قازاقپارات كۇنتىزبەسى: 9- ءساۋىر
ەستە قالار وقيعالار
1999-جىلى باكۋدە «كيتابي دەدە گوركۋد» ازەربايجان ەپوسىنىڭ 1300 جىلدىعىنا ارنالعان تۇركىتىلدەس بەس مەملەكەت باسشىلارىنىڭ سامميتى ءوتتى.
وندا ق ر پرەزيدەنتى نۇرسۇلتان نازاربايەۆقا «دەدە گوركۋد - ۇلى جول» - دوستاستىق قوعامى لاۋرەاتتارىنىڭ جوعارى اتاعى بەرىلدى.
2010-جىلى الماتىدا5572№ اسكەري بولىمىندە تاجىك-اۋعان شەكاراسىندا قازا تاپقان ىشكى اسكەر جاۋىنگەرلەرىنە ارنالعان ەسكەرتكىش اللەياسى اشىلدى.
1995-جىلى 7- ءساۋىر كۇنى تاجىكستان تاۋلارىندا اسكەري قىزمەت بابىنداعى قازاقستاننىڭ ىشكى اسكەر روتاسى تۇتقيىلدان تاپ بەرگەن لاڭكەستەردىڭ شابۋىلىنا ۇشىراعان بولاتىن. ولاردىڭ قازاقستاندىق روتانى جويۋعا قاتىستى جوسپارى ىسكە اسپاي، كەرىسىنشە كەرى شەگىنۋلەرىنە تۋرا كەلگەن.
الايدا شايقاس 17 جاۋىنگەردىڭ ءومىرىن قيىپ كەتتى. بۇل كۇن قازاقستان رەسپۋبليكاسى ىشكى ىستەر مينيسترلىگىنىڭ ىشكى اسكەر بولىمىندە باتىرلاردى ەسكە الۋ كۇنى بولىپ سانالادى.
2013-جىلى بىشكەكتە قازاق ادەبيەتىنىڭ كلاسسيگى مۇحتار اۋەزوۆكە ارنالعان مەموريالدىق تاقتا سالتاناتتى تۇردە اشىلدى.
2016-جىلى قازاقستان ۇلتتىق كىتاپحاناسىندا قۇران كارىمگە تۇسىنىك بەرەتىن - «قۇران ءتاپسىرى» قولجازباسى تابىلعان. كەمبريدج ۋنيۆەرسيتەتىندە پارسى زەرتتەۋلەرىنىڭ جەتەكشىسى، پروفەسسور فيرۋزا مەلۆيللدىڭ پىكىرىنشە، بۇل قولجازبا عىلىم الەمىندەگى ناعىز سەنساتسياعا اينالۋى مۇمكىن.
2017-جىلى قازاقستاندىق ءانشى ديماش قۇدايبەرگەن قىتايدىڭ شىنجىن قالاسىندا وتكەن «17th Top China Music Awards» شاراسىندا «حالىقارالىق دارەجەدەگى تانىمال ءانشى» نوميناتسياسى بويىنشا ماراپاتتالدى.
2018-جىلى جۇزۋدەن يسپانيا اشىق چەمپيوناتىنىڭ ەكىنشى كۇنى وليمپيادا چەمپيونى، قازاقستاندىق دميتريي بالاندين 200 مەترگە براسس ادىسىمەن ءجۇزۋ جارىسىندا التىن مەدالدى جەڭىپ الدى. بالاندين جەڭىسكە جەتۋمەن قاتار، 2:09:31 ناتيجەسىمەن وسى قاشىقتىقتا يسپانيا چەمپيوناتىنىڭ رەكوردىن ورناتتى.
2019-جىلى رەسپۋبليكالىق تەلەارنالار ەفيرىنەن قازاقستان پرەزيدەنتى قاسىم-جومارت توقايەۆ نۇر-سۇلتان ۋاقىتىمەن 13.00 دە ەل ازاماتتارىنا ۇندەۋ جولدادى. وندا مەملەكەت باسشىسى 2019-جىلدىڭ 9- ماۋسىمىندا كەزەكتەن تىس قازاقستان رەسپۋبليكاسى پرەزيدەنتىن سايلاۋ وتەتىنىن مالىمدەدى.
2021-جىلى قازاقستاندا ساياسي قۋعىن-سۇرگىن ماسەلەلەرى جونىندەگى مامانداندىرىلعان مۇراعات قورى قۇرىلدى، وندا ساياسي قۋعىن-سۇرگىن قۇرباندارىنا قاتىستى مىڭنان استام مۇراعات ىستەرى ساقتالادى.
