قانات يسلام: 9 -قىركۇيەكتى اسىعا كۇتىپ ءجۇرمىن
ول بۇل تۋرالى كەشە استانادا «ەXPO-2017» كورمەسىنىڭ اۋماعىنداعى امفيتەاتر ماڭىندا جانكۇيەرلەرىنە ارناپ وتكىزگەن اشىق جاتتىعۋىنان كەيىن قازاقپارات تىلشىسىنە بەرگەن شاعىن سۇحباتىندا ءمالىم ەتتى.
«9 -قىركۇيەك كۇنى وتەتىن بوكس كەشىنە وتە جوعارى دەڭگەيدە دايىندالىپ جاتىرمىن. قازىر وزدەرىڭىز كورىپ تۇرعانداي شەتەلدەن سپارنيگ قارسىلاستارىم دا تولىعىمەن كەلدى. ءساتىن سالسا، ەلوردا تورىندە ەلدىڭ ەڭسەسىن كوتەرىپ، ەرەكشە بوكس كەشىن سىيلاۋعا ءازىرمىن. كۇندەر بولسا جاقىنداپ كەلەدى. بوكس وتەتىن كۇندى اسىعا كۇتىپ ءجۇرمىن»، - دەپ اتاپ ءوتتى بوكسشى.
سونداي-اق، قارسىلاسى دا وسال ەمەس ەكەنىن اتاپ ءوتتى. «مەن قالاي دايىندالىپ جاتسام، قارسىلاسىم دا سولاي دايىندالىپ جاتقان بولۋى كەرەك. ەشكىم شارشى الاڭعا دايىندىقسىز شىقپايدى. سول ءۇشىن بار كۇش-جىگەرىمدى سالىپ، جەڭىسكە جەتۋىم كەرەك. بۇل ەكسپو اياسىندا وتكەلى وتىرعان ءىرى بوكس كەشى. جانكۇيەرلەرىم مەنەن ۇلكەن ءۇمىت كۇتىپ وتىر. مەن سول ءۇمىتتى اقتاي ءبىلۋىم كەرەك»، دەپ اعىنان جارىلدى قانات يسلام.
ەسكە سالايىق، 9 -قىركۇيەك كۇنى استاناداعى «سارى ارقا» ۆەلوترەگىندە جوعارىدا اتى اتالعان جانە وزگە دە بوكسشىلارىمىز «ەكسپو-2017» كورمەسى اياسىندا وتەتىن بوكس كەشىندە ونەر كورسەتەدى. باستى جەكپە-جەك قانات يسلام مەن (24-0,19 ك و) كانادالىق برەندون كۋك (18-0, 11 ك و) اراسىندا وتەدى. بوكسشىلار ءبىرىنشى ورتا سالماقتاعى IBF تيتۋلىنا ۇمىتكەرلىككە تالاسادى.
سونداي-اق وسى جەكپە- جەكتىڭ اندەركارتىندا قازاقستاندىق 8 بوكسشى شارشى الاڭعا شىعادى. ولار: جانقوش تۇراروۆ (21-0, 15 ك و)، جانىبەك ءالىمحان ۇلى (1-0, 1 ك و)، مەيىرىم نۇرسۇلتانوۆ (3-0,2 ك و)، رۋسلان مىرساتايەۆ (3-0, 3 ك و)، ءالي احمەدوۆ (7-0,5 ك و)، ايدوس ەربوسىن ۇلى (6-0, 6 ك و)، ديماش نيازوۆ (11-0-3, 5 ك و) جانە نۇرسۇلتان جاڭابايەۆ.
اۆتور: كۇنسۇلتان وتارباي