپوۆ اتىنداعى تەاتر باستاپ، بىرنەشە تەاتر سپەكتاكل قويىپ، قويىلىم ءالى كۇنگە دەيىن انشلاگپەن ءوتىپ جاتىر. ونىمەن قوسا، شاكەن ايمانوۆ اتىنداعى «قازاقفيلم» ۇلتتىق كينوستۋدياسى بيىل «بولماعان بالالىق شاق» اتتى فيلم ءتۇسىرۋدى قولعا الدى.
«جازۋشىلىعىمنان اقىندىعىم كوبىرەك ايتىلسا ەكەن» دەيتىن اقبەرەن ەلگەزەكتىڭ:
«سەنى ەشكىمگە بەرمەيمىن، سۇراماسىن،
سۇراماسىن جانىمنىڭ مۇناراسىن»، - دەيتىن ولەڭ جولدارىن مۇقاعالي ماقاتايەۆتىكى دەپ ويلايتىندار دا بار. اقىن تالاي رەت ولەڭىنىڭ اۆتورى مۇقاعالي ماقاتايەۆ دەپ جازىلىپ، ايتىلىپ جۇرگەنىن بىلەتىنىن جانە وعان ىشتەي قۋاناتىنىن جاسىرمادى.
كوپشىلىكتىڭ كوڭىلىنەن شىعىپ، «حيتكە» اينالعان «سۇيىكتى ەتشى»، «سەزىم ءۇشىن» سياقتى اندەردىڭ ءماتىنىن دە اقبەرەن ەلگەزەك جازعان.
شىعارماشىلىق ادامىنىڭ جانىن ءتۇسىنىپ، جازۋعا جاعداي جاسايتىن - جارى، بەلگىلى جۋرناليست دينا ەلگەزەك ەكەنىن ايتقان اقىن- جازۋشى اقبەرەن ەلگەزەك قازىر «مەن داردايمىن» دەگەن اتپەن جاڭا رومان جازىپ جاتقانىن جانە تاقىرىپ تۇرعىسىنان بۇل رومان قازاق ادەبيەتىندە جاڭالىق بولاتىنىن ايتتى.
جاڭا روماننىڭ وقىرمانى كوپ بولسىن دەگەن تىلەك ايتامىز.
