قاسىم-جومارت توقايەۆ 9 جاستاعى مەكتەپ وقۋشىسىنىڭ ەستافەتاسىن قابىل الدى
بۇل تۋرالى بۇگىن ءوزىنىڭ facebook-تەگى پاراقشاسىندا مەملەكەت باسشىسىنىڭ باسپا ءسوز حاتشىسى بەرىك ءۋالي جازدى، دەپ حابارلايدى قازاقپارات.
«ءلايلىم-شىراق ەسىمدى 9 جاستاعى مەكتەپ وقۋشىسى قازاقتىڭ ۇلى اقىنى اباي ولەڭدەرىنەن ءۇزىندى وقىپ، بۇل ەستافەتانى جالعاستىرۋدى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆقا جولداعان ەكەن. مەملەكەت باسشىسى ءلايلىم-شىراقتىڭ بۇل ۇسىنىسىن زور قۋانىشپەن قابىلداپ، كەمەڭگەر اقىننىڭ جاستاردى ءبىلىم مەن عىلىمعا شاقىراتىن، ماقساتىڭا جەتۋ جولىندا قاجەت اسىل قاسيەتتەردى اتاپ كورسەتكەن «عىلىم تاپپاي ماقتانبا» اتتى ولەڭىنەن ءۇزىندى وقىپ، جاۋاپ بەردى»، - دەپ جازدى بەرىك ءۋالي.
ونىڭ جازۋىنشا، مەملەكەت باسشىسى اباي ولەڭدەرىن وقۋ ەستافەتاسىن ودان ءارى ءبىلىم جانە عىلىم ءمينيسترى اسحات ايماعامبەتوۆكە، مادەنيەت جانە سپورت ءمينيسترى اقتوتى رايىمقۇلوۆاعا جانە بۇكىل الەمدى مويىنداتقان تالانتتى ءانشى ديماش قۇدايبەرگەنگە جولدادى.