قارجى پيراميداسى قازاقستاندىقتاردىڭ 9 ميلليارد تەڭگەدەن استام قاراجاتىن يەمدەنگەن
بۇل تۋرالى ق ر ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.
«قازاقستان مەن رەسەي ازاماتتارىنان تۇراتىن Gold Company LTD قارجى پيراميداسىن ۇيىمداستىرۋشى قىلمىستىق توپقا قاتىستى ءىستى تەرگەۋ ناتيجەلەرىن جەتكىزگىم كەلدى. ولار ءبىزدىڭ ازاماتتارىمىزعا ينتەرنەتتەگى ويدان شىعارىلعان ينۆەستيتسيالىق جوبالاردان جوعارى پايدا تابۋعا ۋادە بەرىپ، 9 ميلليارد تەڭگەدەن استام قاراجاتىن يەمدەنگەن»، - دەدى سانجار ءادىلوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا. ونىڭ دەرەگىنشە، كىنالىلەردىڭ قىلمىستىق ارەكەتتەرىنەن 4 مىڭنان استام ازامات زارداپ شەكتى.
«اتالعان قارجى پيراميداسىنىڭ قىزمەتىنە اقتوبە وبلىسىنىڭ پوليتسيا دەپارتامەنتى توسقاۋىل قويدى. قازىرگى ۋاقىتتا ءىس سوتتا»، - دەدى دەپارتامەنت باستىعى.
ايتا كەتەيىك، 2020 -جىلدىڭ قاراشا ايىندا Gold company LTD ج ش س ۇيىمداستىرۋشىلارىنا قاتىستى قىلمىستىق ءىستى تەرگەۋ اياقتالعانى حابارلانعان بولاتىن. سول كەزدە اتالعان قارجى پيراميداسىنان 2,5 مىڭنان استام ازامات زارداپ شەككەنى، كەلتىرىلگەن شىعىن مولشەرى 1,5 ميلليارد تەڭگەدەن اسقانى ايتىلعان ەدى.
اۆتور: مارلان جيەمباي
