قازاقستان حالقىنىڭ 97 پايىزى ءدىندى ۇستانادى - سەنات دەپۋتاتى
بۇل پىكىردى ق ر پارلامەنتى سەناتىنىڭ دەپۋتاتى دينار نوكەتايەۆا ايتتى، دەپ حابارلايدى قازاقپارات ءتىلشىسى.
«تاۋەلسىزدىك جىلدارى قازاقستان الەمدىك قوعامداستىق مويىنداعان، ءدىنارالىق جانە كونفەسسياارالىق ديالوگ پەن كەلىسىمدى قامتاماسىز ەتۋدە تابىسقا جەتۋدىڭ بىرەگەي تاجىريبەسى بار دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە قالىپتاستى. ەلىمىزدە بۇكىلقازاقستاندىق بىرلىكتىڭ بىرەگەي مودەلى - قازاقستان حالقى اسسامبلەياسى قۇرىلدى، ونىڭ باستى مىندەتى ەلىمىزدەگى قوعامدىق- ساياسي تۇراقتىلىقتى قامتاماسىز ەتۋ جونىندەگى مەملەكەتتىك ۇلتتىق ساياساتتى ىسكە اسىرۋ جانە ەتنوسارالىق قاتىناستار سالاسىندا مەملەكەتتىك جانە ازاماتتىق ينستيتۋتتاردىڭ ءوزارا ءىس- قيمىلىنىڭ تيىمدىلىگىن ارتتىرۋ»، - دەدى د. نوكەتايەۆا بۇگىن استانادا ءوتىپ جاتقان الەمدىك جانە ءداستۇرلى دىندەر ليدەرلەرى سەزىنىڭ سەسسيالىق وتىرىسىندا.
ءوز سوزىندە دەپۋتات بىرلىك، كەلىسىم جانە بەيبىتشىلىك - ەلدىڭ مىزعىماس قۇندىلىقتارى ەكەنىن، باستى قاعيداتىمىز - ءارالۋاندىق بىرلىگىنەن ەش اۋىتقىمايتىنىن اتاپ ءوتتى.
«ەلىمىزدە مەملەكەتتىك- كونفەسسيالىق ءوزارا قارىم- قاتىناستاردىڭ زايىرلى مودەلى قالىپتاسقان، وسىلايشا بارلىق ازاماتتار ءتىلى مەن ءدىني سەنىمىنە قاراماستان زاڭ الدىندا تەڭ جانە ءاربىر ازاماتتىڭ ءدىني نانىمدارىنا قۇرمەتپەن قاراۋ قاعيداتى بار. ەل كونستيتۋتسياسى قازاقستاندى زايىرلى مەملەكەت رەتىندە ايقىندايدى. رەسپوندەنتتەر ساۋالناماسىنا سايكەس، ەلدەگى حالىقتىڭ باسىم كوپشىلىگى، دالىرەك ايتقاندا 97 پايىزى وزدەرىن بەلگىلى ءبىر دىنگە جاتقىزادى. رەسپوندەنتتەردىڭ تەك 3 پايىزى عانا دىنگە سەنبەيتىنىن ايتقان نەمەسە قويىلعان سۇراققا جاۋاپ بەرۋدەن باس تارتقان»، - دەدى د. نوكەتايەۆا.
سونىمەن بىرگە دەپۋتات عاسىرلار بويى قازاقتاردىڭ تاريحي جەرىندە ءتۇرلى مادەنيەتتەر، دىندەر مەن داستۇرلەر توعىسقانىن ايتتى. سونىڭ ناتيجەسىندە قازاقتارمەن بىرگە 140-تان استام ەتنوس پەن 40 كونفەسسيانىڭ وكىلدەرى بەيبىت ءومىر ءسۇرىپ جاتقان بىرەگەي جاعداي قالىپتاستى.
«تاۋەلسىزدىك جىلدارى قازاقستاندا ءدىننىڭ ناعىز رەنەسسانسى بولدى. ەگەمەندىك العان سوڭ قازاقستان حالقىنىڭ ورتاق قۇندىلىقتارى - ءوز تاعدىرىن ەركىن تاڭداۋ، جاڭا مەملەكەت قۇرۋعا قاتىسۋ، ەل تاعدىرى مەن بولاشاق ۇرپاق ءۇشىن بىرلەسكەن جاۋاپكەرشىلىك بولدى. ءتۇرلى ەتنوستاردىڭ ۇزاق ۋاقىت بىرگە ءومىر ءسۇرۋى قوعامدا تۇراقتى تولەرانتتىلىق داستۇرلەرىن قالىپتاستىردى. قازاقستاندىقتاردا بارلىق ەتنوستار، كونفەسسيالار مەن الەۋمەتتىك توپتار وكىلدەرىنىڭ ءومىر سالتىنا، ادەت- عۇرپىنا، سەزىمدەرىنە، پىكىرلەرىنە، يدەيالارىنا، نانىمدارىنا قاتىستى تولەرانتتىلىق دەڭگەيى جوعارى»، - دەدى دينار نوكەتايەۆا.
ەلدەگى ۇلتتىق بىرلىكتى قامتاماسىز ەتۋدىڭ باستى فاكتورلارىنىڭ ءبىرى - جاس قازاقستاندىقتاردى تولەرانتتىلىق پەن كەلىسىم قۇندىلىقتارىنا تاربيەلەۋ. بۇل باعىتتا مەملەكەت بارلىق دەڭگەيدەگى ۇزدىكسىز ءبىلىم بەرۋ جۇيەسىنە ارنالعان ەتنومادەني ءبىلىم بەرۋدى ەنگىزىپ جاتىر.
«مەكتەپكە دەيىنگى، ورتا، كاسىپتىك- تەحنيكالىق وقىتۋ مەكەمەلەرى مەن جوعارى وقۋ ورىندارىندا ەتنومادەني تولەرانتتىق بويىنشا ينتەراكتيۆتى ءبىلىم بەرىلەدى. مەكتەپتەردە فاكۋلتاتيۆتىك- وقۋ كۋرسىن، ءدىنتانۋ نەگىزدەرىن وقىتۋ ءۇشىن، وسكەلەڭ ۇرپاقتىڭ ءدىن ماسەلەلەرىندە حاباردار بولۋ جانە ءبىلىم دەڭگەيىن ارتتىرۋ ءۇشىن جاعداي جاسالعان. قازاقستاندا ءدىني قىزمەت جانە ءدىني بىرلەستىك تۋرالى زاڭ بار. بۇل زاڭ ءار ادامنىڭ ءدىني سەنىم بوستاندىعىنا قۇقىعىن نىعايتادى، ءار ادامنىڭ ءدىني نانىمىنىڭ تەڭ قۇقىلى بولۋىنا كەپىلدىك بەرەدى»، - دەدى سەنات دەپۋتاتى.
ايتا كەتەيىك، بۇگىن ەلوردادا الەمدىك جانە ءداستۇرلى دىندەر ليدەرلەرىنىڭ VII سەزى جالعاسۋدا. وندا « ءبىلىم مەن ءدىني اعارتۋدىڭ دىندەر مەن مادەنيەتتەردىڭ سىيلاستىقتا قاتار ءومىر ءسۇرۋ جانە بەيبىتشىلىك پەن كەلىسىمدى نىعايتۋداعى ءرولى» اتتى سەكسياسى ءوتىپ جاتىر.
