سولتۇستىك قازاقستاننىڭ ءۇش تۇرعىنى الاياقتارعا الدانىپ، 9 ميلليون تەڭگەسىنەن ايىرىلدى
س ق و پروكۋراتۋراسى تۇرعىنداردى الاياقتاردىڭ «ءسىزدىڭ تۋىسىڭىز اپاتقا ۇشىرادى» سحەماسىن ءجيى قولداناتىنى تۋرالى ەسكەرتەدى.
بۇل ءتاسىل نەگىزىنەن ەگدە جاستاعى ادامداردى الداۋعا باعىتتالعان، «بانكتەردەن قوڭىراۋلار» سياقتى مۇندا دا الاياقتار توپ بولىپ ارەكەت ەتەدى.
ۆەدومستۆونىڭ مالىمەتىنشە، وتكەن دەمالىس كۇندەرى ءوڭىردىڭ ءۇش تۇرعىنى وسىنداي سحەمامەن 9 ميلليون تەڭگەگە الدانىپ قالعان.
پەتروپاۆلدىڭ 67 جاستاعى تۇرعىنىنا بەلگىسىز ايەل قوڭىراۋ شالىپ، ءوزىن پوليتسيا قىزمەتكەرى رەتىندە تانىستىرعان جانە قىزىنىڭ كىناسىنەن جول- كولىك وقيعاسى بولىپ، ادام زارداپ شەككەنىن حابارلاعان.
سودان كەيىن «جالعان پوليتسەي» بۇل ماسەلەنى شەشىپ، جىلى جاۋىپ قويۋ ءۇشىن جابىرلەنۋشىگە 5 ميلليون تەڭگە تولەۋ قاجەتتىگىن ايتقان.
تۇتقانىڭ ار جاعىنداعى بەيتانىسقا سەنگەن قالا تۇرعىنى 3 ميلليون تەڭگە سومانى اۋدارعان.
تەك كەيىن ول قىزىمەن حابارلاسىپ، ءبارى جاقسى ەكەندىگىن جانە ونىڭ ەشقانداي جول- كولىك وقيعاسىنا تۇسپەگەنىن بىلەدى.
«ەگەر بەلگىسىز ادام قوڭىراۋ شالىپ، ءوزىن قۇقىق قورعاۋ ورگاندارىنىڭ قىزمەتكەرى رەتىندە تانىستىرسا جانە ءسىزدىڭ تۋىسىڭىز قيىندىققا تاپ بولعانىن حابارلاسا قانداي دا ءبىر ارەكەت جاساماس بۇرىن، تەلەفوندى قويىپ، ءوزىڭىزدىڭ تۋىسىڭىزبەن بايلانىسۋعا تىرىسىڭىز. «102» نەمەسە «49-39-49» تەلەفون نومىرىنە قوڭىراۋ شالىڭىز. تانىس ەمەس ادامداردان تۇسكەن قوڭىراۋلارعا سەنبەڭىز. الاياقتارعا اقشا مەن پارولدەردى بەرمەڭىز. اقپاراتتى تەكسەرىڭىز. رەسمي ۇيىمدارعا قوڭىراۋ شالىڭىز جانە مۇنداي قىزمەتكەرلەردىڭ شىنىمەن جۇمىس ىستەيتىنىن تەكسەرىڭىز»، - دەيدى پروكۋراتۋرا وكىلدەرى.
جىل باسىنان بەرى قۇقىق قورعاۋ ورگاندارىنا الاياقتىق تۋرالى ارىزبەن 315 ادام جۇگىنىپ، 672 ميلليون تەڭگەگە الدانعان.
