قۇرىلىسى 9 جىلعا سوزىلعان اۋەجاي

None
None
استانا. قازاقپارات - گەرمانياداعى «بەر» اۋەجايىنىڭ قۇرىلىسى 9 جىلعا سوزىلىپ كەتتى. ول ەۋروپاداعى ەڭ ءىرى جانە تابىستى اۋەجايعا اينالۋعا ءتيىس ەدى. ءبىراق ونىڭ ورنىنا نىسان تەك ۇلكەن شىعىندار اكەلۋدە. مەملەكەت وعان اي سايىن 35 ميلليون ەۋرو جۇمسايدى.

اۋەجايدىڭ قاشان ىسكە قوسىلاتىنى ءالى كۇنگە دەيىن بەلگىسىز. مۇستافا نۇردوعان - جاڭا نىساننىڭ قۇرىلىسىنا قاراجات سالعان كاسىپكەرلەردىڭ ءبىرى. وسىدان 9 جىل بۇرىن مۇستافا ءدامحانا اشۋ ءۇشىن اۋەجاي اۋماعىندا جەر تەلىمى جانە كاسىبىنە قاجەتتى قوندىرعىلاردى ساتىپ العان.

قۇرىلىستىڭ سوزىلىپ كەتۋىنە وراي ويلاعان ءىسى ورگە باسپاي، قۇرال-سايمانى ءالى دە قويمادا تۇر.

مۇستافا نۇردوعان، كاسىپكەر: - مەنىڭ ەسەپتەۋىمشە، پەش، توڭازىتقىش پەن وزگە دە قۇرالدارعا جۇمساعان 10 مىڭ ەۋرونى تۇسكەن پايدامنان قايتارۋعا ءتيىس ەدىم. ءبىراق اۋەجايدىڭ قۇرىلىسى اياقتالار ەمەس. ساتىپ الىنعان جابدىقتىڭ كەپىلدىك مەرزىمى دە اياقتالىپ، ونىڭ قاي كۇيدە ەكەنىن دە بىلمەيمىن. اۋەجايدىڭ تەك سىرتى عانا كوز تارتارلىق، ىشىندە جاعداي مۇلدەم باسقاشا، زاماناۋي ستاندارتتارعا ساي ەمەس. تىركەۋ ورىندارى مەن جۇك جەتكىزۋگە ارنالعان لەنتالار جەتكىلىكسىز. ءورت قاۋىپسىزدىك جۇيەسى دە دۇرىس جاسالماعان. جالپى، قۇرىلىس باستالعاننان بەرى باس جوباعا 500 دەن استام وزگەرتۋ ەنگىزىلدى. اۋەجايدىڭ قاشان ىسكە قوسىلاتىنىن دەپۋتاتتاردىڭ وزدەرى دە انىق ايتا المايدى.

مارتين دەليۋس، پارلامەنت دەپۋتاتى، «بەر» اۋەجايىنىڭ قۇرىلىسىن باقىلاۋ كوميتەتىنىڭ مۇشەسى:

- بۇل اۋەجاي مەملەكەتتىڭ باس اۋرۋىنا اينالدى. نىساننىڭ سالىنۋىنا قىرۋار قاراجات كەتتى. بۇل جوبانىڭ سونشالىقتى قىمبات بولارىن بىلسەك، ودان باس تارتار ەدىك، ويتكەنى شەنەفەلد جانە تەگەل اۋەجايلارىنىڭ رەكونسترۋكتسياسىنا جوسپارلانعان بار اقشا وسىعان كەتىپ جاتىر. 2006-جىلى «بەردىڭ» قۇرىلىسىنا 2 ميلليارد ەۋرو جۇمساۋ جوسپارلانعان ەدى. 3 جىلدان كەيىن بۇل جوبا 2,5 ميلليارد ەۋروعا باعالاندى. بىلتىر اۋەجايدىڭ باعاسى باستاپقى سومادان ەكى ەسە استى. نىسانعا 5 ميلليارد ەۋرودان استام قاراجات قۇيىلدى. بۇل اقشاعا 5 ميلليون بالاباقشا ورنىن اشىپ، 30 مىڭ مەتر تاسجولىن سالىپ نەمەسە 12 جىل بويى بەرليننىڭ بارلىق كوشەلەرىن جارىقتاندىرۋعا بولار ەدى.

وسى قاراجاتقا 10 جىل بويى 2 مىڭ مۇعالىمگە جالاقى تولەپ نەمەسە 3 ۆوكزالدى سالۋعا دا بولار ەدى. جاڭا اۋەجاي ءوز جۇمىسىن قاشان باستايدى؟ بۇل سۇراققا جاۋاپ ءالى دە جوق. قۇرىلىسشىلاردىڭ ۋادەسىنە سەنسەك، 2017-جىلى اياقتالادى. الايدا نىساننىڭ اشىلۋى بۇعان دەيىن 4 رەت شەگەرىلگەن ەدى.

24.kz

سوڭعى جاڭالىقتار