د د ۇ: الەمدە كوروناۆيرۋستان ءولىم دەڭگەيى 9 پايىز قىسقاردى
دۇنيەجۇزىلىك دەنساۋلىق ساقتاۋ ۇيىمى (ددۇ) تاراتقان مالىمەتكە ساي، ۆيرۋس جۇقتىرۋ جاڭا وقيعالارىنىڭ سانى الدىڭعى اپتامەن سالىستىرعاندا 2 پايىز، ال ودان بولعان ءولىم وقيعالارى - 9 پايىز قىسقاردى، دەپ حابارلايدى قازاقپارات.
د د ۇ- نىڭ اپتا سايىنعى ەپيدەميولوگيالىق بيۋللەتەنىندە كەلتىرىلگەن ستاتيستيكالىق مالىمەت بويىنشا، 13-19 جەلتوقسان ارالىعىندا قاۋىپتى ۆيرۋس جۇقتىرعان 4177622 ادام انىقتالىپ، 44616 ءولىم وقيعاسى انىقتالدى. بۇل الدىڭعى اپتاعا قاراعاندا تيىسىنشە 2 جانە 9 پايىز از. سونىمەن بىرگە، افريكادا كوروناۆيرۋس جۇقتىرۋدىڭ (53 پايىز) جانە ودان بولعان ءولىم وقيعالارى سانىنىڭ (15 پايىز) ايتارلىقتاي ءوسىمى تىركەلدى.
افريكادان باسقا، اۋرۋ جۇقتىرۋ دەڭگەيى باتىس- تىنىق مۇحيتى ايماعىندا دا وسكەن (12 پايىز). قاۋىپتى ۆيرۋسكە شالدىعۋ وقيعالارىنىڭ 63 پايىزى ەۋروپادا تىركەلگەن، ال ودان بولعان ءولىم وقيعالارى 60 پايىزدى قۇراپ وتىر. سونىمەن بىرگە، وندا اۋرۋ جۇقتىرۋ دەڭگەيى 3 پايىز، ال ءولىم- ءجىتىم دەڭگەيى - 7 پايىز قىسقارعان. امەريكادا كوروناۆيرۋس جۇقتىرۋ جاڭا وقيعالارىنىڭ سانى 10 پايىز، ال وڭتۇستىك- شىعىس جانە شىعىس جەرورتا تەڭىزى ايماعىندا - 12 پايىز قىسقاردى.
