08:08, 01 - مامىر 2017 | GMT +5
قازاقستاندىق 9 جاسار ءبيشى قىز شياڭگاڭداعى چەمپيوناتتا توپ جاردى - فوتو
بەيجىڭ- گونكونگ. قازاقپارات - قازاقستاندىق ءامىر قابازيەۆا گونكونگتە(شياڭگاڭ) 30 -ساۋىردە بيدەن وتكەن ءتورتىنشى جىل سايىنعى اشىق چەمپيوناتتىڭ ەڭ كۇشتى قاتىسۋشىسى اتاندى، دەپ حابارلايدى بەيجىڭدەگى «قازاقپارات» ح ا ا مەنشىكتى ءتىلشىسى.
جارىستى حالىقارالىق ءبي قاۋىمداستىعى (Multi (International) Dancing Association) ۇيىمداستىردى، وعان 10 ەلدەن 250 دەن استام ءبيشى قاتىستى. نەبارى 9 جاستاعى ءامىر قابازيەۆا لاتىنامەريكالىق بيدەن (جەكە جانە جۇپ) ءبىرىنشى ورىن الدى، سونداي-اق «چەمپيوناتتىڭ ۇزدىك شەتەلدىك قاتىسۋشىسى» اتالىمىنا لايىق دەپ تابىلدى.
بەيجىڭدە ول ءبىر جارىم جىلدان بەرى بال بيلەرى ۇيىرمەسىنە بارادى. ال بۇعان دەيىن قازاقستاندا الما ساعاديەۆانىڭ جەتەكشىلىگىمەن «كوبەلەك» انساملىندە شىعىس جانە الەم حالىقتارى بيلەرىمەن شۇعىلدانعان بولاتىن.
