كۇشتى جەل، تۇمان، كوكتايعاق: 9- قاراشاعا ارنالعان اۋا رايى

قازاقستان تەرريتورياسىنىڭ باسىم بولىگىندە اۋا رايى ءالى دە مۋرمانسك ايماعىنان كەلەتىن تسيكلونعا بايلانىستى بولادى. جاۋىن-شاشىن (جاڭبىر، قار) جاۋادى.

تۇركىستان وبلىسىنىڭ تاۋلى ايماقتارىندا قاتتى جاۋىن-شاشىن جاۋادى. رەسپۋبليكانىڭ كەي جەرلەرىندە جەل قارقىنى - 15-20، سولتۇستىك جانە وڭتۇستىك وڭىرلەردە ەكپىنى 23-28 م/س جەتەدى. تۇمان تۇسەدى، كوكتايعاق، سولتۇستىك جانە شىعىستا جاياۋ بۇرقاسىن كوتەرىلەدى.

تەك وڭتۇستىك-باتىستا انتيتسيكلون ىقپالىنان جاۋىن-شاشىنسىز اۋا رايى كۇتىلەدى.

اقمولا، سولتۇستىك قازاقستان، قوستاناي، پاۆلودار، قاراعاندى وبلىستارىندا جەل ەكپىنى - 23-28 م/س. كەي جەرلەرىندە تۇمان ءتۇسىپ، كوكتايعاق بولادى، جاياۋ بۇرقاسىن سوعادى.

جامبىل، تۇركىستان، اقتوبە، باتىس قازاقستان وبلىستارىنىڭ كەي جەرلەرىندە جەلدىڭ جىلدامدىعى 15-20 م/س جەتەدى.

جامبىل، اقتوبە وبلىستارىندا تۇمان تۇسەدى. الماتى، شىعىس قازاقستان، اتىراۋ، كۇندىز ماڭعىستاۋ، قىزىلوردا وبلىستارىنىڭ كەي جەرلەرىندە جەل قارقىنى 15-25 م/س جەتەدى.

كۇندىز قىزىلوردا وبلىسىندا شاڭدى داۋىل سوعادى.