وليمپيادانىڭ باستالۋىنا 9 كۇن قالدى

استانا. قازاقپارات - ريو-دە-جانەيروداعى وليمپيالىق ويىنداردىڭ سورەدەن شىعاتىنىنا ساناۋلى عانا كۇندەر قالدى.

سودان كەيىن 16 كۇنگە سوزىلاتىن الامان جارىس باستالىپ كەتەدى. بۇل سپورت تويىنان ءبىزدىڭ دە ءۇمىتىمىز بار. بۇعان دەيىنگى وليمپيالىق ويىنداردا جەتكەن جەتىستىكتەرىمىز ەداۋىر بولسا، بۇل جولى دا سپورتشىلارىمىز وزدەرىنەن ۇلكەن ءۇمىت كۇتىپ وتىرعان جۇرتىن قۋاندىرا الاتىن شىعار دەگەن ۇمىتتەمىز. ال بۇگىنگى بەت اياسىندا «ەگەمەن قازاقستان» گازەتى برازيليا جەرىندە اتوي سالاتىن ءبىر توپ ساڭلاقتارىمىز تۋرالى ءسوز قوزعاپ وتىر.

ارداگەرلەر وليمپياداشىلارعا قولداۋ كورسەتتى

وسكەمەندە قازاقستان تاۋەلسىزدىگىنىڭ 25 جىلدىعىنا وراي رەسپۋبليكا ارداگەرلەر سپورتشىلارى اراسىندا ІV سپارتاكيادا بولىپ ءوتتى. وعان ەلىمىزدىڭ بارلىق وبلىستارىنان 1660 ادام قاتىسىپ، سپورتتىڭ 13 ءتۇرى بويىنشا كۇش سىناستى. جارىس ءبىر جاعى ەلىمىزدىڭ ريو وليمپياداسىنا قاتىسۋشى سپورتشىلارىنا قولداۋ كورسەتۋ ماقساتىندا وتكىزىلدى.

اعا بۋىن وكىلدەرى اراسىنداعى ايتۋلى جارىسقا الەمنىڭ، ازيا ويىندارىنىڭ چەمپيوندارى، وليمپيادالاردا ەلىمىزدىڭ نامىسىن قورعاعان اتاقتى ساڭلاقتار قاتىستى. ولاردىڭ اراسىندا ك س ر و سپورت شەبەرى، گىر كوتەرۋدەن ارداگەرلەر اراسىنداعى الەم چەمپيوناتىنىڭ 12 دۇركىن چەمپيونى، حالىقارالىق دارەجەدەگى تورەشى سەرىك ابداحان، قول كۇرەسى مەن گىر كوتەرۋدەن الەمنىڭ بىرنەشە دۇركىن چەمپيونى مۇقان اعزاموۆ، وليمپياداعا ەكى رەت قاتىسقان الەم كۋبوگىنىڭ ەكى دۇركىن يەگەرى رۋسلان سەيىلحانوۆ، ءۇش رەت وليمپيالىق ويىندارعا قاتىسقان حالىقارالىق دارەجەدەگى جەڭىل اتلەت يولانتا ۋليەۆا بولدى.

سپارتاكيادانى مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتى ءتوراعاسىنىڭ ورىنباسارى، سپارتاكيادانىڭ باس تورەشىسى ءابىل دوڭبايەۆ اشتى. كوميتەتتىڭ بۇقارالىق سپورت باسقارماسىنىڭ باسشىسى بەكبولات بايجانوۆ بۇل كۇندەرى قازاقستان حالقىنىڭ 25 پايىزى سپورتپەن شۇعىلداناتىنىن، ولارعا جان-جاقتى قولداۋ كورسەتىلىپ كەلە جاتقانىن ايتتى. ال شىعىس قازاقستان وبلىسى دەنەشىنىقتىرۋ جانە سپورت باسقارماسى باسشىسىنىڭ ورىنباسارى ولەگ چۋگۋنكوۆ وبلىس اكىمدىگىنىڭ ارداگەرلەر سپارتاكياداسىنا جان- جاقتى دايىندىق جۇرگىزگەنىن، سپورتتىڭ 13 ءتۇرىنىڭ سپورت كەشەندەرىندە ءوتىپ جاتقانىن تىلگە تيەك ەتتى.

- وسكەمەندەگى «جەكپە- جەك» سارايىندا قازاق كۇرەسىنىڭ 100 دەن استام مايتالماندارى سپارتاكيادا چەمپيونى اتانۋ ءۇشىن كۇرەستى. ولاردىڭ اراسىندا الەم چەمپيونى ماڭعىستاۋلىق قانات جۇمابايەۆ، ەكى رەت الەم چەمپيونى اتانعان نۇرلان جاراسيەۆ، جاستار اراسىندا الەم چەمپيونى اتانعان كەنتاۋوۆ، وسكەمەندىك رۋسلان سەيىلحانوۆ، تاعى باسقالار بار. سپارتاكيادانىڭ ارداگەرلەر اراسىندا ءوتۋى جاستارعا ۇلگى-ونەگە، ونىڭ ۇستىنە بۇرىندارى بوز كىلەمدە بەلدەسكەن ساڭلاقتار ءبىرىن-ءبىرى كورىپ، ءماز بولۋدا، ەسكەرتكىش سۋرەتكە تۇسۋدە. كەندى التايدىڭ سپورت باسشىسى ەلدوس چيكەنوۆ جارىستى وتە تاماشا ۇيىمداستىرعان، بەلدەسۋلەر ەكى كىلەمدە ءوتىپ جاتىر، بالۋاندارعا بارلىق جاعداي جاسالعان، - دەدى كۇرەستىڭ باس تورەشىسى مارات جاقىت.

فينالعا شىعىس ءوڭىرىنىڭ 6 بىردەي بالۋانى شىقتى. ەڭ ءبىرىنشى بولىپ كەدەن قىزمەتكەرى، جاستار اراسىندا ەكى دۇركىن الەم چەمپيونى اتانعان ەرجان وماربايەۆ قارسىلاسىن ءبىر مينۋتتا الىپ ۇرىپ، چەمپيون اتاندى. ال اسحات قىدىربايەۆ قوستانايلىق قارسىلاسىن جەڭىپ، جەڭىس تۇعىرىنا كوتەرىلدى. سونىمەن بىرگە، مۇرات بيسەمبايەۆ، ورالبەك جايلاۋوۆ تا ابىرويدى اسقاقتاتتى. الايدا، جەرلەسىمىز رۋسلان سەيىلحانوۆ سوڭعى مينۋتتا قارسىلاسىنا ءبىر ۇپاي بەرىپ، كۇمىستى مىسە تۇتتى.

سپورتتىڭ شاحمات، توعىزقۇمالاق، دويبى سەكىلدى ويىندارىن قىزىقتاۋشىلار قاتارى كوپ بولدى. ءبىز پاۆلودار وبلىسىنىڭ باياناۋىلىنان كەلگەن 75 جاسار باقىت بادامشينامەن تىلدەسكەنىمىزدە، ول سپورتتىڭ ءۇش تۇرىمەن مەكتەپتە ۇستاز بولىپ جۇرگەندە شۇعىلدانعانىن، ەرتىس وڭىرىنەن سپارتاكياداعا 60 ادامنىڭ قاتىسقانىن ايتتى. باقىت اپاي جارىستا جۇلدەلى ورىندى يەلەندى.

سونىمەن، ءتورت كۇنگە سوزىلعان ايتۋلى جارىس مارەسىنە جەتتى. ونىڭ قورىتىندىسىندا شىعىس قازاقستان وبلىسىنىڭ كومانداسى 282 ۇپايمەن ءبىرىنشى ورىندى يەلەندى. الماتى وبلىسىنىڭ ارداگەرلەرى 222 ۇپايمەن ەكىنشى، ال 209 ۇپايدان جيناعان پاۆلودار جانە وڭتۇستىك قازاقستان وبلىسىنىڭ جاساقتارى ءۇشىنشى- ءتورتىنشى ورىندى ءبولىستى. ودان كەيىنگى ورىنداردا اتىراۋ، اقتوبە وبلىستارى، استانا قالاسى كوماندالارى ورنالاستى. سوڭعى ورىنداردا الماتى قالاسى مەن جامبىل وبلىسىنىڭ قۇرامالارى قالىپ قويدى.

ءبىر مەكتەپتەن - 8 جولداما

1960-جىلدارى قازاقستاندا جوعارى سپورت شەبەرلەرىن دايىنداۋمەن اينالىساتىن ءۇش قانا مەكتەپ بولعان. ونىڭ ءبىرى - الماتىدا، ەكىنشىسى قاراعاندىدا بولسا، ال ءۇشىنشىسى شىمكەنتتە ورنالاسقان.

1975-جىلى «جوعارى سپورت شەبەرلىگى مەكتەبى» اتانعان مەكتەپتىڭ داڭقتى سپورتشىلارى تۋرالى ايتار بولساق، سپورتتىق گيمناستيكادان ەكى دۇركىن وليمپيادا ويىندارىنىڭ جەڭىمپازى نەللي كيم الدىمەن اۋىزعا ورالادى. وعان 16 جاسىندا-اق ەۋروپانىڭ ۇزدىك بوكسشىسى اتانعان نۇرجان سمانوۆ پەن قاناتبەك شاعاتايەۆتى، وليمپيالىق ويىندار مەن الەم چەمپيوناتىندا فينالدىق ايقاسىنا دەيىن قارسىلاس شىداتپاعان مۇحتارحان دىلدابەكوۆتى، قازاق كوركەم گيمناستيكاسىنىڭ پريماسى ءاليا يۋسۋپوۆانى قوسىڭىز.

الەمگە ايگىلى وسىنداي ساڭلاقتارعا التىن ۇيا بولعان وبلىستىق كەشەندى جوعارى سپورت شەبەرلىگى مەكتەبىن بۇگىندە قازاقستانعا ەڭبەگى سىڭگەن جاتتىقتىرۋشى، پەداگوگيكا عىلىمدارىنىڭ كانديداتى بالعاباي ەلشيەۆ باسقارادى. جۋىردا ول ريو-دە-جانەيروعا باراتىن ساڭلاقتاردىڭ باسىن قوسىپ، اق تىلەۋ تىلەگەن. بۇل مەكتەپتىڭ ەرەكشەلىگى سول، ريوعا 8 سپورتشى اتتاندىرىپ وتىر.

ولار تۋرالى ايتساق، مىلتىق اتۋدان يۋري يۋركوۆ، راشيد يۋنۋسمەتوۆ، ساداق اتۋدان لۋيزا سايدوۆا، بوكستان ءبىرجان جاقىپوۆ، قايرات ەراليەۆ جانە جاينا شەكەربەكوۆا، باتۋتتا سەكىرۋدەن پەرمامماد اليەۆ، ستەند اتۋدان ماريا دميتريەنكو بار.

- بۇرىن ەل اراسىندا «وليمپيادا ويىندارىندا جەڭۋ ماقسات ەمەس، باستىسى قاتىسۋ» دەگەن ءسوز ايتىلاتىن، - دەيدى بالعاباي ەلشيەۆ. - ءبىز وسى سپورتشىلار وليمپيادا جولداماسىن الۋ ءۇشىن ارنايى جۇمىس كەستەسىن قۇرىپ، بار جاعدايلارىن جاسادىق. قاجەت جەرىندە اقىل- كەڭەستەن بولەك، ەشتەڭەدەن تارىقتىرمادىق. سونداي جاعدايدا قاتىسقاندارىڭا قاناعات دەپ وتىرۋعا بولمايدى. ۇلكەن دوداعا جولداما الدىڭ ەكەن، ەلىڭنىڭ مەرەيىن كوتەر، مەملەكەتىڭنىڭ بەدەلىن تانىت، اقىرىنا دەيىن جەڭىس ءۇشىن كۇرەس. ريو-دە-جانەيروعا جولداما العان سپورتشىلارىمىزعا ۇجىم اتىنان وسىنداي اق تىلەك ايتتىم.

- باكە «توعىز ۇلىم ءبىر توبە، ەرتوستىگىم ءبىر توبە» دەگەندەي، ءبارى بىردەي وليمپيادا جۇلدەگەرى بولمايتىنىن بىلەسىز. قازاقشالاپ ايتساق، ات مىنگىزەتىندەي ناعاشىلارىنىڭ اۋىلىنا قىدىرىستاپ بارا جاتقان جوق. ويشا ءجىپ تاققاندارىڭىز بار ما؟ - دەدىك ءبىز سوسىن.

- مىناۋ التىن جۇلدە الادى دەپ بولەكتەپ ايتۋ قيىن. ءوزىڭ ايتقانداي، ناعاشىلارىنىڭ اۋىلى ەمەس، وليمپياداعا بارا جاتىر. ءبىراق، ءبىر بوكستىڭ ءوزى جۇرەك جىلىتادى. ءبىرجان جاقىپوۆ - الەم چەمپيونى. قايرات ەراليەۆ پەن جاينا شەكەربەكوۆا دا تالانتتى بوكسشىلار. تالاي مىقتىلاردى جولىنان ىسىرعان مەرگەندەر يۋري يۋركوۆ پەن راشيد يۋنۋسمەتوۆ التىن مەدالعا كۇرەسەدى دەسە مەن تاڭدانبايمىن، - دەدى ول وسىعان وراي. - سپورتتىق قۇمارلىق دەگەن بولادى. وندايدا سپورتشىنىڭ كوڭىلى تولىپ، بويىنا الاپات كۇش بىتەدى. وليمپيادا جەڭىمپازدارىنىڭ ءوزىن شاڭ قاپتىرىپ كەتەدى.

وسىنداي ساتتىلىكتى بارشا سپورتشىلارىمىزعا تىلەيمىن.

بۇعان قوسا ايتارىمىز، رەسپۋبليكامىزدىڭ كەيبىر وبلىستارى ءتورت جىلدا ءبىر كەلەتىن وليمپيادا ويىندارىنا قاتىساتىن سپورتشى بەرە الماي وتىر. ال وڭتۇستىكتىڭ ءبىر مەكتەبى عانا ەكى-ءۇش وبلىستىڭ جيناي الماعان سپورتشىلارىن بۇكىل دۇنيەجۇزىلىك الامانعا جىبەردى.

ءۇمىت وتى ۇزىلمەيدى

وسى كۇندەرى ۆەلوسپورتتان «استانا» كومانداسى فرانسيادا ءوتىپ جاتقان «تۋر دە فرانس» جارىسىنا قاتىسىپ جاتىر. بۇل سىندا وليمپياداعا ليتسەنزيا العان ۆەلوسپورتتان ۇلتتىق قۇراما كوماندانىڭ مۇشەسى الەكسەي لۋتسەنكو دا بار.

كەشە ول بىزبەن اڭگىمەدە وليمپيا ويىندارىنا دايىندالىپ جاتقانىن جانە كوماندا كاپيتانى فابيو ارۋدىڭ جەڭىس تۇعىرىنا كوتەرىلۋگە ءالى دە مۇمكىندىگى بار ەكەندىگىن ايتتى.

- جارىستىڭ 17- كەزەڭىندە «استانا» ۆەلوكومانداسىنىڭ كاپيتانى، يتاليان شاباندوزى فابيو ارۋ جالپى ەسەپتە ەكى ساتىعا كوتەرىلىپ، سەگىزىنشى ورىنعا جايعاستى. «تۋر دە فرانس» - وتە اۋىر جارىس جانە جەڭىمپاز جەيدەسىنە يەلىك ەتۋ ۆەلوشاباندوزداردىڭ مانسابىنداعى ەڭ ۇلكەن جەڭىستەردىڭ ءبىرى. سوندىقتان فرانسياعا جينالعان كوماندالاردىڭ بارلىعى كوپكۇندىككە تىڭعىلىقتى دايىندىق جۇرگىزەدى. مەن فابيو ءۇشىن قۋانىشتىمىن. ونىڭ ءالى دە بيىك ساتىدان كورىنۋگە مۇمكىندىگى بار، - دەدى الەكسەي لۋتسەنكو.

راسىندا دا «تۋر دە فرانس» جارىسىندا سايدىڭ تاسىنداي ىرىكتەلگەن شاباندوزداردىڭ شەبەرلىگىندە ءمىن بولمايدى. جىلدامدىق وتە جوعارى. العاشقى جارىس كۇندەرى فرانتسيانىڭ سولتۇستىگىندە ءوتتى. ۆەلوشاباندوزدار جەلى كۇشتى ايماقتاردا باق سىناستى. سول سەبەپتى پەلەتون اراسىندا كوپ ادامدار قۇلاپ جاتتى. قۇدايعا شۇكىر، ءبىزدىڭ كوماندا بۇل سىننان مۇدىرمەي ءوتتى. وسى سىندا قازاقستاندىق ۆەلوشاباندوز دا جەڭىسكە تالاسىپ كوردى. الايدا، ول العا قويعان ماقساتىنا جەتە المادى.

بۇل تۋرالى لۋتسەنكونىڭ ءوزى بىلاي دەدى:

- سورەدەن ءسال ۇزاعان كەزدەن الدىڭعى توپقا قوسىلىپ، پەلەتوننان ۇزاپ كەتكىسى كەلگەندەر كوپ بولدى. العاشقى ءبىر جارىم ساعاتتا شاباندوزدار اراسىندا تارتىستى جارىس ءوتتى. تاۋدىڭ ەتەگىنە كەلگەندە، ارىپتەسىم تانەل كانگەرت ەكەۋمىزدىڭ جولىمىز بولدى. ءبىراق العا ۇزاعان توپ كوپ ۇزاماي ەكىگە ءبولىنىپ كەتتى. سوندىقتان مەن Direct Energie مەن ۆمس كومانداسىنىڭ ەكى وكىلىمەن قوسىلىپ جىلدامدىعىمىزدى ۇدەتۋگە شەشىم قابىلدادىم.

ناتيجەسىندە 30-40 شاقىرىمداي العا شىقتىق. پەلەتوننان ۇزاپ كەتۋ ءۇشىن مەن كوپ كۇش جۇمسادىم، ال كەزەڭ اياعىنا قاراي تانەل كانگەرتكە كومەكتەسكەنىم دۇرىس دەپ شەشتىم. سەبەبى، ول تاۋعا كوتەرىلۋدىڭ شەبەرى، ءوزىن جاقسى سەزىندى. بۇعان مارەگە جاقىن قالعاندا، پەلەتونداعى جاعداي دا وزگەردى. سوندىقتان ارتقا شەگىنىپ، كوماندا كاپيتانى فابيو ارۋعا كومەكتەسۋىم كەرەك بولدى. فابيو كەلە جاتقان نەگىزگى توپتا سارى جەيدە يەسى كريس فرۋممەن قوسا جەكە ەسەپتە جەڭىسكە تالاسىپ جاتقان شاباندوزدار بولدى.

ا. لۋتسەنكونىڭ ايتۋىنشا، ءقازىر «استانا» نامىسقا باسسا، كوماندانىڭ ءالى دە ۇزدىك ۇشتىكتەن كورىنۋگە مۇمكىندىگى بار. «فابيو ارۋ «تۋر دە فرانس» كوپكۇندىگىنە العاش رەت قاتىسىپ جاتىر. سوندىقتان ءبارى دە مۇمكىن. الدا تاۋلى جەرلەرمەن وتەتىن جەكە ەسەپ جارىسى بولادى. ەگەر ءبارى ويداعىداي بولسا، ارۋدىڭ نەگىزگى قارسىلاستارىمەن اراداعى ۋاقىت ايىرماشىلىعىن ەكى مينۋتقا قىسقارتۋعا مۇمكىندىگى بار»، - دەدى ول.

سونىمەن بىرگە، ول «تۋر دە فرانس» كوپكۇندىگى وتكەن سوڭ كوماندانىڭ تاعى باسقا دا جارىس- تارعا قاتىساتىنىن، ءوزى يسپانيادا وتەتىن «سان-سەباستيان» ۆەلوبايگەسىندە كۇش سىناساتىنىن اتاپ ءوتتى.

- «تۋر دە فرانستان» كەيىن ءبىرشاما ۋاقىت دەمالامىن. سودان سوڭ «سان-سەباستيان» جارىسىنا قاتىسامىن. كەشە كوماندانىڭ باس مەنەدجەرى الەكساندر ۆينوكۋروۆپەن جانە دارىگەرلەرمەن سويلەستىم. دارىگەرلەر جارىس كۇنىنىڭ اۋىر بولعانىنا قاراماستان، اعزام تەز قالىپقا كەلىپ جاتىر دەدى.

بۇل، ارينە، قۋانتادى. «تۋر دە فرانستاعى» جارىستار تاۋلى جەردە بولعانىمەن ءوزىمدى تىڭ سەزىنەمىن. مەن وزىمە سەنىمدىمىن. جارىستىڭ 17- كەزەڭىندە الدىڭعى توپتا مەنىڭ ورنىما باسقا شاباندوز قاتىساتىن بولعان. ءبىراق ءوزىم سۇراندىم. كەزەڭدە جەڭىسكە جەتۋگە تالپىنىپ كوردىم. تۋردان كەيىن بىرنەشە كۇن تىنىعىپ الامىن. وليمپيادا قارساڭىندا ءوز بابىمدا بولاتىنىما سەنىمدىمىن. ال ريو-دە-جانەيروعا 31- شىلدە كۇنى ۇشامىن، - دەدى ول.

بوكسشىلار سايىسقا ساقاداي ساي

ەندى ءبىر اپتاعا جەتەر-جەتپەس ۋاقىتتا بوكستان قازاقستاننىڭ ۇلتتىق قۇراماسى ريو-دە-جانەيرو قالاسىنا اتتانادى. قازىر كوماندا استانادا وقۋ-جاتتىعۋ جيىنىن وتكىزىپ جاتىر. سپورتشىلاردىڭ جاتتىعۋلارىنا كولۋمبيا، دومينيكان رەسپۋبليكاسى، مەكسيكا مەن ا ق ش- تان شاقىرىلعان 9 بوكسشى كومەكتەسۋدە. ولاردىڭ اراسىندا قۇراما شتاتتاردا The Kazakh دەگەن لاقاپ اتىمەن تانىلىپ ۇلگەرگەن قانات يسلام دا بار. ول دانيار ەلەۋسىنوۆتى وليمپياداعا دايىنداۋدا. ەكەۋى بىرنەشە رەت رينگكە شىعىپ، سپاررينگ تە وتكىزدى.

- بوكسشىلاردىڭ دايىندىعى جاقسى. ولار وليمپيادادا جاقسى ونەر كورسەتۋگە دايىن. ەندى ەڭ باستىسى، جاقسى دايىندىق ءتيىستى ناتيجەسىن بەرسە دەپ تىلەيمىن. وليمپياداعا قاتىساتىن 10 بوكسشىنىڭ ءبارى دە جۇلدە ءۇشىن تالاسا الادى. ءبىز بوكسشىلارعا قولداۋ كورسەتىپ قانا كومەكتەسە الامىز، - دەيدى قانات يسلام.

بوكسشىلاردىڭ جاقسى دايىندالۋلارى ءۇشىن قانات يسلامنىڭ ءوزى 7 بىلعارى قولعاپ شەبەرىن شاقىرتقان ەكەن. ونىڭ ايتۋىنشا، ەلىمىزدىڭ بوكس فەدەراتسياسى بۇل ءۇشىن قولدا بار مۇمكىندىكتىڭ ءبارىن جاساعان.

وقۋ-جاتتىعۋ جيىنىندا بايقاعانىمىز، شەتەلدەن كەلگەن بوكسشىلاردىڭ ەلىمىز ۇلتتىق قۇراماسىنان ەشقانداي ارتىقشىلىعى جوق. ولاردىڭ قازاق بوكسشىلارىنان ءبىر ايىرماشىلىعى، كاسىپقوي بوكسپەن اينالىسادى. ال تەحنيكاسى مەن شەبەرلىگى جاعىنان ەكى جاقتىڭ دەڭگەيى بىردەي. قاناتتىڭ ايتۋىنشا، سپاررينگتىڭ باستى ماقساتى - ءبىزدىڭ بىلعارى قولعاپ يەلەرىنە امەريكا ەلدەرىنىڭ بوكستاسۋ ءستيلىن كورسەتۋ. سول ارقىلى سپورتشىلاردىڭ شەبەرلىگىن شىڭداپ، تاجىريبەسىن ارتتىرۋ.

- بۇل بوكسشىلاردىڭ بارلىعى تيتۋلدىق بەلدىككە يە. بارلىعىنىڭ دا شارشى الاڭدا وزىندىك ورنى بار. ءبىز قازاق جىگىتتەرىنەن دەڭگەيى تومەن سپورتشىلاردى شاقىرمايمىز. ەگەر شاقىراتىن بولساق، يىق تەڭەستىرىپ بوكستاسىپ، ءبىزدىڭ جىگىتتەرمەن تاجىريبە بولىسە الاتىن بوكسشىلاردى شاقىرامىز. سول ءۇشىن مەن بارلىق جەكە شارۋالارىمدى ىسىرىپ قويىپ، ۇلتتىق قۇراماعا كومەكتەسۋگە كەلدىم، - دەيدى قانات.

قانات يسلام 2008-جىلى بەيجىڭدە وتكەن وليمپيالىق ويىندارعا قىتاي اتىنان قاتىسىپ، قولا جۇلدەگەر اتانعان. وسى جارىستان كەيىن ەلگە ورالىپ، بۇكىلالەمدىك بوكس سەرياسىنىڭ جارىستارىنا قاتىسىپ، «استانا ارلانس» كلۋبىندا ونەر كورسەتتى. ودان كەيىن اقش- قا بارىپ، كاسىپقوي بوكسپەن اينالىسا باستادى.

قازىرگى كەزدە ول قۇراما شتاتتاردىڭ مايامي قالاسىندا جاتتىعادى. بۇل جەردە بۇعان دەيىن قازاقتىڭ تاعى ءبىر جۇلدىزى جانعان بىلعارى قولعاپ شەبەرى مارات مازىمبايەۆ تا جاتتىققان بولاتىن. كەزىندە ونىڭ جاتتىعۋىنا كاسىپكەر باۋىرجان وسپانوۆ كومەكتەسكەن. ال ءقازىر ول قاناتتىڭ جاتتىعۋىنا دا كومەكتەسىپ ءجۇر.

قانات ۇلتتىق قۇرامانىڭ وقۋ-جاتتىعۋى كەزىندە تاعى مىنا نارسەنى ايتتى.

- بوكسشىلار ەل نامىسى ءۇشىن جاتتىعۋدان باس الماي، اق تەر، كوك تەرگە ءتۇسىپ جاتتىعۋدا. ولاردىڭ تەر توگىپ جاتقانىن كۇندە كورىپ ءجۇرمىز. ۇلتتىق قۇرامانىڭ باس جاتتىقتىرۋشىسى مىرزاعالي ايتجانوۆ پەن باسقا دا جاتتىقتىرۋشىلار بوكسشىلارعا ءتيىستى تاپسىرمالارىن بەرىپ، سولاردى ورىنداتىپ جاتىر. ەندى ءبىز جىگىتتەرگە تەك ساتتىلىك جولداس بولىپ، قۇرمەت تۇعىرىنىڭ ەڭ بيىك ساتىسىنان كورىنسىن دەيمىز، - دەيدى ول.

بوكسشىلاردىڭ سوڭعى وقۋ-جاتتىعۋ جيىنى 25-27- شىلدە كۇندەرى وتەدى. ۇلتتىق قۇراما كوماندا 28- شىلدە كۇنى ريو-دە-جانەيرو قالاسىنا جول جۇرەدى.