00:03, 27 - ءساۋىر 2019 | GMT +6
يتاليا ازاماتى 9 شاقىرىم بيىكتىكتە ۇشاقتان سەكىرمەككە ارەكەتتەندى
نۇر- سۇلتان. قازاقپارات - EasyJet اۋە كومپانياسىنىڭ لوندوننان پيزاعا ۇشقان رەيسىندە يتاليالىق جولاۋشى شۋ شىعاردى، دەپ دەپ حابارلايدى قازاقپارات The Sun باسىلىمىنا سىلتەمە جاساپ.
ول قالىڭ كيىنىپ الىپ، توعىز شاقىرىم بيىكتىكتە ۇشىپ بارا جاتقان ۇشاقتىڭ اپاتتىق شىعۋ ەسىگىنەن سەكىرمەككە ارەكەتتەندى.
«ول ابىرجۋلى كورىندى، ءوزى قالىڭ پالتو كيگەن. دارەتحانادا ءبىر مينۋتتاي بولدى» ، - دەپ سيپاتتايدى ونى باسقا جولاۋشىلار.
الگى جىگىت دارەتحانادان شىعا سالىپ، اپاتتىق شىعۋ ەسىگىنە بارعان دا ونى اشپاق بولعان. ەكيپاج مۇشەلەرىنىڭ ءبىرى وعان ايعايلاپ، باسقالارى قورقىنىشتان جىلاپ- سىقتاي باستاعان.
بىرنەشە ەر ادام الگىگە جابىلىپ، پيزاعا قونعانشا جىبەرمەي وتىردى. ءسويتىپ اۋەجايدا پوليتسياعا تاپسىردى. باسىلىمنىڭ حابارىنا قاراعاندا، ۇشاقتا شۋ شىعارعان وتىزدار شاماسىنداعى يتاليا ازاماتى بولىپ شىققان.