ا. ايماعامبەتوۆ انگليادا قۇلپىناي تەرىپ جۇرگەن وتانداستارىمىزدىڭ قۇقىعىن قورعاۋدى كوتەردى
استانا. KAZINFORM - قازاقستان ازاماتتارى جۇمىس ىستەيتىن بارلىق مەملەكەتپەن، ولاردىڭ قۇقىقتارىن قورعاۋ بويىنشا كەلىسىمدەر جاسالۋى كەرەك. بۇل تۋرالى ءماجىلىس دەپۋتاتى اسحات ايماعامبەتوۆ ايتتى.
«ەڭبەك نارىعى دەگەندە ميگرانتتار فاكتورى دا ماڭىزدى. رەلوكانتتاردى ايتپاعاندا، ەڭبەك ميگراتسياسىنىڭ ءوسۋى - جاھاندىق ترەندتەردىڭ كورىنىسى. ءبىراق ءبىز ەڭبەك ميگراتسياسىن باسقارۋىمىز كەرەك، الايدا ءقازىر ەش ستراتەگيا كورىنبەيدى»، - دەدى ا. ايماعامبەتوۆ ماجىلىستە «قازاقستاننىڭ ەڭبەك نارىعىن دامىتۋ جانە كادرلىق الەۋەتىن نىعايتۋ» اتتى ۇكىمەت ساعاتىندا.
وعان قوسا، دەپۋتات باسقا ەلدەرگە جۇمىسقا شىعاتىن ازاماتتاردىڭ قۇقىقتارىمەن جەتكىلىكتى دەڭگەيدە اينالىسپايتىنىن ايتۋدا.
«الىسقا بارماي-اق، ەۋرازيالىق ەكونوميكالىق وداققا ەنەتىن ەلدەردى الايىق. ءارتۇرلى مالىمەت بويىنشا، وسى وداقتا شامامەن 200 مىڭ قازاقستاندىق جۇمىس ىستەپ ءجۇر. بۇل ءىس جۇزىندە ءبۇتىن ءبىر سالامەن تەڭ. كوپتەگەن وتانداستارىمىز وڭتۇستىك كورەيادا ەڭبەك ەتۋدە، ول ازداي سوڭعى كەزدەرى انگليادا قۇلپىناي تەرىپ جۇرگەن ازاماتتار كوبەيدى. ولاردىڭ سانى قانشا جانە بۇل فاكتورلار ءبىزدىڭ جۇمىسپەن قامتۋ ستاتيستيكاسىندا جانە باستى ساياساتتا ەسكەرىلە مە - ونى بىلمەيمىز.
ءبىزدىڭ ەلدىڭ ازاماتتارى جۇمىس ىستەيتىن بارلىق مەملەكەتپەن، ءتىپتى ءبىر عانا وتانداسىمىز جۇمىس ىستەيتىن بولسا دا، ولاردىڭ قۇقىقتارىن قورعاۋ بويىنشا كەلىسىمدەر جاسالۋى كەرەك»، - دەدى ا. ايماعامبەتوۆ.
بۇعان دەيىن ءماجىلىس دەپۋتاتى ەلدەگى جۇمىسپەن قامتۋ شارالارىنىڭ ءتيىمدى بولماعانىن سىناعان ەدى.
اۆتور
ايجان سەرىكجان قىزى
