ۆاكسينا العان دارىگەرلەردىڭ ۇلەسى 96 پايىزعا جەتتى
وڭىردە كۇن سايىن ۆاكسينا العاندار سانى ارتىپ كەلەدى. بۇل جايلى ايماقتاعى ەپيدەميولوگيالىق جاعدايعا، ۆاكسيناتسيالاۋ جۇمىستارىنىڭ جۇرگىزىلۋىنە قاتىستى وتكەن كەڭەس بارىسىندا ايتىلدى.
«بارلىق قىزمەت كورسەتۋ سالاسى ماماندارىن، ياعني، قوعامدىق كولىك، تاماقتانۋ، ساۋدا ورىندارىندا جۇمىس ىستەيتىندەردىڭ ۆاكسينا الۋىن قاداعالاۋ كۇن تارتىبىندە تۇر. بۇل دەنساۋلىق ساقتاۋ، ءبىلىم بەرۋ باعىتىنداعى قىزمەتكەرلەرگە دە قاتىستى. قازىرگى تاڭدا وبلىستا دارىگەرلەر اراسىندا ۆاكسينا العانداردىڭ ۇلەسى - 96، كۇشتىك قۇرىلىمدار قىزمەتكەرلەرى اراسىندا – 91، قىزمەت كورسەتۋ سالاسىندا ەگىلگەن ادامداردىڭ جالپى سانى 66 پايىزدى قۇراپ وتىر. بۇل جاقسى كورسەتكىش، ءبىراق وسىمەن توقتاپ قالۋعا بولمايدى»، - دەدى وبلىس اكىمى دانيال احمەتوۆ.
3-ماۋسىمنان باستاپ وسكەمەن مەن سەمەيدە بەس جىلجىمالى ەگۋ پۋنكتى جۇمىس ىستەۋدە. سونداي- اق ءۇرجار، گلۋبوكوە جانە التاي سىندى تۋريستىك اۋداندارعا ەرەكشە نازار اۋدارىلۋدا.
«بىلتىر الاكول جاعالاۋىندا تۋريستەردەن پ ت ر- انىقتامانى مىندەتتى تۇردە تالاپ ەتۋ كەرەكتىگىن ەنگىزگەن كەزدە، بۇل شارانى كاسىپكەرلەر تۇسىنبەي قالعان بولاتىن. ءبىراق كەيىن ريزاشىلىقتارىن ءبىلدىردى. وتكەن جىلى اۋدانعا 600 مىڭعا جۋىق تۋريست كەلگەن. ابىروي بولعاندا بىردە-ءبىر ناۋقاس تىركەلگەن جوق»، - دەدى ايماق باسشىسى.
ونىڭ ايتۋىنشا، ايماقتا ۆيرۋس جۇقتىرعاندار سانى ورتاشا رەسپۋبليكالىق كورسەتكىشتەن تومەن.
اۆتور: تالعاتجان مۇحامەتبەك ۇلى
