شىعارماشىلىق ۇيىرمەلەر مەن سپورت سەكسيالارىن قارجىلاندىرۋعا قوسىمشا 97 ميلليارد قاجەت - ابايەۆ
بۇل تۋرالى ق ر مادەنيەت جانە سپورت ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«بۇگىن وسى جەرگە ەل ازاماتتارىن تولعاندىرىپ جۇرگەن اسا ماڭىزدى سۇراقتى تالقىلاۋ ءۇشىن جينالىپ وتىرمىز. اڭگىمە شىعارماشىلىق ۇيىرمەلەر مەن سپورت سەكسيالارىن جان باسىنا شاققانداعى قارجىلاندىرۋ جۇيەسىنىڭ ءارى قارايعى جۇمىسى تۋرالى بولادى. قازىرگى ۋاقىتتا 495 مىڭ بالا 15 مىڭ ۇيىرمە مەن سەكسياعا بارادى. وعان 32 ميلليارد تەڭگەدەن اسا قاراجات ءبولىندى. جىل سوڭىنا دەيىن قوسىمشا 97 ميلليارد قاجەت. ايتىلاتىن سىن مەن قويىلاتىن سۇراقتاردىڭ الدىندا ءبىر عانا دۇنيەنى ايتقىم كەلەدى: ارتسپورت - بۇقارالىق سپورتتى دامىتۋدىڭ جالعىز مەحانيزمى ەمەس»، - دەدى داۋرەن ابايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ دەرەگىنشە، بۇگىنگە دەيىن 41 دەنە شىنىقتىرۋ- ساۋىقتىرۋ كەشەنىن ىسكە قوسۋ ارقىلى جاقسى ناتيجەگە قول جەتكىزىلدى. ونىڭ 32- ءسى اۋدان ورتالىقتارى مەن اۋىلدىق جەرلەردە اشىلدى.
«سونىمەن قاتار اۋىلدىق جەرلەردە سپورتتىق ءىس- شارالار مەن سەكسيالاردى ۇيىمداستىرۋعا جاۋاپتى 3064 جاتتىقتىرۋشى جۇمىسقا الىندى. جاستاردى سپورتقا تارتۋ ءۇشىن وتكەن جىلى باسكەتبول، ۆولەيبول، فۋتزال، قازاقشا كۇرەس، ۇستەل تەننيسى سياقتى سپورت تۇرلەرىنەن مەكتەپىشىلىك جانە ستۋدەنتتەر اراسىندا ۇلتتىق ليگالار وتكىزىلدى. ءبىلىم بەرۋ جۇيەسىنىڭ بارلىق دەڭگەيىندە دەنە شىنىقتىرۋ ءپانىنىڭ ۇستازدارىنا ساباقتان تىس ءىس- شارالاردى وتكىزگەنى ءۇشىن قوسىمشا اقى تاعايىندالدى. ياعني، بۇل رەتتە 30 مىڭنان استام دەنە تاربيەسىنىڭ مۇعالىمى قامتىلدى. 2022-2024 -جىلدارى اتالعان ماقساتتا ايماقتارعا قوسىمشا 21 ميلليارد تەڭگە بولىنەدى»، - دەدى ول.
ءمينيستردىڭ دەرەگىنشە، بۇگىنگە دەيىن بالالاردى قوسىمشا سپورت سەكسيالارىمەن، ۇيىرمەلەرمەن قامتۋ 73 پايىزدى قۇراپ وتىر.
«جان باسىنا شاققانداعى قارجىلاندىرۋ جۇيەسى مەن ءبىلىم بەرۋ ۇيىمدارىنداعى سەكسيالاردان بولەك، بالالار مەن جاسوسپىرىمدەردى وقىتاتىن سپورت مەكتەپتەرىندە تاعى 386 مىڭ بالا ءبىلىم الۋدا. 2022 -جىلى قارجىلاندىرۋدىڭ جالپى كولەمى 123,7 ميلليارد تەڭگەنى قۇرايدى»، - دەدى داۋرەن ابايەۆ.
