كولىك رۋلىنە وتىرعان جاسوسپىرىمدەردىڭ كەسىرىنەن 9 ادام قازا تاپتى
بۇل تۋرالى ق ر ىشكى ىستەر مينيسترلىگى باسپا ءسوز قىزمەتىنىڭ وكىلى شۇعىلا تۇرلىبەك ايتتى، دەپ حابارلايدى قازاقپارات ءتىلشىسى.
«ىشكى ىستەر مينيسترلىگى جولداعى بالالاردىڭ قاۋىپسىزدىگىنە ەرەكشە نازار اۋدارادى. ءتۇسىندىرۋ جۇمىستارىنا قاراماستان اپاتقا بالالار سەبەپ بولعان جول- كولىك وقيعالارىنا تاپ بولىپ وتىرمىز. اتا- انالار قاۋىپسىزدىكتى ويلاماستان بالالارعا كولىكتىڭ كىلتىن ءجيى بەرە سالادى. بۇل فاكتى كامەلەتكە تولماعان جاسوسپىرىمنىڭ دە، جول قوزعالىسىنىڭ وزگە قاتىسۋشىلارىنىڭ دا ومىرىنە قاۋىپ توندىرەدى. جىل باسىنان بەرى ەلىمىزدە جاسوسپىرىمدەردىڭ رۋلگە وتىرۋمەن بايلانىستى 70-كە جۋىق جول- كولىك وقيعاسى تىركەلدى. سونىڭ سالدارىنان 9 ادام قازا تاۋىپ، 80-نەن استام جاراقاتتاندى»، - دەدى شۇعىلا تۇرلىبەك ۆەدومستۆونىڭ باسپا ءسوز الاڭىندا وتكەن بريفينگتە.
ونىڭ دەرەگىنشە، اتىراۋ وبلىسىندا، جاستالاپ اۋىلىنىڭ ماڭىنداعى جولدا «تويوتا» كولىگىن باسقارعان 14 جاستاعى جاسوسپىرىم رۋلگە يە بولا الماي قالىپ، اۋدارىلعان. سالدارىنان بالا قايتىس بولىپ، قاسىندا وتىرعان 4 جاسوسپىرىم اۋرۋحاناعا ءتۇستى.
«وسىعان بايلانىستى ىشكى ىستەر مينيسترلىگى مۇنداي ارەكەتى ءۇشىن ەرەسەكتەر جاۋاپكەرشىلىككە تارتىلاتىندىعىن ەسكەرتەدى»، - دەدى ول.
اۆتور
مارلان جيەمباي
