قازاقستاننىڭ 9 وڭىرىندە كەزەكشى سىنىپتا وقيتىن وقۋشىلار كوروناۆيرۋس جۇقتىردى
نۇر- سۇلتان. قازاقپارات - سوڭعى اپتادا قازاقستاننىڭ 9 وڭىرىندە كەزەكشى سىنىپتا وقيتىن وقۋشىلار اراسىندا كوروناۆيرۋس جۇقتىرۋدىڭ 62 جاعدايى تىركەلدى.
بۇل تۋرالى ق ر د س م تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتىنىڭ رەسمي وكىلى ەرجان بايتانايەۆ ايتتى، دەپ حابارلايدى قازاقپارات ءتىلشىسى. «ءبىز وقۋشىلار اراسىنداعى سىرقاتتانۋ ماسەلەسىن كۇن سايىن باقىلاۋدا ۇستاپ كەلەمىز. وقۋ جىلى باستالعالى بەرى وقۋشىلار اراسىندا كوروناۆيرۋس ينفەكسياسىنىڭ 825 جاعدايى تىركەلدى. ونىڭ ىشىندە كەزەكشى سىنىپتاردا وقيتىن بالالار سانى - 261. بۇل وفلاين رەجيمدە ءبىلىم الۋشىلاردىڭ جالپى سانىنىڭ 0,03 پايىزىن قۇرايدى. ال ونلاين فورماتتا ءبىلىم الاتىن بالالاردىڭ ك ۆ ي ىندەتىنە شالدىعۋى 564 وقۋشى بولدى. بۇل 0,02 پايىزعا تەڭ»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
رەسمي وكىلدىڭ دەرەگىنشە، سوڭعى اپتادا 9 وڭىردە كەزەكشى سىنىپتا وقيتىن وقۋشىلار اراسىندا 62 جاعداي تىركەلدى. «بالالار اراسىندا اۋرۋعا شالدىققاندار كوپ وڭىرلەردىڭ قاتارىندا شىعىس قازاقستان 32، پاۆلودار 12، باتىس قازاقستان 5 بار. ال قالعان 4 وڭىردە اۋرۋدىڭ ءبىرلى- جارىم جاعدايى تىركەلدى. اتاپ ايتقاندا، قاراعاندى، اقمولا وبلىستارى مەن نۇر- سۇلتان قالاسىندا - 3 جاعداي، سولتۇستىك قازاقستان مەن اتىراۋ وبلىستارىندا - 1 جاعداي»، - دەدى ەرجان بايتانايەۆ.
اۆتور: مارلان جيەمباي
