الماتى وبلىسىندا كوروناۆيرۋستەن وكپەسى 95 پايىز قابىنعان جۇكتى ايەل امان-ەسەن بوساندى
جاعدايى وتە اۋىر حالدە بولعان الاكولدىك جۇلدىز نۇرعاليەۆا ساناۆياتسيامەن تالدىقورعانعا جەتكىزىلگەن.
«ول 9-ساۋىردە اشىلعان تالدىقورعان قالاسىنداعى پەريناتالدى ورتالىقتىڭ كوروناۆيرۋستىق ينفەكتسياسى جانە پوليسەگمەنتتى پنەۆمونياسى بار جۇكتى جانە بوساناتىن ايەلدەرگە ارنالعان ينفەكتسيالىق بولىمگە ءتۇستى. وكپەسى 95 پايىزعا دەيىن قابىنعان جۇكتى ايەلگە دەر كەزىندە كەسىر تىلىگى جاسالىپ، رەانيماتسيالىق بولىمگە جاتقىزىلدى. انا مەن بالانىڭ ومىرىنە اراشا تۇسكەن مەديتسينا قىزمەتكەرلەرىنىڭ ارقاسىندا ومىرگە دەنى ساۋ شاقالاق كەلدى. وتادان كەيىن كەلىنشەك ءبىر اي بويى ينفەكتسيالىق بولىمدە، ال جاڭا تۋىلعان نارەستە پەريناتالدى ورتالىق دارىگەرلەرىنىڭ قاداعالاۋىندا بولدى»، - دەدى الماتى وبلىستىق دەنساۋلىق ساقتاۋ باسقارماسىنداعى باسپا ءسوز قىزمەتىنىڭ رەسمي وكىلى ءلايلىم اۋباكىروۆا.
الماتى وبلىستىق دەنساۋلىق ساقتاۋ باسقارماسىنىڭ باسشىسى ءومىرزاق نيازبەكوۆتىڭ ايتۋىنشا، جۇلدىز نۇرعالييەۆا ءساۋىر ايىنىڭ 27 نەن مامىردىڭ 24 ىنە دەيىن اۋرۋحانادا جاتقان. جاس انا مامىردىڭ 24 ى كۇنى اۋرۋحانادان امان- ەسەن شىقتى. ءبىر اي بويى دەرتىمەن ارپالىسقان انا اۋرۋحانادان شىعار كۇنى العاش رەت بالاسىن قولىنا الدى.
«ماعان ەكىنشى رەت ءومىر سىيلاعان بارلىق دارىگەردىڭ الدىندا باسىمدى يەمىن. ولار ءوز ءىسىن جەتىك بىلەتىن، جاۋاپكەرشىلىگى مول، ناعىز گيپپوكرات انتىنا ادال جاندار. وبلىستىق اۋرۋحانانىڭ باس دارىگەرى اناربەك مونگول مۇنداعى ءار ناۋقاستىڭ جاعدايى ءۇشىن الاڭداپ، كۇن- ءتۇن دەمەي ءوزى كەلىپ تەكسەرىپ جۇرگەنىنىڭ ءوزى دەرتتى جەڭىپ شىعۋعا ۇلكەن كۇش بەردى دەسەم بولادى. سونداي-اق، پەريناتالدى ورتالىقتىڭ باس دارىگەرى قانات جۇماشيەۆقا دا العىسىمدى بىلدىرەمىن. سونداي-اق رەنانيماتولوگ- دارىگەر ازيز سادىقوۆقا، انەستيزيولوگ- لارىگەرلەر بەرىكجان ۋالييەۆكە، گۇلجان بوتالبايەۆاعا، اسەت ەنسينگە ۇلكەن راحمەت. دارىگەرلەردىڭ ارقاسىندا قولىما بالامدى الىپ، امان- ەسەن ۇيگە ورالۋدامىن»، - دەدى. جۇلدىز نۇرعاليەۆا.
اۆتور: سامال قابىشەۆا
