قازاقپارات كۇنتىزبەسى: 9- ناۋرىز
اتاۋلى كۇندەر
حالىقارالىق دي-دجەي كۇنى
حالىقارالىق دي-دجەي كۇنى - بۇل تەك مەرەكە عانا ەمەس، سونىمەن قاتار 2002-جىلدان باستاپ ماڭىزدى قايىرىمدىلىق شاراعا اينالدى. جىل سايىن وسى كۇنى راديوستانسالار، كلۋبتار، دي-دجەيلەر تاپقان تابىسىن دۇنيەجۇزى بويىنشا بالالار ۇيىنە اۋدارادى.
ەستە قالار وقيعالار
2001 -جىلى قازاقستان مەن رەسەي شەكارانى دەليميتاتسيالاۋعا كىرىستى. كەزدەسۋلەر بارىسىندا قازاقستاندىق جانە رەسەيلىك شەكاراشىلار ۇزاقتىعى 1896,5 شاقىرىم جەردى الىپ جاتقان رەسەيلىك استراحان، ۆولگوگراد، ساراتوۆ جانە ورىنبور وبلىستارىنىڭ مەملەكەتتىك شەكارادان ءوتۋ تۋرالى جوبالارى توپوگرافيالىق كارتاعا كەلىسىپ ەنگىزىلدى.
2012 -جىلى تۇركيادا دۇنيەجۇزى قازاقتارىنىڭ قاۋىمداستىعى كۇندەرى ءوتتى. ونى ىستانبۇلداعى قازاق-تۇرىك قورى مەن دۇنيەجۇزى قازاقتارىنىڭ قاۋىمداستىعى ۇيىمداستىردى. شارا قاۋىمداستىقتىڭ جانە ەكى ەل اراسىنداعى ديپلوماتيالىق قاتىناس ورناۋىنىڭ 20 جىلدىعىنا ورايلاستىرىلدى.
اتالعان شارانىڭ ىستانبۇلدا ءوتۋى كەزدەيسوق ەمەس، ويتكەنى 1992-جىلى ەلباسى نۇرسۇلتان نازاربايەۆ ىستانبۇلدا قازاق دياسپوراسىمەن كەزدەسۋدە دۇنيەجۇزى قازاقتارىنىڭ قاۋىمداستىعىن قۇرۋ تۋرالى يدەيا ايتىلعان بولاتىن.
2012 -جىلى بەرليندەگى ايگىلى «ادلون» قوناق ءۇيىنىڭ ۇلكەن بانكەت زالىندا قازاقستان رەسپۋبليكاسى مەن گەرمانيا فەدەراتيۆتىك رەسپۋبليكاسىنىڭ اراسىندا ديپلوماتيالىق قارىم-قاتىناستىڭ ورناعانىنا 20 جىل تولۋىنا وراي رەسمي شارا بولدى.
2015-جىلى 10 جاسار الماتىلىق بالالار - ءابىلقايىر سامبۋسينوۆ پەن الۋا قارعابايەۆا سپورتتىق جانە بال بيلەرى بويىنشا ماسكەۋدە وتكەن «Grand Prix Dinamo» حالىقارالىق تۋرنيرىندە ءبىرىنشى ورىندى جەڭىپ الدى. جارىسقا الەمنىڭ 19 ەلىنىڭ 124 قالاسىنان كەلگەن1800 جۇپ قاتىسقان بولاتىن.
2017 -جىلى بەرليندە 1905 -جىلى جازىلىپ الىنعان قازاق مۋزىكاسى تابىلدى. قۇندى جادىگەر سانالاتىن العاشقى جازبا كوللەكتسيانى گەرمانيا قازاقستانعا سىيعا تارتتى. بۇعان دەيىن ەڭ العاش قازاق مۋزىكاسى 1925 -جىلى فرانسيادا جازىلدى دەپ سانالعان. الايدا گەرمانيادا ودان دا ەرتە جازىلعان اۋديوتەكا ساقتالعان. مۋزىكانى نەمىس عالىمى ريحارد كارۋتتس فونوگرافتاردىڭ كومەگىمەن ساقتاپ قالعان.
2018 -جىلى وڭتۇكتىك كورەيانىڭ پحەنچحان قالاسىنداعى وليمپيادا ستاديونىندا قىسقى پاراليمپيادا ويىندارىنىڭ اشىلۋ سالتاناتى بولدى. وندا قازاقستان سپورتتىڭ ەكى تۇرىنەن: شاڭعىمەن سىرعاناۋ جانە بياتلوننان 6 سپورتشىسىن جارىسقا قوستى.
2020 -جىلى مەملەكەت باسشىسى قاسىم-جومارت توقايەۆ قازاقستان رەسپۋبليكاسى سىرتقى ساياساتىنىڭ 2020-2030-جىلدارعا ارنالعان تۇجىرىمداماسىن بەكىتتى.
تۇجىرىمدامانى ىسكە اسىرۋ سىرتقى ساياسي ساباقتاستىق ستراتەگياسى اياسىندا قازاقستان رەسپۋبليكاسىنىڭ مەملەكەتتىك تاۋەلسىزدىگىن، ونىڭ حالىقارالىق بەدەلىن نىعايتۋعا؛ ۇلتتىق، وڭىرلىك جانە جاھاندىق قاۋىپسىزدىكتى نىعايتۋعا؛ قولايلى حالىقارالىق ورتا قالىپتاستىرۋعا، قازاقستاننىڭ الەمنىڭ بارلىق مۇددەلى مەملەكەتتەرىمەن جانە حالىقارالىق ۇيىمدارىمەن دوستىق، تەڭ قۇقىقتىق جانە ءوزارا ءتيىمدى ساياسي جانە ەكونوميكالىق قاتىناستارىن نىعايتۋعا؛ قازاقستاننىڭ حالىقارالىق قوعامداستىققا جانە الەمدىك شارۋاشىلىق بايلانىستارعا ينتەگراتسيالانۋىنىڭ بارىنشا جوعارى دەڭگەيىنە، ونىڭ ىشىندە ۇلتتىق ەكونوميكانى ءارتاراپتاندىرۋ جانە تسيفرلاندىرۋ نەگىزىندە قول جەتكىزۋگە؛ مادەني-گۋمانيتارلىق، عىلىم، ءبىلىم بەرۋ جانە باسقا دا ارالاس سالالاردا حالىقارالىق ىنتىماقتاستىقتىڭ قارقىنداتۋعا؛ شەت ەلدەردە قازاقستان رەسپۋبليكاسى ازاماتتارىنىڭ جەكە جانە وتباسىلىق مۇددەلەرىن، جەكە جانە زاڭدى تۇلعالاردىڭ ىسكەرلىك مۇددەلەرىن قورعاۋدى كۇشەيتۋگە؛ مەملەكەتتىڭ سىرتقى ساياساتىنىڭ ۇزاق مەرزىمدى باسىمدىقتارى، پراكتيكالىق قادامدارى جانە ناقتى ناتيجەلەرى تۋرالى قازاقستاندىق قوعامداستىقتىڭ جانە شەت ەلدەردىڭ حاباردار بولۋ دەڭگەيىن كوتەرۋگە؛ قورىتىندىسىندا - مەملەكەتتىڭ، قازاقستاننىڭ ۇلتتىق بيزنەسى مەن حالقىنىڭ سىرتقى ساياسي قىزمەتتەن ناقتى پايدا تابۋىنا جاردەم ەتەدى.