كاتالونيا پارلامەنتى 9 - قازاندا تاۋەلسىزدىك جاريالاۋ تۋرالى ماسەلەنى تالقىلاماق

استانا. قازاقپارات - كاتالونيادا 1 - قازاندا وتكەن تاۋەلسىزدىك تۋرالى رەفەرەندۋمنىڭ تۇپكىلىكتى ناتيجەسى جاريالاندى. يسپانيانىڭ ورتالىق ۇكىمەتى ول رەفەرەندۋمدى زاڭسىز دەپ اتاعان.

رەفەرەندۋم قورىتىندىسى بويىنشا، داۋىس بەرۋگە قاتىسقان 2 ميلليون 286 مىڭ 217 ادامنىڭ 2 ميلليون 44 مىڭ 38- ءى (90,18 پايىز) يسپانيا قۇرامىنان شىعۋدى جاقتاپ، 177 مىڭ 547 ادام (7,83 پايىز) - قارسى داۋىس بەرگەن. پلەبيستسيتكە قاتىسقانداردىڭ 1,98 پايىزى جاشىككە تازا بيۋللەتەن تاستاعان. كاتالونياداعى داۋىس بەرۋ قۇقىعىنا يە 5 ميلليون 300 مىڭعا تارتا سايلاۋشىلاردىڭ 43 پايىزعا جۋىعى داۋىس بەرۋگە قاتىستى دەپ حابارلادى اۆتونومدىق ايماق بيلىگى.

كاتالونيانىڭ يسپانيا قۇرامىنان ءبولىنىپ شىعۋىن قۇپتامايتىن تۇرعىندار نەگىزىنەن بۇل رەفەرەندۋمگە بويكوت جاريالاپ، داۋىس بەرۋگە قاتىسپاعان.

جۇما كۇنى شۆەيتساريا مادريد پەن بارسەلونا اراسىنداعى كەلىسسوزدەرگە اراعايىن بولۋعا ءازىر ەكەنىن ءبىلدىردى. ونىڭ الدىندا، 6 - قازان كۇنى مادريد 1 - قازاندا كاتالونيادا مىڭعا جۋىق ادام زارداپ شەككەن قاقتىعىستار بارىسىندا پوليتسيانىڭ ارتىق كۇش قولدانعانى ءۇشىن كەشىرىم سۇراعان.

داۋلى رەفەرەندۋم وتكەن كۇنى پوليتسيا سايلاۋ ۋچاسكەلەرىنىڭ كوبىنە توسقاۋىل قويىپ، داۋىس بەرۋگە ارنالعان بيۋللەتەندەر مەن سايلاۋ جاشىكتەرىن تارتىپ العان. بارسەلونادا پوليتسيانىڭ ارنايى جاساعى دەمونسترانتتاردى تاراتۋ ءۇشىن رەزەڭكە وقپەن اتقان.

يسپانيا كونستيتۋتسيالىق سوتى سالعان تىيىمعا قاراماستان كاتالونيا پارلامەنتى 9 - قازاندا تاۋەلسىزدىك جاريالاۋ تۋرالى ماسەلەنى تالقىلاماق.