وڭتۇستىك قازاقستان وبلىسىندا باۋىر ترانسپلانتاتسياسى 9 ادامعا ءومىر سىيلادى

 وڭتۇستىكتە قازىر باۋىرى اۋىر حالگە جەتكەن 500-دەن اسا ناۋقاس بار. ولار - گەپاتيت، باۋىر ىسىگى، باۋىر سەرروزى جانە باسقا دا ءتۇرلى دەرتكە دۋشار بولعاندار. سونىڭ ىشىندە، ەڭ اسقىنعانى - باۋىر سەرروزى. بۇل دياگنوزعا دۋشار بولعانعا ءومىرىن جالعاستىرۋدىڭ جالعىز جولى بار. ول - دىمكاس مۇشەسىنە ترانسپلانتاتسيا جاساۋ عانا. بۇگىندە ءوڭىردىڭ دارىگەرلەرى مۇنداي جاندارعا تەك تۋعان- تۋىستارىنىڭ باۋىرىن سالۋدا. دەگەنمەن ماماندار بۇل تىعىرىقتان شىعارمايدى دەپ وتىر.

«اعايىندارىنان باۋىر الىپ سالۋمەن ءبىز الىسقا بارا المايمىز. بىزگە ءمايىت ترانسپلانتاتسياسىن دامىتۋ كەرەك. مي ولگەن كەزدە، ونىڭ جۇرەك، باۋىر- بۇيرەگىن الىپ سالعان وڭايىراق ەدى. سەبەبى، ءتىرى ادامنىڭ دەنە مۇشەسىن الۋ قاۋىپتى سانالادى»، - دەيدى شىمكەنت قالالىق جەدەل مەديتسينالىق كومەك كورسەتۋ اۋرۋحاناسىنىڭ باس دارىگەرى ءمادي بەگاليەۆ.

اۋرۋحاناداعى ناۋقاستاردىڭ ءبىرى ابىلاي وردا بۇزار 30 جاسقا تاياعاندا اۋىر دەرتتىڭ تىرناعىنا ىلىككەنىن ايتادى. اۋرۋىن ەلەمەي جۇرگەن 3 جىل ىشىندە ابدەن اسقىندىرىپ العان. اۋرۋحاناداعى دارىگەرلەر وعان 6 كۇن بۇرىن باۋىر الماستىرۋ وتاسىن جاسادى. تۋعان اعاسىنىڭ باۋىرىنان جارتىسىن كەسىپ الىپ، دىمكاسكە سالعان. ال، گۇلنار سارتبايەۆا اعزاسىن وسىدان 2 جىل بۇرىن الماستىرعان. 55 جاستاعى ول باۋىر سەرروزىنىڭ زاردابىن تارتىپتى. ماڭىزدى شەشىم تۇرعاندا ءوز پەرزەنتى مەيىرىمدىلىك تانىتىپ، اناسىمەن باۋىرىن ءبولىستى. وتا بىلىكتى دارىگەرلەر ارقاسىندا ءساتتى شىقتى. بۇگىندە اعزاسىن الماستىرعانداردىڭ بارلىعىنىڭ دەرلىك جاعدايى جاقسى. ايتا كەتەيىك، وڭىردە وسىنداي باۋىر سەرروزىنا شالدىعىپ، شۇعىل ترانسپلانتاتسيانى قاجەت ەتەتىن 200-گە تارتا ناۋقاس بار. وپەراتسيانى جاساۋ شەتەلدەگىدەي 150-200 مىڭ دوللار تۇرمايدى. بارلىعى مەملەكەتتىڭ قولداۋىمەن تەگىن جۇزەگە اسىرىلادى. بار بولعانى باۋىرىمەن دەنەسىندەگى باۋىرىن بولىسەتىن جان تابىلسا بولعانى.

اۆتور: اينۇر اقبايەۆا