جولاۋشىلارعا قىزمەت كورسەتەتىن «قاراعاندى - الماتى» تاسجولىندا 9 بەكەت سالىنادى
بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدە جول بويىنداعى ينفراقۇرىلىمدى دامىتۋ وتە ماڭىزدى. ونىڭ ۇستىنە بۇگىندە ىشكى تۋريزم ىلگەرىلەپ كەلەدى، وسى ورايدا جول مەن ونداعى ينفراقۇرىلىمنىڭ بولۋى شارت. «قاراعاندى- الماتى» تاسجولىندا 9 بەكەت سالۋ قارالىپ جاتىر. قازىرگى ۋاقىتتا ينۆەستورلار بەكەت سالاتىن جەردى بەلگىلەدى. جول بويى بەكەتتەرى ۇلتتىق ستاندارتقا سايكەس جوعارى ساناتتا سالىنادى. ياعني «ا» ساناتىندا. ول جەردە جانار-جاعارماي قۇيۋ بەكەتىنەن بولەك، تاماقتانۋ ورىندارى، تەحنيكالىق قىزمەت كورسەتۋ ورتالىعى جانە كەمپينگ (اۆتوتۋريستەرگە ارنالعان جازعى لاگەر) بولادى»، - دەدى بەيبىت اتامقۇلوۆ ۇكىمەت ۇيىندە ونلاين وتكەن باسپا ءسوز ءماسليحاتىندا.
سونداي-اق، مينيستر جول بويىنداعى سەرۆيستەردىڭ قاي ۋچاسكەلەردە ورناتىلاتىنىن ايتتى.
«اتالعان جول بويى بەكەتتەرى اقسۋ-ايۋلى، بۋرىلبايتال، قۇرتى جانە قاپشاعاي جول ۋچاسكەلەرىنىڭ بويىنا ورناتىلادى. بۇگىندە ەلىمىز بويىنشا 120 جول بويى سەرۆيسى جۇمىس ىستەپ تۇر. ونىڭ 60 ى ۇلتتىق ستاندارتقا سايكەس كەلەدى. ءبىز جەرگىلىكتى اتقارۋ ورگاندارىمەن بىرلەسىپ بۇل باعىتتاعى جۇمىستى جالعاستىراتىن بولامىز، - دەيدى ول.
بۇعان دەيىن ۆەدومستۆو باسشىسى «قاراعاندى-الماتى» تاسجولىنىڭ پايدالانۋعا بەرىلەتىن مەرزىمىن اتادى.
