الماتىدا وتىپ جاتقان دزيۋدودان حالىقارالىق تۋرنيرگە 98 ەلدەن 600 گە جۋىق سپورتشى قاتىسۋدا

الماتى. قازاقپارات - الماتىدا بالۋان شولاق اتىنداعى سپورت سارايىندا دزيۋدودان حالىقارالىق «Grand Prix» تۋرنيرىنىڭ رەسمي اشىلۋى ءوتتى.

وعان ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر قاتىستى.

ارىستانبەك مۇحامەدي ۇلى بۇل جارىسقا 98 ەلدەن 595 سپورتشىنىڭ قاتىسىپ جاتقانداعىن، ال مۇنىڭ قازاقستان ءۇشىن بۇل رەكوردتىق كورسەتكىشكە يە ەكەندىگىن ايتىپ، دزيۋدوشىلارعا ساتتىلىك تىلەدى.

ايتا كەتەلىك، 2014-جىلى استانادا وتكىزىلگەن وسىنداي حالىقارالىق «Grand Prix» جارىسىنا 40 ەلدىڭ سپورتشىلارى قاتىسقان بولاتىن.

بۇگىنگى تۋرنيرگە قازاقستان قۇراماسى ساپىندا 50 دزيۋدوشى قاتىسۋدا (27 ەر، 23 قىز). ولاردىڭ ىشىندە رۇستەم ىبىرايەۆ (60 كەلى) جانە وتگونتسەتسەگ گالبادراح (48 كەلى) سەكىلدى بەلگىلى سپورتشىلار بار.

جارىستىڭ جالپى جۇلدە قورى - 100000 ا ق ش دوللارىن قۇرايدى. جارىس قورىتىندىسى بويىنشا ءبىرىنشى ورىن العان دزيۋدوشىعا - 2400 ا ق ش دوللارى، باپكەرىنە - 600 دوللار، ەكىنشى ورىن العان بالۋانعا - 1600 دوللار، باپكەرىنە - 400 دوللار، ال قولا مەدال يەگەرىنە - 800 دوللار، ال باپكەرىنە - 200 دوللار كولەمىندە قارجىلاي سىياقى تابىستالادى.

تۋرنيردى ۇيىمداستىرۋشىلار: ق ر مادەنيەت جانە سپورت مينيسترلىگى، الماتى قالاسىنىڭ اكىمدىگى، ق ر ۇلتتىق وليمپيادا كوميتەتى، سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى مەن ق ر دزيۋدو فەدەراتسياسى.

بۇگىن تاڭەرتەڭ ساعات 10:00 دە باستالعان تۋرنير 15- مامىرعا دەيىن جالعاسادى.