ماگيسترانتتار مەن دوكتورانتتاردىڭ % 9 عانا ءومىرىن عىلىمعا ارناۋدا - سەنات سپيكەرى
نۇر- سۇلتان. قازاقپارات - ماگيستراتۋرا مەن دوكتورانتۋرادا ءبىلىمىن جالعاستىرعان جاستاردىڭ 9 پايىزى عانا وقۋدان كەيىن عىلىمي قىزمەتپەن اينالىسادى.
«تاۋەلسىزدىك ۇرپاقتارى» اتتى رەسپۋبليكالىق جاستار فورۋمىندا ءسوز سويلەگەن ق ر پالامەنتى سەناتىنىڭ ءتوراعاسى ماۋلەن اشىمبايەۆ وسىنداي ستاتيستيكا كەلتىردى، دەپ حابارلايدى قازاقپارات ءتىلشىسى.
«ەكىنشىدەن، تۇتىنۋشىلىق يدەولوگياسىنان باس تارتۋ قاجەت. پاندەمياعا دەيىن تۇتىنۋ مادەنيەتى بۇرىن- سوڭدى بولماعان دەڭگەيگە جەتتى. ءتىپتى تۇتىنۋ ومىردەگى ەڭ باستى ماقساتقا اينالدى دەسەك تە ارتىق بولا قويماس. جاستار اراسىندا دا وسىنداي ءۇردىس قالىپتاسقانى جاسىرىن ەمەس. تولاسسىز تۇتىنۋ توقىراۋعا، قۇندىلىقتاردىڭ قۇلدىراۋىنا اكەلىپ سوعادى. سوندىقتان دۇرىس قۇندىلىقتاردى قالىپتاستىرۋىمىز وتە ماڭىزدى. ول ءۇشىن جاناشىرلىق، جاۋاپكەرشىلىك، سابىر، مەيىرىم سياقتى ادامگەرشىلىك قاسيەتتەردى كەڭىنەن دارىپتەگەن ءجون. بۇل رەتتە رۋحاني كەمەلدىككە، اباي اتامىز ايتقان تولىق ادام بولۋعا ۇمتىلۋدىڭ ماڭىزى زور»، - دەدى سەنات ءتوراعاسى.
سپيكەر جاستاردى «ءبىرىنشى بايلىق - دەنساۋلىق» دەگەن ۇستانىمعا بەرىك بولۋعا شاقىردى.
«كوروناۆيرۋس ىندەتى كەزىندە دەنساۋلىقتىڭ قادىرىن جەتە تۇسىندىك. سوندىقتان سالاماتتى ءومىر سالتىن ۇستانۋ اسا ماڭىزدى. جاستاردىڭ گادجەتتەرگە ۇڭىلە بەرمەي، سپورتپەن شۇعىلدانۋعا باسىمدىق بەرۋى دە وتە وزەكتى. سپورتپەن شۇعىلدانۋ، دۇرىس تاماقتانۋ، تازا اۋادا ءجيى بولۋ، دەمالىس جانە رەجيمىن ساقتاۋ - دەنساۋلىقتىڭ نەگىزگى فاكتورلارى. سونىمەن قاتار، بۇل قاعيدالار قازىرگى تاڭدا جەتىستىككە جەتۋدىڭ ماڭىزدى شارتى. جالپى دەنساۋلىقتى ساقتاۋ، سالاماتتى ءومىر سالتىن ۇستانۋ - ادامنىڭ ءوز بولاشاعىنا سالعان ەڭ باستى ينۆەستيتسياسى»، - دەگەن ماۋلەن اشىمبايەۆ، كەلەشەكتە ءبىلىم مەن عىلىمنىڭ، تەحنولوگيالاردىڭ ءرولى قازىرگىدەن دە ارتاتىنىن ەسكەرتتى.
«پاندەميا جاعدايى عىلىمنىڭ قانشالىقتى ماڭىزدى ەكەنىن دالەلدەدى. بۇرىن- سوڭدى بولماعان جىلدامدىقپەن ۆاكسينالار ويلاپ تابىلدى. بۇل ءوز كەزەگىندە ىندەتتى سالىستىرمالى تۇردە جەدەل ەڭسەرۋگە مۇمكىندىك بەردى. جالپى العاندا، كۇندلەلىكتى ومىرىمىزدە عىلىمنىڭ ءرولى ارتىپ كەلەدى. كەيىنگى بەس جىلدا ەلىمىزدە ماگيستراتۋرا مەن دوكتورانتۋرادا ءبىلىمىن جالعاستىرعىسى كەلەتىن جاستار سانى ءوسىپ وتىر. الايدا ولاردىڭ 9 پايىزى عانا وقۋدان كەيىن عىلىمي قىزمەتپەن اينالىسادى. مەملەكەت عىلىمدى جانە جاس عالىمداردى جۇيەلى تۇردە قارجىلاندىرىپ، قولداۋ كورسەتىپ كەلەدى»، - دەپ تۇيىندەدى ول.
اۆتور: ەسىمجان ناقتىباي
