تاماققا تۇزدى كوپ قولداناتىنىڭىزدى كورسەتەتىن 9 بەلگى

نۇر-سۇلتان. قازاقپارات - تۇز - ماڭىزدى اسپازدىق قۇراۋىش. ءبىراق ونى كوپ جەۋ جانە ودان مۇلدەم باس تارتۋ اعزادا ءتۇرلى پروبلەمالاردىڭ دامۋىنا اكەلۋى مۇمكىن.

تۇزدى كوپ جەيتىنىڭىزدى زەرتحانالىق اناليزدەر ناتيجەسىنەن عانا ەمەس، اعزاداعى بەلگىلەردەن دە انىقتاۋعا بولادى.

ءىسىنۋ

تۇزدى كوپ جەۋ تىندەردە سۇيىقتىقتىڭ تۇرىپ قالۋىنا اكەلەدى، ال ول ءىسىنۋ تۇرىندە پايدا بولادى. ءجيى توبىق، ساۋساقتار، بەت جانە كوزدىڭ استى ىسەدى. الايدا ءىسىنۋ تۇزدى ارتىق جەۋدىڭ بەلگىسى عانا ەمەس. اعزاعا اقۋىز جەتىسپەسە نەمەسە ادام سپورتپەن قارقىندى شۇعىلدانسا، ءىسىنۋ پايدا بولۋى مۇمكىن.

بۇيرەكتەردىڭ اۋىرۋى

تۇزدى تاعامدى كوپ جەۋ نەسەپ - تاس اۋرۋىنىڭ جانە باسقا دا بۇيرەك اۋرۋلارىنىڭ دامۋىنا اكەلۋى مۇمكىن. ەگەر راتسيونىڭىزدا تۇزدى، قاقتالعان جانە مارينادتالعان تاعامدار كوپ بولسا، تاماقتانۋىڭىزعا تۇزەتۋلەر ەنگىزگەن ءجون. ايتپەسە، زاردە تۇزدى كريستالدار پايدا بولۋى، زات الماسۋ جۇيەسى جۇمىسى ناشارلاۋى جانە قىشقىلدى-سىلتىلىك تەپە-تەڭدىكتىڭ بۇزىلۋى مۇمكىن.

جوعارى قان قىسىمى

تۇزدى ارتىق تۇتىنۋ ارتەريالىق قىسىمنىڭ بىردەن ارتۋىنا ىقپال ەتەدى. سەبەبى تۇزدىڭ قۇرامىندا كوپ مولشەردە بولاتىن ناتريي اعزادا ارتىق سۋدى ۇستاپ تۇرادى. ول ءوز كەزەگىندە جۇرەككە تۇسەتىن كۇشتى ارتتىرادى. بۇل جاعدايدا پروبلەمانى بارىنشا تەز بايقاپ، تۇزدىڭ تاۋلىكتىك نورماسىن ازايتۋ كەرەك. ايتپەسە، جوعارى ارتەريالىق قىسىم سوزىلمالى تۇرگە اينالىپ كەتەدى.

اۋىزدىڭ قۇرعاۋى جانە شولدەۋ

بۇل بەلگىلەر دە تۇزدى كوپ جەيتىنىڭىزدى ءبىلدىرۋى مۇمكىن. قانداعى ناتريدىڭ جوعارى دەڭگەيىن تەڭەلتۋ ءۇشىن دەنە سۋدى جاسۋشالاردان سورىپ الادى. ناتيجەسىندە، شولدەي بەرەسىز جانە اۋزىڭىز قۇرعاي باستايدى. ەگەر ءبىر ستاقان سۋ ىشسەڭىز دە، اۋزىڭىزدىڭ قۇرعاۋى كەتپەسە، سۋ-تۇزدى تەپە-تەڭدىكتىڭ بۇزىلۋىمەن بايلانىستى پروبلەما بولۋى مۇمكىن. ۇنەمى شولدەي بەرۋ سونداي-اق قانت ديابەتى، انەميا، كۋشينگ سيندرومى سەكىلدى اۋرۋلاردىڭ دا بەلگىسى بولا الادى.

دارەتحاناعا ءجيى بارۋ

شولدەي بەرگەسىن سۋدى كوپ ىشەسىز. سايكەسىنشە، نەسەپ شىعۋ جيىلىگى ارتادى. تىندەردە كوپ ناتري جينالىپ قالعان كەزدە بۇيرەكتەر اعزاداعى حيميالىق ەلەمەنتتىڭ قالدىقتارىن بارىنشا جىلدام شىعارۋعا تىرىسادى. بۇيرەكتەرگە ارتىق كۇش ءتۇسۋ دەنساۋلىققا زيانىن تيگىزەدى.

ءىشتىڭ كەبۋى

تۇز ىشەكتەردە قايتا وڭدەلمەگەن تاماق بولىكتەرىنىڭ جينالۋىنا ىقپال ەتەدى. ونى ارتىق جەۋ ءىش كەبۋىنە جانە اسقازان-ىشەك جولدارى جۇمىسىنىڭ پروبلەماسىنا اكەلۋى مۇمكىن. جينالىپ قالعان تاماق بولىكتەرى ۋاقىت وتە ءشىرىپ، گاز كوپىرشىكتەرىن تۇزەدى. بۇل پروبلەمانى جەڭۋ ءۇشىن تۇز مولشەرىن ازايتىپ، از-ازدان، ءبىراق ءجيى تاماقتانۋ كەرەك.

كوكىرەك قۋىسىنىڭ اۋىرۋى

ءالسىن-ءالسىن كەۋدە تۇسىنىڭ اۋىرۋى تۇزدى ازايتۋ كەرەگىن ءبىلدىرۋى مۇمكىن. سەبەبى كوپ مولشەردەگى ناتري قان تامىرلاردى بۇزادى. ارتەريالارداعى بۇزىلۋلار گيپەرتونيا مەن ينسۋلتتىڭ پايدا بولۋىنا ىقپال ەتۋى مۇمكىن جانە جۇرەك- قان تامىرلار اۋرۋلارىنىڭ دامۋ قاۋپىن ارتتىرادى.

زەيىن قويۋدىڭ ناشارلاۋى

زەيىن قويۋدىڭ جانە ەستە ساقتاۋدىڭ ناشارلاۋى، اشۋلانشاقتىق، كۇندىزگى ۇيقىشىلدىق — بۇل جاعىمسىز وزگەرىستەر تۇزدى كوپ جەۋدىڭ سەبەبىنەن پايدا بولۋى مۇمكىن. ەگەر سوڭعى كەزدەرى زاتتارىڭىزدى جوعالتىپ، ۇساق-تۇيەكتىڭ بارىنە اشۋلانا بەرسەڭىز، راتسيونىڭىزدى رەتتەپ، ءومىر ءسۇرۋ سالتىڭىزدى تۇزەتىپ كورىڭىز. فاستفۋد پەن تۇزدى تاعامدى ازايتىپ، ءجيى سەرۋەندەۋدى جانە سپورتپەن اينالىسۋدى قولعا الىڭىز.

تاماقتىڭ تۇزسىز كورىنۋى

تاماقتىڭ ءدامىن كورمەي جاتىپ، تۇز سالعىڭىز كەلىپ تۇرسا نەمەسە تۇزدى بىردەڭە قوسىپ جەگىڭىز كەلە بەرسە، ءوزىڭىزدى تۇزعا ۇيرەتىپ العانىڭىزدى كورسەتەدى. مۇنداي تاۋەلدىلىكپەن كۇرەسۋ باستاپقىدا قيىن بولادى. زيانى از دامدەۋىشتەردى قولدانىپ، تۇزدى بارىنشا ازايتۋعا تىرىسىڭىز. ۋاقىت وتە كوكونىستەر مەن باسقا ونىمدەردىڭ نەگىزگى ءدامىن سەزۋگە تۇز كەدەرگى كەلتىرگەنىن تۇسىنەسىز.

massaget.kz