الماتى وبلىسىنىڭ اكىمى ءبىرقاتار اۋدان اكىمىنە 9 ايدىڭ قورىتىندىسى بويىنشا سىن- ەسكەرتپە ايتتى

استانا. قازاقپارات - 29 - قازان كۇنى الماتى وبلىسىنىڭ اكىمى اماندىق باتالوۆتىڭ توراعالىعىمەن وبلىستىق اكىمدىكتىڭ وتىرىسى ءوتتى.

 وندا ءوڭىردىڭ 9 ايداعى الەۋمەتتىك- ەكونوميكالىق دامۋ قورىتىندىلارى مەن IV توقسانعا ارنالعان مىندەتتەر، سونىمەن قاتار بارلىق دەڭگەيدەگى اكىمدەردىڭ ەسەپ بەرۋ كەزدەسۋلەرىندە ايتىلعان ۇسىنىس- ەسكەرتپەلەر بويىنشا دايىندالعان ءىس- شارالار جوسپارىنىڭ ورىندالۋ بارىسى قارالدى، دەپ حابارلادى وبلىس اكىمىنىڭ باسپا ءسوز قىزمەتىنەن.

ءبىرىنشى ماسەلە بويىنشا وبلىس اكىمىنىڭ ءبىرىنشى ورىنباسارى ماحاببات بيگەلديەۆ بايانداما جاسادى.

بايانداماشىنىڭ ايتۋىنشا، اۋىل شارۋاشىلىعىندا جالپى ءونىم %3,2 وسىممەن 316,6 ميلليارد تەڭگەنى قۇرادى. ۇستىمىزدەگى جىلدىڭ 26 - قازانىنداعى جاعداي بويىنشا 438,1 مىڭ گ ا ءداندى ماساقتى داقىلدار جينالدى نەمەسە ەگىستىك كولەمنىڭ - %97,5 (449,4 مىڭ گ ا)، جالپى ءتۇسىم 1 ميلليون 118 مىڭ توننانى قۇرادى. 85,5 پايىز جۇگەرى، 92,5 پايىز كۇرىش، 70 پايىز ماي داقىلدارى، 37,5 پايىز قانت قىزىلشاسى جينالدى. ال ونەركاسىپ ءونىمى وندىرىسىندە ءبىرقاتار اۋدانداردا تومەندەۋ بايقالعانىن دا اتاپ ءوتتى.

«بيزنەستىڭ جول كارتاسى 2020» بيزنەستى قولداۋ جانە دامۋ ءبىرىڭعاي باعدارلاماسىن جۇزەگە اسىرۋ اياسىندا، جىل باسىنان بەرى جالپى 10,3 ميلليارد تەڭگە سوماسىنا 134 جوبا مەملەكەتتىك قولداۋمەن قامتىلدى. يندۋستريالدىق ينفراقۇرىلىمدى تارتۋ بويىنشا 1,4 ميلليارد تەڭگە سوماسىندا 9 جوبا جۇزەگە اسىرىلۋدا. جۇزەگە اسىرىلعان شارالار ناتيجەسىندە 284 جۇمىس ورنى قۇرىلىپ، 1 848 جۇمىس ورنى ساقتالعان.

تۋريزم سالاسىندا كورسەتىلگەن اقىلى تۋريستىك- ساۋىقتىرۋ قىزمەتتەرىنىڭ كولەمى وتكەن جىلدىڭ وسى كەزەڭىنە قاراعاندا 14,9  پايىز ءوسىپ، 3,5  ميلليارد تەڭگەنى قۇرادى.

 سونىمەن قاتار، بايانداماشى يندۋستريالاندىرۋ كارتاسى، «سىباعا»، «ىرىس»، «قۇلان» ت. ب. مەملەكەتتىك باعدارلامالاردىڭ ورىندالۋ بارىسىنداعى ەلەۋلى كەمشىلىكتەرگە توقتالىپ ءوتتى.

وبلىس اكىمى ا. باتالوۆ قاراتال اۋدانىنىڭ اكىمى ق. بيسەمبايەۆ پەن سارقان اۋدانىنىڭ اكىمى ە. قوشانبەكوۆتەن، اۋىل شارۋاشىلىعى باسقارماسىنىڭ باسشىسى س. بەكىشوۆ پەن ەنەرگەتيكا جانە تۇرعىن ءۇي- كوممۋنالدىق شارۋاشىلىعى باسقارماسىنىڭ باسشىسى ب. تانەكەنوۆتەن ءوز اۋماقتارى مەن ءوز سالالارىندا ورىن الىپ وتىرعان ولقىلىقتاردىڭ سەبەبىن جانە ونى شەشۋ جولدارىن سۇراپ، ءبىرقاتار سىن- ەسكەرتپەلەرىن ايتتى.

ينۆەستيتسيا تارتىپ، ونەركاسىپ الاڭدارىن قۇرۋعا، ىسكە قوسىلعان جىلىجاي، كوكونىس ساقتاۋ قويمالارى، مال بورداقىلاۋ الاڭدارى سەكىلدى نىسانداردى تولىق جۇكتەمەمەن قامتاماسىز ەتۋگە اۋدان، قالا اكىمدەرى جاۋاپتى ەكەنىن جەتكىزدى. مەملەكەتتىك باعدارلامالاردىڭ جۇزەگە اسىرىلۋىنا دا ءاربىر باسشى دەربەس جاۋاپ بەرەتىنى دە ەسكەرتىلدى.

- جالپى، وتكەن توعىز ايدىڭ قورىتىندىسى جامان ەمەس. ءبىراق، ەت، ءسۇت، جەمىس- كوكونىس ونىمدەرى يمپورتىنىڭ وسۋىنە جول بەرمەي، ءوزىمىزدىڭ ساۋدا سورەلەرىندە، الماتى سەكىلدى ۇلكەن تۇتىنۋ نارىعىندا ونىمدەرىمىزدى كوبەيتۋىمىز كەرەك. شاعىن جانە ورتا بيزنەستى دامىتۋعا، ينۆەستيتسيا تارتۋعا ەرەكشە نازار اۋدارىڭىزدار، - دەدى وبلىس باسشىسى ا. باتالوۆ.

جيىندا، سونداي- اق، قىسقى جىلىتۋ ماۋسىمىندا وقىس جاعدايلاردىڭ بولۋىنا جول بەرمەۋ، وتىن قورىن جاساقتاۋ، ماۋسىمدى وڭدى وتكىزۋ شارالارىن پىسىقتاۋ دا ءسوز بولدى.