ءۇي جانۋارى يەسىنە ءبىر جىلدا 99,5 ميلليون دوللار تابىس سىيلادى

استانا. قازاقپارات - بريتاندىق ب ا ق- تىڭ مالىمەتتەرىنشە، ءۇي جانۋارىنىڭ ءبىر جىلدىق تابىسى مەتت دەيمون، مەتتيۋ ماككوناحي، نيكول كيدمان جانە كەمەرون دياز سياقتى جۇلدىزداردىڭ قالاماقىلارىنان اسىپ ءتۇستى. بۇل تۋرالى بريتاندىق The Daily Mirror گازەتىنە سىلتەمە جاساعان ت ا س س حابارلايدى.

عالامتوردا سوۋس تاردار، نەمەسە «اشۋلى مىسىق» (Grumpy cat) رەتىندە تانىمال ءۇي جانۋارىنىڭ يەلەرى ونىڭ ارقاسىندا 99,5 ميلليون دوللار تابىس تاپتى.

«مىسىعىمنىڭ سۋرەتى الەۋمەتتىك جەلىلەرگە شىققان كۇننەن باستاپ مەن داياشى بولىپ جۇمىس ىستەي المادىم. ۇيالى تەلەفونىم فاناتتار مەن ءتۇرلى كوممەرتسيالىق ۇسىنىستاردان «جارىلىپ» كەتە جازدادى»، - دەپ باياندادى تىلشىلەرگە عالامتور جۇلدىزىنىڭ يەسى تاباتا بۋندەسەن.

مىسىقتىڭ «جۇلدىزدى ءومىرى» 2012-جىلى ونىڭ سۋرەتى عالامتورعا سالىنعان كەزدەن باستاپ تانىمال بولدى. سول كەزدەن باستاپ «اشۋلى مىسىق» ءتۇرلى قالجىڭ سۋرەتتەر مەن كاريكاتۋرالاردىڭ كەيىپكەرىنە اينالدى. ونىڭ بەينەسى كادەسىيلىق ونىمدەر تۇرىندە شىعارىلۋدا، جانۋاردىڭ ءوزى تالاي توك-شوۋلار مەن تەلەارنالاردىڭ كەيىپكەرى بولدى. قاراشانىڭ سوڭىندا سوۋس تارداردىڭ قاتىسۋىمەن ەكرانعا «اشۋلى مىسىقتىڭ ەڭ جامان روجدەستۆوسى» اتتى تەليەۆيزيالىق فيلم جارىققا شىقتى. ول تۋرالى شىققان كىتاپ 15 تىلدە جارىق كوردى. حاريزمالىق جانۋاردىڭ فاناتتارىنىڭ سانى دا تاڭقالدىرۋدا - ونىڭ Facebook-تە 6 ميلليوننان استام جانە Twitter- دە 255 مىڭ جازىلۋشىسى بار.