قازاقپارات كۇنتىزبەسى: 9- اقپان
اتاۋلى كۇندەر
حالىقارالىق ستوماتولوگتار كۇنى
الەكساندريادا III عاسىردا ءومىر سۇرگەن اۋليە اپوللونيانى ەسكە الۋ ءۇشىن بەكىتىلگەن. اپوللونيا - حريستوسقا سەنگەن كورنەكتى الەكساندريالىق شەنەۋنىكتىڭ قىزى. ونى حريستياندىقتان باس تارتۋىن تالاپ ەتىپ، قاتاڭ جازاعا تارتادى. الايدا اپوللونيا ءولىم الدىندا دا باس يمەگەن.
باتىل قىزدىڭ وجەتتىگى سول كەزدەگى زامانداستارىن قاتتى تاڭعالدىرىپ، كەيىن ەل اراسىندا اپوللونيا ەسىمى ەستىلسە نە وعان سىيىنسا - ءتىس اۋرۋى بىردەن قويا سالادى دەگەن اڭىز شىققان.
ەستە قالار وقيعالار
1925-جىلى قازاقستان استاناسى ورىنبوردان قىزىلورداعا كوشىرىلدى. كەيىنىرەك 1927-جىلى الماتى قالاسى قازاقستاننىڭ استاناسى بولىپ بەكىتىلدى.
1935 -جىلى قازاق ا س س ر ورتالىق اتقارۋ كوميتەتىنىڭ ءتورالقاسى رەسپۋبليكانىڭ نەگىزگى ۇلتىنىڭ اتاۋىن ورىس تىلىندە «كازاحي»، ال رەسپۋبليكا اتاۋىن ورىسشا «كازاحستان» دەپ جازۋ جونىندە قاۋلى ەتتى. مۇنان بۇرىن «كازاكي»، «كازاكستان» دەپ جازىلاتىن.
1985-جىلى قازاقستان جازۋشىلار وداعى مۇقاعالي ماقاتايەۆ اتىنداعى سىيلىقتى بەكىتتى.
1993-جىلى قازاقستان رەسپۋبليكاسى مەن يوردان حاشيميت كورولدىگى اراسىندا ديپلوماتيالىق قارىم-قاتىناس ورناتۋ تۋرالى حاتتاماعا قول قويىلدى.
1994 -جىلى «قازاقستان رەسپۋبليكاسى ۇلتتىق عىلىم اكادەمياسىنىڭ مارتەبەسىن جانە عالىمداردى مەملەكەتتىك قولداۋ شارالارى تۋرالى» پرەزيدەنت جارلىعى شىقتى.
2000 -جىلى مۇقاعالي ماقاتايەۆتىڭ «امانات» تاڭداۋلى ولەڭدەر جيناعى قازاقستان رەسپۋبليكاسىنىڭ مەملەكەتتىك سىيلىعىنىڭ يەگەرى اتاندى.
2010 -جىلى اسپان دەنەلەرىنىڭ كاتالوگىنا سۋقۋعىش شوقجۇلدىزىنداعى جۇلدىزعا قازاقستاندىق تانىمال عالىم ميحايل پانيننىڭ ەسىمىن بەرۋ تۋرالى جازبا ەنگىزىلدى. ميحايل پانين - ءتورت ۇلكەن عىلىمي مونوگرافيانىڭ، ەكولوگيا بويىنشا كوپتەگەن وقۋلىقتار مەن ءبىرقاتار وقۋ-ادىستەمەلىك قۇرالداردىڭ اۆتورى. رەسپۋبليكالىق جانە شەتەلدىك باسپالاردا ونىڭ 1200 دەن استام عىلىمي جۇمىسى جاريالاندى.
ول عىلىم مەن تەحنيكانىڭ دامۋىنا زور ۇلەس قوسقان عالىمدار مەن ماماندارعا ارنالعان مەملەكەتتىك عىلىمي ستيپەندياعا يە بولدى.
2011 -جىلى بريۋسسەلدە ەۋروپا پارلامەنتىنىڭ شتاب پاتەرىندە «قازاقستان: بۇقارالىق اقپارات قۇرالدارى مەن ازاماتتىق قوعام ەركىندىگى» اتتى كونفەرەنسيا ءوتتى. ونى پولشانىڭ «اشىق ديالوگ» قورى ەۋروپارلامەنتتىڭ ادام قۇقىقتارى جونىندەگى كوميتەتىنىڭ قولداۋىمەن ۇيىمداستىردى.
2015 -جىلى مەملەكەت باسشىسى جاستاردىڭ مەملەكەت جانە قوعام ومىرىنە بەلسەندى قاتىسۋىن، ولاردىڭ الەۋمەتتىك ينفراقۇرىلىمعا قولجەتىمدىلىگىن قامتاماسىز ەتۋگە، جاستار ساياساتىن ىسكە اسىرۋدا مەملەكەتتىك ورگانداردىڭ جاۋاپكەرشىلىگىن ارتتىرۋعا باعىتتالعان «مەملەكەتتىك جاستار ساياساتى تۋرالى» قازاقستان رەسپۋبليكاسىنىڭ زاڭىنا قول قويدى.
2016 -جىلى ءبىرىڭعاي بايلانىس ورتالىعى، نەمەسە بارشاعا 1414 اتىمەن بەلگىلى ورتالىق EN 15838 حالىقارالىق ستاندارتى تالاپتارىنا سايكەس ەكەندىگىنە سەرتيفيكاتتاۋدان ءساتتى ءوتتى. EN 15838 حالىقارالىق ستاندارتىنا سايكەستىك سەرتيفيكاتى ۇيىمنىڭ قىزمەت باعىتى مەن بايلانىس ورتالىعىنىڭ كولەمىنە قاراماستان كەز كەلگەن ۇيىمداردىڭ بايلانىس ورتالىقتارىندا كليەنتتەرگە كورسەتىلەتىن قىزمەت ساپاسىن راستاۋدىڭ ەداۋىر بەدەلدى جانە كاسىبي جۇيەسى بولىپ سانالادى.
2017 -جىلى وڭتۇستىك افريكا ۇلتتىق كىتاپحاناسى قورىنا ق ر پرەزيدەنتى نۇرسۇلتان نازاربايەۆتىڭ قازاقستان تۋرالى جازعان كىتاپتارى بەرىلدى. وڭتۇستىك افريكا ۇلتتىق كىتاپحاناسى قورىندا 25 ميلليون كىتاپ بار.
2017 -جىلى قازاقستاندىق ءانشى ديماش قۇدايبەرگەن قىتايداعى «Singer» ءان بايقاۋىنا قاتىسىپ، اسپان استى ەلىندەگى تانىمال 10 جۇلدىز رەيتينگىندە كوش باستادى.
2019 -جىلى پولشانىڭ سۆەچە قالاسىنداعى لينگۆيستيكالىق-تەحنولوگيالىق ۋنيۆەرسيتەتىندە «اباي» مادەني-ءبىلىم بەرۋ جاستار ورتالىعى اشىلدى. جاڭا ورتالىقتىڭ ماقساتى - قازاق حالقىنىڭ سالت-داستۇرلەرى، سونداي-اق ۇلى اقىن، اعارتۋشى ابايدىڭ شىعارماشىلىعى تۋرالى پولشالىق ستۋدەنت جاستاردىڭ ءبىلىمىن تەرەڭدەتۋ.