ۇلتتىق گۆارديانىڭ اسكەري قىزمەتكەرلەرى اقتوبە وبلىسىندا 96 ادامدى قار قۇرساۋىنان شىعاردى - فوتو

استانا. قازاقپارات - كەشە كەشكە ق ر ۇلتتىق گۆاردياسىنىڭ «باتىس» ايماقتىق كوماندوۆانيەسىنە قاراستى 6655 اسكەري ءبولىمىنىڭ جەدەل كەزەكشىسىنە اقتوبە وبلىسىنىڭ حرومتاۋ جانە قارعالى اۋداندارىنىڭ اۋماعىندا اۋا رايىنىڭ قولايسىزدىعى سالدارىنان ىشىندە ادامدار بار اۆتوموبيل تەحنيكاسىنىڭ قار قۇرساۋىندا قالىپ قويعانى تۋرالى حابارلاما كەلىپ تۇسكەن.

ق ر ۇلتتىق گۆاردياسى باسپا ءسوز قىزمەتىنىڭ اقپاراتىنشا، ومىرىنە قاۋىپ ءتونىپ تۇرعان ادامداردى قۇتقارۋ ءۇشىن تابيعي جانە تەحنوگەندىك سيپاتتاعى توتەنشە جاعدايدى جويۋ بويىنشا ءىس-ارەكەتتەر جوسپارىنا سايكەس، ادامداردى تابيعي اپات ايماعىنان شىعارىپ، ولاردى جىلىتۋ پۋنكتىن قۇرۋ ماقساتىندا شۇعىل تۇردە 6655 اسكەري ءبولىمىنىڭ جەكە قۇرامى مەن تەحنيكاسىن جۇمىلدىرۋ شەشىمى قابىلداندى.

جەدەل تاعايىنداۋ باتالون شتابىنىڭ باسشىسى، كاپيتان نۇرلان سەيتالين باسقارعان ۋرال 3255 كولىگىندەگى ەۆاكۋاتسيالاۋ توبى دايىندالدى. توپتىڭ قۇرامىندا 6 اسكەري قىزمەتكەر، سونىڭ ىشىندە 2 جۇرگىزۋشى مەن ەۆاكۋاتسيالاۋ توبىنىڭ 3 اسكەري قىزمەتكەرى بولدى. سونداي-اق ۋرال 4320 اۋىر جۇك تاسيتىن كولىككە مىنگەن اپاتتىق-قۇتقارۋ توبى دايىندالدى. ونى اسكەري ءبولىمنىڭ كولىكبرونەتانك قىزمەتىنىڭ باستىعى س. قويشىبايەۆ باسقارعان.

زارداپ شەككەندەردى قۇتقارۋ جۇمىستارى ءتۇنى بويى جالعاستى. ۋاقىتىلى قابىلدانعان شارالاردىڭ ارقاسىندا وبلىس ورتالىعىنان 72 شاقىرىم قاشىقتىقتا قار قۇرساۋىندا قالىپ قويعان 96 ادام قۇتقارىلدى.