قورعانداردان تابىلعان 968 جادىگەر قايتا قالپىنا كەلتىرلىپ مۋزەيگە تاپسىرىلدى - فوتو
مينيسترلىكتىڭ باسپا ءسوز قىزمەتىنىڭ حابارلاۋىنشا، ق ر مادەنيەت جانە سپورت مينيسترلىگى جەتەكشى وتاندىق زەرتحانالاردا قايتا قالپىنا كەلتىرىلگەن بىرەگەي تابىستارىنىڭ اۋقىمدى كوللەكسياسىن جۇرتشىلىق نازارىنا ۇسىندى. وسى سالادا ماماندانعان ەكى جەتەكشى ۇيىم - ق ر م س م «قازرەستاۆراتسيا» ر م ك جانە «وستروۆ كرىم» عىلىمي قايتا قالپىنا كەلتىرۋ زەرتحاناسى قايتا قالپىنا كەلتىرۋ جانە كونسەرۆاتسيالاۋ بويىنشا اتقارعان جۇمىس ناتيجەلەرىمەن تانىستىردى.
«ەلباسىنىڭ باستاماسىمەن 2004-2011 -جىلدارى جۇزەگە اسىرىلعان «مادەني مۇرا» مەملەكەتتىك باعدارلاماسى بۇگىنگى تاڭدا مينيسترلىكتىڭ ستراتەگيالىق جوسپارى اياسىندا جالعاسىن تابۋدا. ءبىز قازاق حالقىنىڭ باي مادەني مۇراسىن زەرتتەۋ، ونىڭ ىشىندە ۇلتتىق تاريح ءۇشىن ەرەكشە ماڭىزى بار تاريحي- مادەني جانە ساۋلەت ەسكەرتكىشتەرىن قالپىنا كەلتىرۋ جۇمىستارىن جۇرگىزۋدەمىز. بۇل «قازقايتاجاڭارتۋ» رەسپۋبليكالىق مەملەكەتتىك كاسىپورنىنىڭ تاريحي- مادەني ەسكەرتكىشتەردى ساقتاۋ جانە قالپىنا كەلتىرۋ بويىنشا بەس جىل كولەمىندەگى جۇمىسىنىڭ ناتيجەسى»، - دەپ اتاپ ءوتتى مادەنيەت جانە سپورت ءمينيسترى ارىستانبەك مۇحامەدي ۇلى.
وسى شارا اياسىندا شىعىس قازاقستان وبلىسى اۋماعىندا ورنالاسقان قورعانداردان تابىلعان 968 ارحەولوگيالىق جادىگەر مۋزەيگە تاپسىرىلدى. اتالمىش ەسكەرتكىشتەر تانىمال قازاقستاندىق ارحەولوگ زەينوللا ساماشيەۆتىڭ بەرەل قورعانىندا جۇرگىزگەن قازبا جۇمىستارىنىڭ ناتيجەسىندە تابىلعان بولاتىن. مۋزەيگە كەلۋشىلەر قايتا قالپىنا كەلتىرىلگەن ەجەلگى زامان زاتتارىن مۋزەيدىڭ اتريۋمىندا اشىلاتىن «وتكەن كۇنگى بەينەلەردىڭ بۇگىنگى كورىنىسى» كورمەسىنەن تاماشالاي الادى.
«رەستاۆراتورلاردىڭ قىزمەتى - كونە بۇيىمداردى قايتا قالپىنا كەلتىرۋ ىسىندەگى ەڭ ماڭىزدى قىزمەت. مۇنداي وتە قۇندى مالىمەتتەردى ارحەولوگتار مەن تاريحشىلاردىڭ كومەگىمەن تابۋ بار، الايدا ءبىز رەستاۆراتورلارسىز ەجەلگى شەبەرلەر جاساعان تاڭقالارلىق كەرەمەت الەمدى تولىعىمەن ەشقاشان كورسەتە الماعان بولار ەدىك» - دەپ اتاپ ءوتتى «قازقايتاجاڭعىرتۋ» ر م ق ديرەكتورى ارنۇر قارىمساقوۆ.
سونىمەن قاتار، كورمەدە «وستروۆ كرىم» عىلىمي قايتا قالپىنا كەلتىرۋ زەرتحاناسىنىڭ قىزمەتكەرلەرى ورگانيكالىق ارتەفاكتىلەردى العاشقى قايتا قالپىنا كەلتىرۋ بويىنشا پراكتيكالىق ساباق جۇرگىزەدى.
«وستروۆ كرىم» عىلىمي قايتا قالپىنا كەلتىرۋ زەرتحاناسىنىڭ ديرەكتورى ق. التىنبەكوۆتىڭ سوزىنە قاراعاندا، زاتتى باستاپقى قالپىنا كەلتىرمەس بۇرىن حالىقتىڭ مادەنيەتىن، ءدىنىن، ءپالساپالىق دۇنيە تانىمىن، ونىڭ قورشاعان ورتامەن، تابيعاتپەن، كوسموسپەن قارىم- قاتىناسىن ءتۇسىنۋ قاجەت. تەك سوندا عانا تابىسقا جەتۋگە بولادى. ولاي بولماعان جاعدايدا قايتا قالپىنا كەلتىرىلگەن زات جاساندى الدامىش بوس نارسە بولىپ كورىنەدى.
مۋزەيگە وتكىزىلەتىن بارلىق زاتتىڭ ساقتاۋ شارتى بويىنشا ۇسىنىستار بەرىلگەن رەستاۆراتسيالىق پاسپورتى بار.
