نازاربايەۆتىڭ قازىرگى جاعدايعا قاتىستى 9 ەستە قالارلىق ءسوزى
سولاردىڭ ەڭ ەستە قالارلىقتارىن theopenasia.net-كە سىلتەمە جاساپ NUR. KZ پورتالى نازارلارىڭىزعا ۇسىنادى.
1. كادرلىق ساياسات تۋرالى
نازاربايەۆ ەلدەگى كادرلاردى دايارلاۋعا سالماقتى قاراجات جۇمسالاتىنىن جانە ولاردان ءدال سونداي سالماقتى ناتيجەلەر كۇتىلەتىنىن ايتتى.
«پرەزيدەنت اپپاراتىندا دا، مەملەكەتتىك قىزمەت ىستەرى جونىندەگى اگەنتتىكتە دە بۇل ماسەلەمەن ەشكىم شۇعىلدانبايدى. جاڭا تولقىن بويىنشا كادرلىق رەزەرۆكە قاتىستى قامقورلىق جوق. سپورتتىق تەرمينولوگيا بويىنشا ايتساق، «قوسالقى ويىنشىلارىڭىزدان» ەشكىم دە جوق».
2. ورنىنا قوياتىن ادام ىزدەۋ
«كەز كەلگەن مامانعا ەڭ الدىمەن ءوزىنىڭ ورنىن باساتىن ادام دايىنداۋ تۋرالى مىندەت قويۋ كەرەك. بۇل بارلىعىمىزعا قاتىستى. الماستىراتىن ادام ىزدەسەڭ، ەشكىم جوق. سۇراساڭ، «ورنىما قوياتىن ەشكىم جوق. بارلىعىن جالعىز ءوزىم اتقارىپ كەلەمىن، مەنەن كەيىنگىلەر مۇلدە ناشار» دەپ جاۋاپ بەرەدى. ەگەر ءىس جۇرمەي جاتسا باسشىنى اۋىستىرۋ كەرەك دەپ تالاي ايتتىم».
3. قارجى ءمينيسترى تۋرالى
قازاقستان پرەزيدەنتى قارجى ءمينيسترىنىڭ ورنىندا بولات جامىشيەۆتىڭ وتىرعانىن نە ءۇشىن قالايتىنىن ايتتى.
«ەگەر بىزدە دەنى دۇرىس قارجى ءمينيسترى بولعاندا ول ءار تيىندى قاداعالايتىن ەدى. ال سەن كىم قانشا سۇراسا، سونشا اقشا بەردىڭ. مەملەكەت قازىناسىن ساعان تاپسىرعانمىن. سەن - مەملەكەتتىڭ قالتاسىسىڭ، قارجى مەن قازىنانىڭ قالاي جۇمسالاتىنىن قاداعالايتىن جەكە وكىلىمسىڭ. جامىشيەۆتى قويعان دۇرىس شىعار».
4. زەينەتاقى جاسىن كوتەرۋ تۋرالى
«زەينەت جاسىن بەكەر كوتەرمەدىك. قازاقستاندىقتاردىڭ ءومىر ءسۇرۋ جاسى ۇزارىپ بارادى. 10 جىلدا عانا ءومىر ءسۇرۋ ۇزاقتىعى 64 تەن 72 جاسقا جەتتى. ەگەر ءبىز زەينەتكە شىعۋ جاسىن كوبەيتپەسەك، وندا زەينەتاقىعا اقشا قالمايدى. مۇنى بارلىعى تۇسىنەدى دەپ ويلايمىن».
5. ينۆەستيتسيالار مەن مۇمكىندىكتەر تۋرالى (مينيستر اسەت يسەكەشيەۆكە سويلەگەن ءساتى)
«ق ح ر، لوندون، پاريجدەن باستاپ مەنىڭ بارلىق ساپارلارىما، بىزگە جاسالعان ساپارلارعا، بيزنەس-فورۋمدارعا، بيزنەس-كاپيتاندارىمەن كەزدەسۋگە، الەمنىڭ ءىرى بيزنەسمەندەرىمەن جەكە كەزدەسۋلەرىمە قاتىستىڭ. ولاردىڭ بارلىعى دا قىزىعۋشىلىق تانىتىپ، جۇمىس ىستەيتىن ناقتى نىساندارىن اتادى. بۇگىنگى شىنايى ومىردە مۇنداي مۇمكىنشىلىك ەشكىمدە جوق. الەمدە اقشا كوپ، ولاردى الۋ، تارتۋ، قىزىقتىرا ءبىلۋ قاجەت. ۇكىمەتتىڭ بار شەبەرلىگى، ءبىزدىڭ كادرلاردىڭ بىلىكتىلىگى مەن قۇزىرەتتىلىگى ءدال وسى تۇستا توعىسۋى ءتيىس».
6. باي ادامداردىڭ قاتىسۋى مەن جەكەشەلەندىرۋ تۋرالى
«مەملەكەت وسى جىلدار بويى سىزدەرگە بايۋعا مۇمكىندىك بەردى... ەندى «زاڭداستىرۋ مەن جەكەشەندىرۋ ناۋقانىنا قاتىسساڭىزدار» حالىققا - بايۋعا مۇمكىندىك بەرگەن ەلگە جاقسى جاۋاپ بەرگەن بولاسىزدار. مەن بۇل تۋرالى ءبىزدىڭ ادامدارمەن جەكە سويلەسەمىن».
7. زاڭداستىرۋ تۋرالى
«زاڭداستىرۋ - ەركىن دەكلاراتسيا الدىنداعى سوڭعى اكت. الدىمەن مەملەكەتتىك قىزمەت، كەيىن - قازاقستاننىڭ بارلىق ازاماتتارى. كىرىس تە، شىعىس تا. مەن تاعى دا ەسكەرتەمىن. ءبىز الەم بويىنشا سالىقتان تىعىلعانداردى ىزدەستىرەتىن بولامىز. بارلەرىڭ كورگەن شىعارسىڭدار، بىزبەن بىرگە باس پروكۋرور بارلىق جەردە ءجۇردى. ءىرى ەلدەرمەن قۇقىقتىق كومەك تۋرالى كەلىسىمشارتقا قول قويدى. ا ق ش- تان باستاپ بارلىق شوتتار اشىلاتىنى ايتىلدى ەشقانداي وفشور بولمايدى. ءبىز ءوز ەركىتەرىڭمەن اقشانى اكەلىپ، ءبارىن اشۋدى، وسىلايشا تىنىش ءومىر ءسۇرىپ، تىنىش ۇيىقتاۋدى ۇسىنامىز».
8. داعدارىس ۋاقىتىنداعى ءومىر تۋرالى
«دۇنيەجۇزىلىك نارىق جاعدايىنىڭ قۇلدىراۋى، سونىمەن قاتار، ءبىزدىڭ نەگىزگى ەكسپورتتىق تاۋارلارىمىزدىڭ قۇنى تومەندەۋىنە بايلانىستى قاتاڭ ۇنەمدەۋدى ەنگىزۋ كەرەك. بۇل كەلەسى جىلدىڭ بيۋجەتىن ەسەپتەگەن كەزدە باستى نازارعا الىنسىن. قانداي قيىندىقتار بولسا دا، ءبىز ەكونوميكانىڭ دامۋ كورسەتكىشىن، ازاماتتارىمىزدىڭ الەۋمەتتىك جاعدايىن تومەندەتپەۋىمىز كەرەك. حالىق الدىنداعى بارلىق الەۋمەتتىك مىندەتتەردى ورىنداۋ كەرەك. ءبىز بۇل قيىن كەزەڭدەردى ارتقا تاستاۋعا ءتيىسپىز».
9. تۇرعىن ءۇي تۋرالى
«كوپبالالى وتباسىمەن استاناعا قىزىلوردادان كەلىپ، كەزەككە تۇرادى. تابىسى تومەن ازامات جارتى جىلدان كەيىن پاتەر الادى. ال مۇندا كەزەكتە تۇرعان استانالىقتار ونى الۋى ءتيىس. بۇل ماسەلەدە ءبىزدىڭ ەسكەرمەي قالعان تۇستارىمىز بار. ولارعا دا كومەك كورسەتۋ كەرەك. الايدا استاناعا تەز ارادا پاتەر الۋ ءۇشىن كەلمەۋ كەرەك. ونى 8-10 جىلداپ كۇتىپ وتىرعاندار بار عوي».
