الماتى وبلىسىندا قوجايىن جۇمىسشىسىن كولىكپەن سوعىپ، 9 قابىرعاسىن سىندىرعان
قازىر مالشى اۋرۋحانادا جاتىر، دەپ حابارلايدى قازاقپارات ءتىلشىسى.
الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 2-مامىر كۇنى اۋرۋحاناعا اۋىر دەنە جاراقاتىمەن 44 جاستاعى ەر ادام تۇسكەنى جونىندە حابارلاما كەلگەن. انىقتالعانداي، ازاماتتى قوجايىنى سوققان. ال تاياق جەگەن ادام ونىڭ مالىن باققان. وقيعا اقسۋ اۋدانىندا بولعان. «قازىر كۇدىكتى ۇستالدى. ول - تالدىقورعاننىڭ 43 جاستاعى تۇرعىنى. ونىڭ كولىگى دە تاركىلەندى. مەديتسينالىق تەكسەرۋ كەزىندە كۇدىكتىنىڭ جەڭىل تۇردە ىشىمدىك ىشكەنى انىقتالدى. قازىر ونىڭ ۇستىنەن ق ر ق ك 106-بابى، ياعني قاساقانا دەنساۋلىققا زيان كەلتىرۋ بويىنشا ءىس قوزعالىپ، تەرگەۋ ءجۇرىپ جاتىر»، - دەلىنگەن اتالعان ۆەدومستۆونىڭ حابارلاماسىندا.
ايتا كەتەيىك، مالشى مەن جۇمىسشى ءوزارا سوزگە كەلىپ، جانجالداسىپ قالعان. ارتىنشا، مالشى ەكى كىشكەنتاي كامەلەتكە تولماعان بالاسىن جانە جولداسىن الىپ، قوجالىقتان كەتپەكشى بولعان. ءبىراق جۇمىس بەرۋشى «Lexus 470» كولىگىمەن قاعىپ، بالالاردىڭ كوزىنشە سوققىعا جىققان.
«قازىر كولىك تاركىلەندى. كۇدىكتى قاماۋدا وتىر»، - دەپ تولىقتىردى اتالعان ۆەدومستۆونىڭ باسپا ءسوز قىزمەتىنەن.
اۆتور: سامال قابىشەۆا
