پەتروپاۆلداعى جارىلىس: دارىگەرلەر زارداپ شەككەن 9 ادامنىڭ جاعدايى تۋرالى ايتتى

پەتروپاۆلدا 17-قاراشا كۇنى كولىك جوندەۋ ستانسالارىنىڭ بىرىندە جارىلىس بولىپ، ارتى ورتكە ۇلاستى. الدىن الا بولجام بويىنشا، ستانساداعى كولىكتەردىڭ بىرىندە تۇرعان گاز قوندىرعىسى جارىلعان. سالدارىنان 9 ادام جاراقات الدى.

سولتۇستىك قازاقستان وبلىسى دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، زارداپ شەككەندەردىڭ بەسەۋى اۋرۋحاناعا جاتقىزىلدى، ۇشەۋىنە العاشقى مەديتسينالىق كومەك كورسەتىلىپ، امبۋلاتوريالىق ەم الۋعا ۇيىنە جىبەرىلدى، بىرەۋى اۋرۋحاناعا جاتۋعا باس تارتقان.

«جاراقاتتانعانداردىڭ بارلىعى ەر ادام. جاستارى 50 مەن 24 ارالىعىندا. ءتورت ادام جاراقات بولىمشەسىنە جاتقىزىلدى. ولاردىڭ بەتى، ەكى قولى، يىعى، ەندى ءبىرىنىڭ اياعى مەن بەلىن كۇيىك شالعان. 50 استاعى ەر ادام جاق-بەت حيرۋرگياسى بولىمشەسىنە ورنالاستىرىلدى. 46، 30 جانە 26 جاستاعى ءۇش سىرقات ۇيىنە ەمدەلۋگە جىبەرىلدى. بۇل ادامداردا دا جاراقات ۇقساس، بەتتەرى مەن قولدارى كۇيىپ قالعان. ال 33 جاستاعى ەر ادامنىڭ بەتى-قولىنان بولەك قۇلاقتارىن دا كۇيىك شالعان، الايدا ول اۋرۋحاناعا جاتىپ ەمدەلۋدەن باس تارتتى»، - دەدى باسپا ءسوز حاتشىسى گۇلنار قاليەۆا.