پاۆلوداردا 9-سىنىپ وقۋشىسى ورالحان بوكەي وقۋلارىنىڭ جەڭىمپازى اتاندى

استانا. قازاقپارات - پاۆلودار قالاسىندا ورالحان بوكەي وقۋلارى قالالىق بايقاۋىنا قاتىسقان 28 ۇمىتكەردىڭ ىشىنەن ى. التىنسارين اتىنداعى قازاق گيمنازيا-ينتەرناتىنىڭ 9-سىنىپ وقۋشىسى مارلەن ورازباي جەڭىمپاز اتاندى، دەپ حابارلايدى pavlodarnews.kz.

پاۆلودار قالالىق مادەنيەت جانە تىلدەردى دامىتۋ ءبولىمىنىڭ سەكتور مەڭگەرۋشىسى مەيرام نۇعماننىڭ ايتۋىنشا، قاتىسۋشىلاردىڭ كوبى جوعارى سىنىپ وقۋشىلارى مەن جوعارى وقۋ ورىندارىنىڭ ستۋدەنتتەرى.

سونىمەن قاتار، مەكتەپ مۇعالىمدەرى، بالاباقشا تاربيەشىلەرى جانە باسقا دا ءتۇرلى كاسىپورىن قىزمەتكەرلەرى بار. قاتىسۋشىلاردىڭ جاسى 17-30 ارالىعىندا. «ورالحان بوكەي وقۋلارى قالالىق كونكۋرسى «تىلدەردى قولدانۋدىڭ 2011-2020-جىلدارعا ارنالعان مەملەكەتتىك باعدارلاماسى» اياسىندا جىل سايىن وتەدى.

جالپى، جىل وتكەن سايىن ساپاسى ارتىپ، قاتىسۋشىلاردىڭ سانى كوبەيىپ كەلەدى. ماقساتىمىز - جاستار اراسىندا كىتاپ وقۋ مادەنيەتىن قالىپتاستىرۋ، ونەرلى جاستاردى انىقتاۋ، ولاردى حالىققا ناسيحاتتاۋ جانە ىنتالاندىرۋ»، - دەيدى مەيرام نۇعمان.

بايقاۋ قورىتىندىسى بويىنشا ەكىنشى ورىندى 35№ جالپى ورتا ءبىلىم بەرۋ مەكتەبىنىڭ مۇعالىمى باقىتگۇل سىرناي، ءۇشىنشى ورىندى 33№ جالپى ورتا ءبىلىم بەرۋ مەكتەبىنىڭ 11-سىنىپ وقۋشىسى بايتۇرسىن جۇماباي ەنشىلەدى.

سونىمەن قاتار، ينەۋ كوللەدجىنىڭ 1-كۋرس ستۋدەنتى ايەركە قۋانىش «ورىنداۋشىلىق شەبەرلىگى»، ب. احمەتوۆ اتىنداعى پەداگوگيكالىق كوللەدجدىڭ 2-كۋرس ستۋدەنتى ءلايلا كىرىسحان «قارىمدى قابىلەت» اتالىمى بويىنشا ماراپاتتالدى.

ءبىرىنشى ورىن يەگەرىنە نوۋتبۋك بەرىلسە، ەكىنشى جانە ءۇشىنشى ورىندارعا پلانشەت پەن ۇيالى تەلەفون تارتۋ ەتىلدى. جەڭىمپاز اتانعان مارلەن ورازباي وبلىستىق كەزەڭدە پاۆلودار قالاسىنىڭ نامىسىن قورعايدى.